ʻOkú Ke Manatuʻi?
Kuó ke maʻu ʻaonga mei hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:
• ʻE anga-fēfē hono hanga ʻe Sīsū ʻo “fakahaofi ʻa e masiva,” ʻo hangē ko ia naʻe tomuʻa tala ʻi he Sāme 72:12?
Lolotonga ʻene pulé, ʻe ʻi ai ʻa e fakamaau totonu maʻá e tokotaha kotoa pē, ʻo ʻikai ha kākā. ʻOku faʻa hoko he taú ʻa e masiva, ka ʻe ʻomai ʻe Kalaisi ʻa e melino haohaoa. ʻOkú ne ongoʻi ʻa e kakaí pea te ne fakafāʻūtahaʻi kinautolu kotoa, pea fakapapauʻi ʻoku ʻi ai ʻa e meʻakai feʻunga ki he faʻahinga ʻo e tangatá. (Sāme 72:4-16)—5/1, peesi 7.
• ʻE lava fēfē ke tau fakahāhā ʻi he tuʻunga ko e kau Kalisitiané ʻetau lea tauʻatāina? (1 Timote 3:13; Filimone 8; Hepelu 4:16)
ʻE lava ke tau fai ia ʻaki ʻa e malanga faivelenga ki he niʻihi kehé fakataha mo e loto-toʻa, ʻaki ʻa e faiako mo hono fai vave mo ʻai ke ola lelei ʻa e akonakí, pea ʻi he lilingi atu hotau lotó ki he ʻOtuá ʻi he lotu, ʻo falala te ne fanongo mai ʻo tali.—5/15, peesi 14-16.
• ʻI he malumalu ʻo e Laó, ko e hā naʻe lau ai ha taha ʻoku “taʻemaʻa” ʻi hano fai ʻo ha ngaahi fehokotaki fakasino fakanatula ʻe niʻihi?
Ko e ngaahi lao fekauʻaki mo e taʻemaʻa naʻe tupu mei he mahua mei he tangatá ʻa e huhuʻa fakafanaú, ko e puke fakafefiné, mo e fāʻelé naʻe pouaki ai ʻa e tuʻunga haisini lelei mo ha founga moʻui lelei, fakamamafaʻi ʻa e tuʻunga toputapu ʻo e totó, pea fakahaaʻi mo e fiemaʻu ʻo e fakalelei ki he angahalá.—6/1, peesi 31.
• Kapau ʻoku loto ha taha ke fiefia, ko e hā ʻe lelei ai ke ne fakakaukau ki he tohi Sāmé?
Ko e kau faʻu ʻo e Sāmé naʻa nau ʻiloʻi ʻa e fiefia ʻoku tupu mei hono maʻu ha vahaʻangatae lelei mo e ʻOtuá. (Sāme 112:1) Naʻa nau fakamamafaʻi ʻoku ʻikai ha vā fakaetangata, ʻikai ha koloa, pea ʻikai ha lavameʻa ʻe lava ke tau maʻu ai ʻa e fiefiá ka ko ʻetau kau ko ia ki he “kakai ʻoku ʻotua ʻaki ʻa Sihova!” (Sāme 144:15)—6/15, peesi 12.
• Ko e hā ʻa e vahaʻangatae makehe mo Sihova naʻe maʻu ʻe he kau ʻIsileli ʻo e kuonga muʻá?
ʻI he 1513 K.M., naʻe fokotuʻu ʻe Sihova hano vahaʻangatae foʻou mo e kau ʻIsilelí ʻi ha fuakava. (Ekisoto 19:5, 6; 24:7) Hili iá, naʻe fanauʻi mai ai ʻa e kau ʻIsilelí ko e ngaahi mēmipa ʻo e puleʻanga fili ʻa e ʻOtuá ʻa ia naʻe fakatapui kiate ia. Neongo ia, naʻe pau ki he tokotaha tāutaha ke ne fai ha fili fakafoʻituitui ke tauhi ʻa e ʻOtuá.—7/1, peesi 21-2.
• Ko e hā ʻoku totonu ai ke tau fai ʻa e meʻa kotoa pē “ʻo taʻe ha lāunga”? (Filipai 2:14)
ʻOku fakahaaʻi ʻi he ngaahi fakatātā Fakatohitapu lahi ko e lāungá naʻá ne fakatupunga ʻa e maumau ʻi he lotolotonga ʻo e kakai ʻa e ʻOtuá. ʻOku lelei ke tau fakakaukau fakamātoato fekauʻaki mo e tākiekina fakatupu maumau ʻoku lava ke ne ʻai ʻo hoko he ʻaho ní. Ko e faʻahinga taʻehaohaoa ʻo e tangatá ʻoku nau hehema ke lāunga, pea ʻoku totonu ke tau tokanga ke ʻiloʻi ha faʻahinga fakaʻilonga pē ʻo e meʻá ni pea fakaʻehiʻehi mei ai.—7/15, peesi 16-17.
• ʻOku anga-fēfē ʻetau ʻiloʻi ko e poto ʻoku fakamatalaʻi ʻi he Palovepi 8:22-31 ʻoku ʻikai ko e poto anga-mahení ia?
Ko e poto ko iá naʻe “maʻu” pe fakatupu, ko e kamata ia ʻo e founga ʻa Sihová. Kuo ʻi ai mo poto maʻu pē ʻa e ʻOtuá ia; naʻe ʻikai fakatupu ʻa ʻene potó. Ko e poto ʻi he Palovepi 8:22-31 naʻá ne ʻi he tafaʻaki ʻo e ʻOtuá ko ha “tufunga lahi,” ʻa ia ʻoku ʻuhinga ia ki he meʻamoʻui laumālie naʻe hoko ko Sīsuú pea naʻá ne ngāue vāofi mo e ʻOtuá ʻi he fakatupú. (Kolose 1:17; Fakahā 3:14)—8/1, peesi 31.