“ʻOku Totonu Pe ke Fai ki he Pule ʻa e ʻOtua ʻi he Pule ʻa e Tangata”

‘ʻE ʻIkai Tuku ʻEmau Lea Fekauʻaki mo Sīsuú’

KO E taʻú ko e 33 T.S., pea ko e feituʻú ko e fale hopo molumalu ʻo e fakamaauʻanga fakapuleʻanga ʻo e kau Siú ʻi Selusalemá. ʻI he fokotuʻutuʻu ko ení, ko e teu eni ke fakamāuʻi ʻe he Sanetalimí ʻa e toko 12 ʻo e kau muimui ʻo Sīsū Kalaisí. Ko e hā hono ʻuhingá? Koeʻuhí ko ʻenau malanga ʻo fekauʻaki mo Sīsuú. Ko hono tuʻo ua ʻaki ia ʻo e tuʻu ʻa e ʻapositolo ko Pita mo Sioné ʻi he ʻao ʻo e fakamaauʻangá. Ko e ʻuluaki hopo eni ʻa e kau ʻapositolo kehé.

ʻOku lea fakahangatonu ʻa e taulaʻeiki lahí ki he kau ʻapositolo ʻe toko 12 ʻo fekauʻaki mo e tuʻutuʻuni naʻe fai ʻe he fakamaauʻangá ʻi ha taimi ʻe taha ki muʻa. ʻI he taimi ko iá, ʻi hono fekauʻi ke tuku ʻena akoʻaki ʻa Sīsuú, naʻe tali ai ʻe he ʻapositolo ko Pita mo Sioné: “Ko e fē ʻoku totonu ʻi he finangalo ʻo e ʻOtua, ʻa ʻema talangofua kiate kimoutolu, pe ki he ʻEne ʻAfio. He ʻe ʻikai te ma faʻa tuku ʻema lea ki he ngaahi meʻa naʻa ma sio ki ai mo fanongoa.” Hili ʻa e lotu ke maʻu ha loto-toʻá, naʻe hokohoko atu hono fanongonongo ʻe he kau ākonga ʻa Sīsuú ʻa e ongoongo leleí.—Ngāue 4:​18-31.

ʻI he lāuʻilo naʻe taʻeʻaonga ʻa ʻene ngaahi fakamanamana ki muʻá, naʻe fakahaaʻi ʻe he taulaʻeiki lahí ʻi he hopo hono ua ko ení: “Naʻa mau matuʻaki fekau kiate kimoutolu ke ʻoua te mou akoʻaki ʻa e hingoa ni, pea ko eni kuo mou fakafonu ʻa Selusalema ʻaki hoʻomou akonaki, pea ʻoku mou fai ke fakahinga mai kiate kimautolu ʻa e mate ʻo e tangata ko ia.”—Ngāue 5:28.

Fakapapauʻi Mālohi

ʻI he tali loto-toʻá, naʻe tali ʻa Pita mo e kau ʻapositoló, ʻo nau pehē: “ʻOku totonu pe ke fai ki he pule ʻa e ʻOtua ʻi he pule ʻa e tangata.” (Ngāue 5:29) Ko e moʻoni, ʻi he ʻikai talangofua ki he tangatá pē, kuo pau ke tau talangofua kia Sihova ʻi he taimi ʻoku fepaki ai ʻa e ngaahi meʻa ʻoku fiemaʻu ʻe he tangatá mo ʻene ngaahi fekaú.a

Ko e ngaahi lea ʻa e kau ʻapositoló ʻi hono fakapapauʻi ʻenau tukupā ki he ʻOtuá naʻe totonu ke maongo ia ki he kau mēmipa ʻo e Sanetalimí. Kapau naʻe ʻeke kia kinautolu ʻo fekauʻaki mo e talangofua ki he ʻOtuá, ko e kau taki ko eni ʻo e sōsaieti faka-Siú naʻe totonu ke nau tali taʻetoeveiveiua: “Talangofua ki he ʻOtuá.” He ko ē, ʻikai ʻoku nau tui ko e ʻOtuá ʻa e ʻEiki Hau ʻo e ʻunivēsí?

ʻI he ngalingali naʻá ne fakafofongaʻi ʻa e kotoa ʻo e kau ʻapositoló, ʻoku fakahaaʻi ʻe Pita te nau talangofua ki he pule ʻa e ʻOtuá ʻi he pule ʻa e tangatá ʻi he ngaahi meʻa fekauʻaki mo ʻenau ngāue fakafaifekaú. Ko ia ai, ʻokú ne fakataʻeʻaongaʻi ʻa e tukuakiʻi fekauʻaki mo e kau ʻapositoló ʻo pehē tokua naʻa nau talangataʻá. Mei he hisitōlia ʻo honau puleʻangá tonu, ko e kau mēmipa ʻo e Sanetalimí ʻoku nau ʻiloʻi ʻoku ʻi ai ʻa e ngaahi taimi ʻoku mahino lelei ai ʻa e totonu ke nau talangofua ki he ʻOtuá kae ʻikai ki he tangatá. Naʻe manavahē ha ongo māʻuli ʻi ʻIsipite ki he ʻOtuá, ʻo ʻikai kia Felo, ʻi heʻena fakahaofi moʻui ʻa e fānau tangata naʻe fāʻeleʻi ʻe he kakai fefine Hepeluú. (Ekisoto 1:​15-​17) Naʻe talangofua ʻa Tuʻi Hesekaia kia Sihova, ʻo ʻikai kia Tuʻi Senakalipe, ʻi hono fakamālohiʻi ke ne tukuloló. (2 Tuʻi 19:​14-​37) Ko e Ngaahi Konga Tohi Tapu Faka-Hepeluú, ʻa ia ʻoku maheni mo e kau mēmipa ʻo e Sanetalimí, ʻoku fakamamafaʻi ai ʻoku ʻamanekina ʻe Sihova ʻa hono kakaí ke nau talangofua kiate ia.​—1 Samiuela 15:​22, 23.

Fakapaleʻi ʻa e Talangofuá

ʻOku hā mahino naʻe uesia ʻi ha tuʻunga ʻa e mēmipa ʻe taha ʻo e fakamaauʻanga māʻolungá ʻi he ngaahi lea, “ʻoku totonu pe ke fai ki he pule ʻa e ʻOtua ʻi he pule ʻa e tangata.” Ko Kāmelieli, ko ha fakamaau naʻe hakeakiʻi māʻolunga ʻi he Sanetalimí, ʻokú ne fakalotoʻi ʻa e fakamaauʻangá ke nau fanongo ki heʻene faleʻi fakapotopoto ʻa ia naʻe fakahoko ʻi ha fakataha fakaekinautolu pē. ʻI heʻene lave ki he ngaahi fakatātā he kuohilí, ʻoku fakahaaʻi ai ʻe Kāmelieli ʻoku taʻefakapotopoto ke kaunoaʻia ʻi he ngāue ʻa e kau ʻapositoló. ʻOkú ne fakaʻosiʻaki ʻene pehē: “Tuʻu ʻatā mo e kau tangata ni, pea tuku ai pe ā kinautolu: . . . kaeʻumaʻā foki naʻa ʻiloange ʻoku mou tauʻi ʻa e ʻOtua.”—Ngāue 5:​34-​39.

Ko e ngaahi lea fakapotopoto ʻa Kāmelielí ʻoku fakalotoʻi ai ʻa e fakamaauʻanga māʻolungá ke tukuange ʻa e kau ʻapositoló. Neongo ʻoku haha kinautolu, ʻoku halaʻatā ha teitei manavahē ʻa e kau ʻapositoló ʻi he meʻa ko eni ʻoku hokó. ʻI hono kehé, ʻoku pehē ʻe he fakamatala ʻa e Tohi Tapú: “Nae ikai tuku e nau ako moe nau malaga aki a Jisu Kalaisi, i he aho kotoabe, i he fale lotu lahi, bea moe fale kotoabe.”—Ngāue 5:​42, PM.

He faitāpuekina moʻoni ē ko e kau ʻapositoló ʻi heʻenau fakapapauʻi mālohi ko e mafai ʻo e ʻOtuá ʻoku aoniú! Ko e kau Kalisitiane moʻoni he ʻaho ní ʻoku nau maʻu ʻa e fakakaukau tatau. ʻOku hokohoko atu ʻa e hanga ʻa e Kau Fakamoʻoni ʻa Sihová kia Sihova ko honau Pule Aoniú. Kapau naʻe fekauʻi ke nau ngāue ʻo fepaki mo e ngaahi fakahinohino ʻa e ʻOtuá, ʻoku nau tali ʻo hangē ko e tali ʻa e kau ʻapositoló: “ʻOku totonu pe ke fai ki he pule ʻa e ʻOtua ʻi he pule ʻa e tangata.”

[Fakamatala ʻi lalo]

[Puha/Fakatātā ʻi he peesi 9]

KUÓ KE FIFILI ʻI HA TAIMI?

Naʻe anga-fēfē hono maʻu ʻe he tokotaha-tohi Tohi Tapu ko Luké ʻa e fakahinohino fekauʻaki mo e fakamatala ʻa Kāmelieli naʻe fai ʻi ha fakataha fakaekinautolu pē ʻa e Sanetalimí? Ko e ngaahi lea ʻa Kāmelielí naʻe fakahaaʻi nai ia kia Luke fakafou ʻi hano fakamānavaʻi fakaʻotua. Mahalo pē ko Paula (ko ha taha ia ʻo e kau ako ki muʻa ʻa Kāmelielí) naʻá ne fakahaaʻi kia Luke ʻa e lea ʻa Kāmelielí. Pe naʻe maʻu fakamatala nai ʻa Luke mei ha mēmipa ʻo e fakamaauʻanga māʻolungá naʻe fakakaukau tatau mo e kau ʻapositoló.