ʻE Lava Fēfē Ke Ke Fai ha Ngaahi Fili ʻi he Founga ʻa e ʻOtuá?
KO HA tangata ʻi he ʻIunaite Seteté naʻá ne hū ki ha pangikē mo ha sieke fakafuofua ki he $25,000. Naʻá ne fakataumuʻá ke fakahū ʻa e paʻangá ʻi ha tipōsiti fakataimi pau. Kae kehe, naʻe faleʻi ange kiate ia ʻe he tokotaha pangikeé ke ne ʻinivesi ia ʻi he māketi sitoká, heʻene taukaveʻi ʻo pehē ʻi he lele lōloá, ʻoku halaʻatā pē ke mole ʻa e mahuʻinga ia ʻo e māketi sitoká. Naʻe fili ʻa e tangatá ke ne tali ʻa e faleʻí. ʻIkai fuʻu fuoloa mei ai, kuo mole ʻa e lahi ʻa e mahuʻinga ʻo ʻene ʻinivesí.
Ko e hokosia ko ení ʻoku fakatātaaʻi ai ko hono fai ʻa e ngaahi fili fakapotopotó ko ha pole ia. Fēfē ʻa e ngaahi fili kehekehe ʻoku tau fehangahangai mo ia ʻi he moʻuí? ʻOku lava ke iku ʻa e ngaahi fili lahi ki he lavameʻa pe taʻelavameʻa—pe ki he moʻui pe ki he mate nai. ʻE lava fēfē leva ke tau falala-pau ʻoku tau fai ʻa e ngaahi fili fakapotopotó?
“Ko Eni ʻa e Hala”
ʻOku tau fai ʻa e ngaahi fili fakaʻaho ʻo kau ki he meʻa ʻoku tau kai, meʻa ke tui, feituʻu ke ʻalu ki ai mo e hā fua. Ko e ngaahi fili ia ʻe niʻihi ʻe hā ngali ongo-maʻamaʻa nai, ka ʻoku ʻi ai nai honau ngaahi nunuʻa mafatukituki. Ko e fakatātaá, ko e fili ke ifi ha foʻi sikaleti ʻi he fuofua taimí ʻe lava ke taki atu ai ki ha tōʻongaʻaki ʻo e ifi tapaká ʻi he toenga ʻo e moʻuí. ʻOku ʻikai ʻaupito totonu ke tau fakafuofuahalaʻi ʻa e mahuʻinga ʻo e ngaahi fili ʻoku hā ngali maʻamaʻá.
Ko fē ʻe lava ke tau hanga ki ai ki ha tataki ʻi hono fai ʻa e ngaahi filí, naʻa mo e ngaahi fili hā ongo-maʻamaʻá? He fakafiefia moʻoni ia ke maʻu ha tokotaha faleʻi mataotao alafalalaʻanga ke ne faleʻi kitautolu ʻi he taimi ʻoku tau fehangahangai ai mo ha fili faingataʻá! ʻE lava ke ke maʻu ha tokotaha faleʻi pehē. ʻOku ʻi ha tohi motuʻa mo ha pōpoaki ki he ʻahó ni ʻa e meʻa ko ení ke ne leaʻaki: “Pea ʻe fanongo ʻe ho telinga ki ha lea mei ho tuʻa, Ko eni ʻa e hala, fou ai; ka ai haʻo afe ki toʻomataʻu, pe ka ai haʻo afe ki toʻohema.” (Aisea 30:21) Ko e ngaahi lea ʻeni ʻa hai? Pea ʻe lava fēfē ke ke fakapapauʻi ʻoku alafalalaʻanga ʻene tatakí?
Ko e fakapapauʻiʻanga ʻi ʻolungá ʻoku maʻu ia ʻi he Tohi Tapú, ʻa ia kuo ako ʻe he laui miliona pea kuo nau hoko ʻo ʻiloʻi naʻe fakamānavaʻi ia ʻe Sihova ko e ʻOtuá, ʻa e Tokotaha-Fakatupú. (2 Timote 3:16, 17) ʻOku ʻafioʻi ʻe Sihova ʻa e founga naʻe ngaohi ai kitautolú, ko ia leva ʻa e matavai lelei taha ʻo e tatakí. ʻOku lava ke ne toe tomuʻa ʻafioʻi ʻa e kahaʻú, koeʻuhi ko ia ʻa e Tokotaha ʻokú ne “tala mei he kuonga muʻa ʻa e meʻa kuo teʻeki fai; ʻo u pehe, Ko ʻeku fakakaukau ʻe tuʻu, pea ko e meʻa kotoa ʻoku ou loto ki ai, te u fai.” (Aisea 46:10) Ko e founga eni naʻe fakahaaʻi ai ʻe ha tokotaha-tohi-saame ʻa ʻene falala ki he Folofola ʻa Sihová: “Ko hoʻo folofola ko e tuhulu ki heʻeku laka, mo e maama ki hoku hala.” (Sāme 119:105) Ka, ʻoku anga-fēfē hono tokoniʻi kitautolu ʻe Sihova ke tataki hotau ʻalungá ki he haoʻangá neongo ʻa e ngaahi tahi hou ʻo e māmani ʻo e ʻaho ní? ʻE lava fēfē ke tau fai ha ngaahi fili ʻi he founga ʻa e ʻOtuá?
Ngāueʻaki ʻa e Ngaahi Tefitoʻi Moʻoni ʻa e Tohi Tapú
Naʻe ʻoange ʻe Sihova ko e ʻOtuá ki he kau Kalisitiané ʻa e ngaahi tefitoʻi moʻoni fakaʻotua koeʻuhi ke nau lava ai ʻo fai ʻa e ngaahi fili leleí. Ko hono ako ʻa e ngaahi tefitoʻi moʻoni ʻa e Tohi Tapú pea mo hono ngāueʻaki kinautolú ʻe lava ke hoko ʻo fakatatau ia ki hano ako ha lea pea ngāueʻaki iá. Ko e tuai pē hoʻo poto ʻi he leá, ʻoku faʻa lava ke ke tala ʻa e taimi ʻoku fai ai ʻe ha taha ha ngaahi fehālaaki fakaekalama koeʻuhi ko e meʻa ʻokú ne leaʻakí ʻoku ʻikai ke fuʻu ongo tonu ia. Heʻikai nai te ke malava koe ʻo tuhuʻi fakapatonu ange ʻa e meʻa tofu pē ko ia ʻoku fehālaaki ʻi he kupuʻi leá, ka ʻokú ke ʻiloʻi ʻoku hala ia. ʻI hoʻo ako ʻa e ngaahi tefitoʻi moʻoni Fakatohitapú ʻo aʻu ki he tuʻunga ko hono ʻai kinautolu ko hao kongá, ʻoku faʻa lava ke ke tala ai ʻa e taimi ʻoku ʻikai ke feʻungamālie ai ha fili papau, pe ʻikai ke fehoanakimālie mo e ngaahi tefitoʻi moʻoni fakaʻotuá.
Ko e fakatātaá, tau ʻohake ʻa e fili ʻoku fehangahangai mo ha kiʻi talavou ʻi hono fili ʻa e sitaila hono ʻulú. ʻOku ʻikai ha fekau Fakatohitapu ia ʻoku fakahalaʻi fakapatonu mai ai ha sitaila pau ʻo e ʻulú. Kae fakakaukau angé ki ha tefitoʻi moʻoni Fakatohitapu. Naʻe tohi ʻa e ʻapositolo ko Paulá: “Ko hoku loto ki he kau fefine, ke nau teuʻaki kinautolu ʻa e kofu ʻoku ngali ke ʻai, pea ō mo e angamā [pe anga-fakanānā] mo e angafakamaʻumaʻu [pe fakakaukau lelei]: ʻo ʻoua ʻe fai ʻaki ʻa e fafatu ʻo e louʻulu, pe ko e koula mo e mataʻitofe mo e kofu mahuʻinga; ka nau fai ke teungaʻia ʻi he ngaahi ngaue lelei, ʻa ia ko e meʻa ʻoku tāu mo e kau fefine ʻoku nau lavutu ke tauhi ki he ʻOtua.” (1 Timote 2:9, 10) ʻOku tohi heni ʻa Paula ʻo kau ki he kakai fefiné, ka ko e tefitoʻi moʻoní ʻoku ngāueʻaki ki he kakai tangatá mo e kakai fefiné fakatouʻosi. Ko e hā ʻa e tefitoʻi moʻoní? ʻOku totonu ke tapua atu ʻe hotau fōtunga hāmaí ʻa e anga-fakanānā mo e fakakaukau lelei. Ko ia ʻe lava ke ʻeke hifo ʻe he kiʻi talavoú kiate ia, ‘ʻE tapua atu ʻe he sitaila hoku ʻulú ʻa e anga-fakanānā ʻa ia ʻoku taau mo ha Kalisitiané?’
Pea ko e hā ʻa e tefitoʻi moʻoni ʻaonga ʻe lava ke toʻo ʻe ha kiʻi talavou mei he ngaahi lea ko ʻeni ʻa e ākonga ko Sēmisí? “ʻA e koto tono tangata, ʻikai ʻoku mou ʻilo, ko e takaua mo mamani ko e fakafili ia ki he ʻOtua? ko ia ʻilonga ʻa ia ʻoku loto ke takaua mo mamani ʻoku ne nofo ai ko e fili ʻo e ʻOtua.” (Semisi 4:4) ʻOku fakaliliʻa ʻa e kau Kalisitiané ki he fakakaukau ʻo e hoko ko ha kaumeʻa ʻo e māmaní, ʻa ia ko ha fakafili ia ki he ʻOtuá. ʻE ʻai nai ia ʻe he sīpinga sitaila ʻulu ʻoku manako ai hono toʻumeʻá ke ne hā ngali ko ha kaumeʻa ia ʻo e ʻOtuá pe ko ha kaumeʻa ʻo e māmaní? Ko e kiʻi talavou ʻoku fakakaukauloto ki he fehuʻi ʻo fekauʻaki mo e sitaila ʻulú ʻe lava ke ne ngāueʻaki ʻa e ngaahi tefitoʻi moʻoni makatuʻunga Fakatohitapu ʻi hono fai ha fili fakapotopotó. ʻIo, ʻoku tokoniʻi kitautolu ʻe he ngaahi tefitoʻi moʻoni fakaʻotuá ke tau fai ha ngaahi fili. ʻI heʻetau hoko ʻo tōʻongaʻaki hono fai ʻa e ngaahi fili ʻoku makatuʻunga ʻi he ngaahi tefitoʻi moʻoni fakaʻotuá, ʻoku hoko ʻo faingofua ange ai ke aʻu ki ha ngaahi fakamulituku fakapotopoto ʻa ia ʻoku ʻikai hano ngaahi nunuʻa fakatuʻutāmaki.
ʻE lava ke tau maʻu ʻa e ngaahi tefitoʻi moʻoni lahi ʻi he Folofola ʻa e ʻOtuá. ʻOku moʻoni, heʻikai nai te tau maʻu ha konga tohi ʻoku kaunga fakapatonu mai ki hotau tuʻungá. Ka ʻoku kei lava pē ke tau lau ʻo kau ki he anga ʻo e talangofua ʻa e kakai ʻe niʻihi ki he tataki fakaʻotuá pea mo e anga hono fakataleʻi ʻe he niʻihi kehé ʻa e ngaahi fakatokanga fakaʻotuá. (Senesi 4:6, 7, 13-16; Teutalonome 30:15-20; 1 Kolinito 10:11) Ko hono lau ʻa e ngaahi fakamatala peheé pea mo hono ʻanalaiso ʻa e ngaahi ikuʻangá, te tau ʻiloʻi ai ko e ngaahi tefitoʻi moʻoni fakaʻotuá ʻe lava ke ne tokoniʻi kitautolu ʻi hono fai ʻa e ngaahi fili ʻoku fakahōifua ki he ʻOtuá.
Ko e fakatātaá, tau ʻohake pē ha fetalanoaʻaki nounou naʻe fai ʻe Sīsū Kalaisi mo ʻene ʻapositolo ko Pitá. Ko e kau tangata ko ia naʻa nau tānaki ʻa e ongo tukuhau fakasiasí naʻa nau ʻeke ange kia Pita: “ʻOku fai ʻape ʻe hoʻomou tangataʻeiki ʻa e tukuhau fakasiasi?” Naʻe tali ange ʻe Pita: “Ko é.” Hili pē ha taimi siʻi mei ai, naʻe ʻeke ange ʻe Sīsū kia Pita: “Ko e ngāhi tuʻi ʻo mamani ʻoku nau tanaki tute mo e tukuhau meia hai? mei he faleʻalo, pe mei he kakai kehe?” ʻI he pehē ʻe Pita: “Mei he kakai kehe pe,” naʻe tala ange kiate ia ʻe Sīsū: “ʻAua, pea ta ʻoku ʻataʻata ʻa e faleʻalo. Ka ko eʻuhi ke ʻoua naʻa tau fakatukia kinautolu, ʻalu koe ki tahi, ʻo lafo ha mataʻu; pea koe ʻuluaki ika ʻe kai ke ke toʻo ʻo faʻai hono ngutu, pea te ke ʻilo ai ha foʻi sikeli: toʻo ia ʻo ʻange kiate kinautolu maʻaku mo koe.” (Mātiu 17:24-27) Ko e hā ʻa e ngaahi tefitoʻi moʻoni fakaʻotua ʻe lava ke tau maʻu ʻi he fakamatala ko ení?
ʻAki hono ʻeke ha ngaahi holongā fehuʻí, naʻe tataki ʻe Sīsū ʻa e fakaʻuhinga ʻa Pitá: ʻI hono tuʻunga ko e ʻAlo ia ʻo e ʻOtuá, naʻe ʻikai te ne totongi tukuhau. Neongo naʻe ʻikai ke ʻuluaki mahinoʻi ʻe Pita ʻa e foʻi poini ko iá, naʻe tokoniʻi anga-ʻofa ia ʻe Sīsū ke ne mahinoʻi. ʻI he fehangahangai mo ha fehālaaki ʻoku fai ʻe he niʻihi kehé, te tau fili nai, ʻi he faʻifaʻitaki kia Sīsuú, ke fakafeangai manavaʻofa kia kinautolu ʻo ʻikai ke tuhuʻi anga-fefeka ange ʻenau fehālaakí pe fakahalaiaʻi kinautolu.
Naʻe lava leva ke sio ai ʻa Pita ki he ʻuhinga ʻo hono totongi ʻa e tukuhaú—ke ʻoua ʻe fakatūkiaʻi ai ʻa e niʻihi kehé. Ko ha toe tefitoʻi moʻoni ʻeni ʻe taha ʻe lava ke tau ako mei he fakamatalá ni. Ko e fakakaukau ki he konisēnisi ʻo e niʻihi kehé ʻoku mahuʻinga ange ia ʻi he fakamatematē pē ʻi heʻetau totonú.
Ko e hā ʻokú ne ueʻi kitautolu ke tau fai ʻa e ngaahi fili ʻe fakahaaʻi ai ʻa e fakaʻapaʻapa ki he konisēnisi ʻo e niʻihi kehé? ʻOfa ki hotau kaungāʻapí. Naʻe akoʻi ʻe Sīsū Kalaisi ko e ʻofa ki hotau kaungāʻapí ʻo hangē pē ko ʻetau ʻofa kiate kitautolú ʻa e fekau ʻoku fika ua hono mahuʻingá ki he fekau ko ia ke ʻofa ki he ʻOtuá ʻaki ʻetau moʻuí kotoa. (Mātiu 22:39) Kae kehe, ʻoku tau moʻui ʻi ha māmani ʻokú ne pouaki ʻa e siokitá, pea ko ʻetau ngaahi hehema angahalaʻiá ʻoku fakahehemaʻi ai kitautolu ke tau hoko ʻo siokita. Ko ia kapau ʻoku fiemaʻu ke ʻofa ha tokotaha ki hono kaungāʻapí ʻo hangē ko ʻene ʻofa kiate iá, kuo pau ke ne fakafoʻou hono ʻatamaí.—Loma 12:2.
Kuo fai ʻe he tokolahi ʻa e ngaahi liliu pehē, pea ʻoku nau fakakaukau ki he niʻihi kehé ʻi heʻenau fai ʻenau ngaahi filí, tatau ai pē pe ʻoku mafatukituki pe ongo-maʻamaʻa. Naʻe tohi ʻa Paula: “Seuke, naʻe ui kimoutolu, kainga, ke mou tauʻataina; kae ʻoua pe ʻe ʻiku hoʻomou tauʻataina ko ha ava ki he kakano; ka ko e meʻa ʻi hoʻomou ʻofa ke mou nofo fetamaioʻeikiʻaki.” (Kaletia 5:13) ʻE lava fēfē ke tau fai pehē? Fakakaukau ki ha taʻahine naʻá ne hiki ki ha kiʻi kolo ʻuta ke tokoniʻi ʻa e kakaí ke nau ako ʻo kau ki he Folofola ʻa e ʻOtuá. ʻI heʻene talanoa ki he kakaí, naʻá ne ʻiloʻi ko hono valá, neongo naʻe fakanānā ʻi he ngaahi tuʻunga ʻo e sitaila he kolo lahí, naʻe hoko ko e meʻa ia ke talanoaʻi ʻi he kiʻi koló. Ko hono kofú mo e teuteú naʻe fakanānā, ka naʻá ne fili ke tui ʻa e ngaahi vala ko ē naʻe ʻikai ke fuʻu mataʻāʻaá “naʻa lauʻikovi ʻa e folofola ʻa e ʻOtua.”—Taitusi 2:5.
Naʻe mei fēfē haʻo tali kapau naʻá ke fehangahangai mo ha ngaahi fili ʻe niʻihi ʻo kau ki hoʻo teuteú pe ko ha meʻa kehe pē ʻo felāveʻi mo e saiʻia fakafoʻituituí? ʻE lava ke ke fakapapauʻi ʻe hōifua mai ʻa Sihova ʻi he taimi ʻe tapua atu ai ʻi hoʻo ngaahi filí ʻa e tokanga ki he konisēnisi ʻo e niʻihi kehé.
Fai ha Vakai Taimi-Lōloa
Tuku kehe ʻa e ngaahi tefitoʻi moʻoni Fakatohitapú mo e konisēnisi ʻo e niʻihi kehé, ko e hā te tau fakakaukau nai ki ai ʻi hono fai ʻa e ngaahi filí? Neongo ʻoku fetungotungaʻi mo fāsiʻi ʻa e hala ʻo e kau Kalisitiané, ʻoku ʻoange kia kinautolu ʻe he ʻOtuá ʻa e tauʻatāina lahi ʻi loto ʻi heʻene fakangatangata kuo fokotuʻú. (Mātiu 7:13, 14) ʻOku fiemaʻu ke tau fakakaukau ki he anga hono uesia ʻe heʻetau ngaahi filí ʻa hotau tuʻunga lelei fakalaumālié, fakaeʻatamaí, fakaeongó mo fakaesinó ʻi he kahaʻú.
Tau pehē naʻá ke fakakaukau ki hano tali ha ngāue. Mahalo ʻoku ʻikai ha meʻa ia ʻoku taʻetaau pe taʻefeʻunga ʻo kau ki he natula ʻo e ngāué. Te ke malava ʻo maʻu ʻa e ngaahi fakatahá mo e fakataha-lahi faka-Kalisitiané. Ko e vāhengá ʻe lahi ange ia ʻi he meʻa naʻá ke ʻamanekiná. ʻOku fakamahuʻingaʻi māʻolunga ʻaupito ʻe he pule ngāué ʻa hoʻo pōtoʻí peá ne fiemaʻu ke ne ngāueʻaki koe ki he kakato tahá. Pea ko e tahá, ʻokú ke saiʻia he faʻahinga ngāue ʻoku kau ki aí. ʻOku totonu nai ke taʻofi koe ʻe ha meʻa pē mei hoʻo tali ʻa e tuʻuakí? Kae fēfē kapau ʻokú ke tomuʻa ʻiloʻi ʻa e malava ke hoko ʻo fakafemoʻuekinaʻi kakato koe ʻe he ngāué. Naʻe tala atu eni kiate koe heʻikai fakamālohiʻi koe ke ke ngāue ʻovataimi. Ka, ke fakaʻosi ha foʻi ngāue, te ke loto-lelei ke fakamālohiʻi koe ke ke fai ʻa e meʻa lahi ange ia ʻi he meʻa ʻoku totonu ke ke faí? ʻE faʻa toutou hoko nai ʻa e ʻovataimi peheé? ʻE lava ke fakamavaheʻi koe ʻe he meʻa ko iá mei ho fāmilí pea faai atu pē mei he ngaahi ngāue fakalaumālié ʻa ia ʻoku ʻikai ʻaupito totonu ke ke tō mei aí?
Fakakaukau ki he anga hono fai ʻe Jim ha fili tefito ʻo kau ki heʻene ngāué. Naʻá ne ngāue taʻehela peá ne ʻunu hake ki ha tuʻunga māʻolunga ange ʻi ha kautaha. Naʻe faai atu pē ʻo ne hoko ko e talēkita fakalele ngāue ia ʻo ʻene kautahá ʻi he kotoa ʻo e feituʻu Hahaké, ko e ʻōfisa pule lahi ia ʻo hono vaʻa fakapisinisi ʻi he ʻIunaite Seteté pea ko ha mēmipa ia ʻo e poate ʻa e kau talēkita ʻo e kautaha ʻi ʻIulopé. Kae kehe, ʻi he taimi naʻe ʻi ai ai ha tōlalo fakaʻekonōmika ʻi Siapaní, naʻá ne ʻiloʻi ʻa e laufanō moʻoni ʻa e tuli ki he paʻangá mo e mafaí. Ko e paʻanga naʻá ne maʻu fakafou he ngāue lahi ʻaupitó naʻe pulia vave atu ia. Naʻá ne ongoʻi taumuʻavalea ʻi he moʻuí. ‘Ko e hā ʻa e meʻa te u faí hili ha taʻu ʻe hongofulu mei he taimi ní?’ ko ʻene ʻeke hifo ia kiate iá. Naʻá ne toki ʻiloʻi hake ko hono malí mo ʻene fānaú naʻa nau tokangataha ange ki he ngaahi taumuʻa mohu ʻuhinga ʻi he moʻuí. ʻI he faai mai ʻa e ngaahi taʻú, naʻa nau feohi mo e Kau Fakamoʻoni ʻa Sihová. Naʻe fiemaʻu foki ʻe Jim ke ne maʻu ʻa e fiefia mo e fiemālie naʻe maʻu ʻe hono fāmilí. Ko ia naʻá ne kamata ai ke ne ako ʻa e Tohi Tapú.
Naʻe vave ʻa e fakatokangaʻi ʻe Jim ko ʻene founga moʻuí naʻe taʻofi ai ia mei heʻene moʻuiʻaki ha moʻui mohu taumuʻa ʻi he tuʻunga ko ha Kalisitiané. ʻI heʻene fefonongaʻaki hokohoko ʻi he vahaʻa ʻo ʻĒsia, ʻIunaite Setete mo ʻIulopé, naʻe ʻikai te ne maʻu ha taimi feʻunga ke ako ai ʻa e Tohi Tapú pea feohi mo e ngaahi kaungātuí. Naʻá ne fehangahangai ai mo ha fili: ‘Te u hokohoko atu ke moʻuiʻaki ʻa e founga moʻui hangē ko ʻeku founga moʻui ʻi he taʻu ʻe 50 kuohilí, pe te u tuli ki ha founga foʻou ʻo e moʻuí?’ Naʻá ne fakakaukau faʻa lotu ki he ola taimi-lōloa ʻo ʻene filí peá ne fakapapauʻi ke taʻofi kotoa ʻene ngāué tuku kehe pē ʻa e ngāue ʻe taha te ne maʻu ai ha taimi ki he ngaahi meʻa fakalaumālié. (1 Timote 6:6-8) Ko ʻene filí naʻe ʻai ai ia ke ne fiefia ange, ʻo ʻoange ai kiate ia ʻa e faingamālie ke ne femoʻuekina ʻi he ngaahi ngāue faka-Kalisitiané.
Pe ʻoku mafatukituki pe ongo-maʻamaʻa, ʻoku mahuʻinga hoʻo ngaahi filí. Ko ha fili ʻokú ke fai he ʻahó ni ʻe ʻuhinga nai iá ko e lavameʻa pe taʻelavameʻa, naʻa mo e moʻui pe mate ʻi he kahaʻú. ʻE lava ke ke fai ha ngaahi fili fakapotopoto kapau te ke fakakaukau ki he ngaahi tefitoʻi moʻoni Fakatohitapú, ki he konisēnisi ʻo e niʻihi kehé, pea ki he uesia taimi-lōloa ʻo hoʻo ngāué. Fai ha ngaahi fili ʻi he founga ʻa e ʻOtuá.
[Fakatātā ʻi he peesi 13]
Ko e ngaahi fili ʻoku hā ngali ongo-maʻamaʻá ʻe ʻi ai nai honau ngaahi nunuʻa mafatukituki
[Fakatātā ʻi he peesi 14]
ʻE lava fēfē ke tokoniʻi ia ʻe he ngaahi tefitoʻi moʻoni Fakatohitapú ke ne fili fakapotopotó?
[Fakatātā ʻi he peesi 15]
Naʻe lea kaungāongoʻi ʻa Sīsū kia Pita