Ko ʻEne Fiefiá Naʻe ʻi he Lao ʻa Sihová

KO Albert D. Schroeder, ko ha mēmipa ʻo e Kulupu Pule ʻo e Kau Fakamoʻoni ʻa Sihová, naʻá ne lavaʻi ʻa hono ʻalunga fakaemāmaní ʻi he Pulelulu, ʻaho 8 ʻo Maʻasi 2006. Naʻá ne taʻu 94 pea naʻá ne fakamoleki ʻa e taʻu laka hake he 73 ʻi he ngāue fakafaifekau taimi-kakató.

Naʻe fāʻeleʻi ʻa Tokoua Schroeder ʻi Saginaw, Michigan, U.S.A, ʻi he 1911.a ʻI heʻene kei siʻí, naʻá ne ako lahi ʻo kau ki he Tohi Tapú mei heʻene kui fefiné, ʻa ia naʻá ne toe uhuʻi ʻiate ia ha manako ki hono lau ʻa e Folofola ʻa Sihová. Naʻá ne ako ʻa e lea faka-Latiná, lea faka-Siamané mo e ngāue fakaʻuhilá ʻi he ʻUnivēsiti Michigan. Kae kehe, ʻi he tupulaki ʻene houngaʻia ki he Tohi Tapú, naʻá ne taʻofi ʻene ako fakaʻatamaí ka ne fai ʻa e ngāue fakamalanga taimi-kakato ʻo e Puleʻangá. ʻI he 1932 naʻá ne hoko ai ko ha mēmipa ʻo e fāmili Pēteli ʻi Brooklyn, Niu ʻIoké.

ʻI he 1937, ʻi hono taʻu 26, naʻe fakanofo ai ʻa Tokoua Schroeder ke ne tokangaʻi ʻa e ngāue ʻa e Kau Fakamoʻoni ʻa Sihová ʻi Pilitāniá. Ko ʻene faivelenga ki he ngāue fakamalangá naʻe fakalototoʻaʻi ai ʻa e tokolahi ʻi aí ke nau fai ʻa e ngāue taimi-kakató. Ko ha kiʻi talavou ʻe taha ʻa ia naʻá ne feohi mo ia ʻi he Pēteli Lonitoní ko John E. Barr. Naʻá na ngāue fakataha ki mui ʻi he ngaahi taʻu lahi ʻi he Kulupu Pulé.

Ko e ngāue ʻa Tokoua Schroeder maʻá e Kau Fakamoʻoni ʻa Sihová naʻe ʻikai ke taʻefakatokangaʻi ia lolotonga ʻa e ngaahi taʻu ʻo e taú. ʻI ʻAokosi 1942 naʻe tipooti ai ia mei Pilitānia. Hili ha folau faingataʻa lolotonga ʻa e taú ʻi he ʻŌseni ʻAtalanitikí, naʻá ne tūʻuta ai ki Brooklyn ʻi Sepitema.

ʻI he taimi ko iá, naʻe ʻosi fakatuʻotuʻa atu ʻa e kau sevāniti ia ʻa Sihová ki ha fuʻu ngāue lahi ʻe fiemaʻu ke fakahoko hili ʻa e Tau II ʻa Māmaní. Naʻe ʻohovale ʻa Tokoua Schroeder peá ne fiefia ʻi hono maʻu ʻene vāhenga-ngāue hono hokó—ko e tokoni ki hono faʻu ʻa e lēsoni ki he Akoʻanga Tohi Tapu Taua Leʻo ko Kiliatí. Naʻá ne ngāue ai ko ha faiako ʻi ha ngaahi taʻu, ʻo ne tokoni ki hono akoʻi ʻa e kau misinalé. Ko e kau ako naʻá ne akoʻi ʻi Kiliatí pea ki mui ai ʻi he Akoʻanga Fakafaifekau ʻo e Puleʻangá ʻoku nau kei manatu ʻofa pē ki heʻene ngaahi kalasí. Naʻá ne fiefia ʻi hono fakahūhū ʻa e ʻofa ki he ngaahi lao ʻa e ʻOtuá ki heʻene fānau akó peá ne fakamamafaʻi ʻa e mahuʻinga ʻo e hoko ʻo ʻiloʻi ʻa Sihová.

ʻI he 1956, naʻe mali ai ʻa Tokoua Schroeder mo Charlotte Bowin, pea ʻi he 1958, naʻe fāʻeleʻi ai hona fohá, ʻa Judah Ben. Ko Tokoua Schroeder ko ha husepāniti mo e tamai Kalisitiane lelei ia. ʻI he 1974, naʻe kamata ai ke ne ngāue ʻi he Kulupu Pulé, ʻa ia naʻe fakahoungaʻi lahi ai ʻene ʻiló. Ko ha tangata anga-lelei mo anga-fakatōkilalo ia, kae hiliō he meʻa kotoa, naʻá ne holi ke hakeakiʻi ʻa e huafa lahi ʻo e ʻOtuá. ʻOku tau falala-pau kuo maʻu ʻe Tokoua Schroeder ʻene pale fakahēvani ʻi hono tuʻunga ko ha Kalisitiane pani ʻa ia naʻá ne fiefia moʻoni ‘ʻi he Lao ʻa Sihová.’—Sāme 1:2.

[Fakamatala ʻi lalo]