Kaukau Fakaeouau Faka-Siú—Ko ha Fakamelomelo Ia ʻo e Papitaisó?

NAʻE malangaʻi ʻe Sione Papitaiso ʻa e “papitaiso fakatomala.” Naʻe fekauʻi foki ʻe Sīsū hono kau muimuí ke nau ngaohi-ākonga pea ke papitaiso kinautolu.—Maake 1:4; Mātiu 28:19.

ʻOku fakahaaʻi ʻe he Tohi Tapú ko e papitaiso faka-Kalisitiané ʻoku fiemaʻu ki ai ʻa e fakauku kakato ʻi he vaí. ʻOku taukaveʻi ʻe he tohi ko e Jesus and His World: “Naʻe lava ke fai ʻa e ngaahi ouau meimei tatau ʻi he ngaahi lotu lahi, ʻi he kuohilí mo e lolotongá ni, ʻi he ngaahi fonua kehekehe mo e ngaahi anga fakafonua kehekehe.” ʻOku taukaveʻi ʻe he tohí ʻo pehē “ko e ngaahi tupuʻanga ʻo e papitaiso faka-Kalisitiané . . . naʻe kamata ia ʻi he lotu faka-Siú.” ʻOku totonu fēfē ʻa e taukaveʻi ko ení?

Vai Kaukau Fakaeouau Faka-Siu

Ko e kau keli fakatotolo ne nau keli ofi atu ʻi he Tuʻuʻanga Temipale ʻi Selusalemá ne nau ʻiloʻi ai ʻa e ngaahi kaukauʻanga pe ngaahi vai kaukau fakaeouau ofi he 100, mei he ʻuluaki senituli K.M. mo e ʻuluaki senituli T.S. Ko ha tā tongitongi ʻi he sinakoké mei he senituli hono ua mo hono tolu T.S., ʻoku fakamatalaʻi ai naʻe ala maʻu ʻa e ngaahi kaukauʻanga pehē ki he “kau ʻaʻahi naʻa nau fiemaʻu iá.” Kuo maʻu mo e ngaahi vai kaukau kehe ʻi he konga ʻo Selusalema ʻa ia naʻe nofoʻi ʻe he ngaahi fāmili tuʻumālie mo ʻi he tuʻunga taulaʻeikí; naʻe meimei maʻu ʻe he ʻapi kotoa pē ʻa e kaukauʻanga fakaeouau pē ʻanautolu.

Ko e ngaahi kaukauʻangá ko e ngaahi tangikē tapafā lōloa naʻe tongi mei he maká pe keli ʻi he kelekelé ʻo fakaʻotuʻotuʻaki ʻa e piliki pe ko e maka. Naʻe palasitaaʻi ia ke taʻofi ʻene mamá. Ko e lahi taha ʻo e ngaahi kaukauʻangá naʻe fakafuofua hono lōloá ki he mita ʻe 2.7 pea ko hono māukupú naʻe mita ʻe 1.8. Naʻe fakatafe ʻi he ngaahi takinga vai ʻa e vai ʻuhá ki he ngaahi tangikeé. Ko e vaí naʻe ʻikai toe siʻi hifo hono lolotó ʻi he mita ʻe 1.2, koeʻuhi ke malava ʻo fakauku kakato ai ha tokotaha ʻi heʻene tuloló. Ko e ngaahi sitepu ki he vaí naʻe vaheʻi ia ʻi he taimi ʻe niʻihi ʻaki ha ʻā maka māʻulalo. ʻOku pehē naʻe ngāueʻaki ʻa e tafaʻaki ʻe taha ʻo e ngaahi sitepú ke hū ai ki he kaukauʻanga fakamaʻá, ʻi he taimi naʻe taʻemaʻa ai ʻa e tokotaha kaukaú, pea ko e tafaʻaki leva ʻe tahá ke hū ai ki tuʻa, ke taʻofi hano ʻuliʻi ʻa e vaí.

Naʻe ngāueʻaki ʻa e ngaahi kaukauʻangá ki he fakamaʻa fakaeouau faka-Siú. Ko e hā naʻe kau ʻi he meʻá ni?

Ko e Lao mo e Talatukufakaholo ʻo e Kaukaú

Naʻe fakamamafaʻi ʻi he Lao ʻa Mōsesé ʻa e fiemaʻu ki he kakai ʻa e ʻOtuá ke nau maʻa, fakatouʻosi ʻi he fakalaumālie mo e fakaesino. Naʻe maʻu ʻe he kau ʻIsilelí ha faʻahinga kehekehe ʻo e taʻemaʻá ʻa ia naʻe pau ke fakamaʻa kinautolu ʻaki ʻenau kaukau pea fō honau valá.—Livitiko 11:28; 14:​1-9; 15:​1-31; Teutalonome 23:​10, 11.

ʻOku maʻa mo māʻoniʻoni fakaʻaufuli ʻa Sihova ko e ʻOtuá. Ko ia naʻe fiemaʻu ʻa e kau taulaʻeikí mo e kau Līvaí ke fufulu honau nimá mo honau vaʻé ki muʻa ke nau fakaofiofi ki he ʻōlitá telia naʻa nau mate.—Ekisoto 30:​17-21.

ʻOku tui ʻa e kau mataotaó ʻi he aʻu mai ki he ʻuluaki senituli T.S., naʻe fakakau ai ʻe he fokotuʻutuʻu lotu faka-Siú ʻa e faʻahinga ʻoku ʻikai ko ha Līvaí ki he ngaahi fiemaʻu ki he fakamaʻa fakataulaʻeikí. Ko e kau ʻĪsiní mo e kau Fālesí naʻa nau faʻa fai ʻa e ngaahi kaukau fakaeouaú. ʻOku pehē ʻe ha maʻuʻanga fakamatala ʻe taha ʻo kau ki he taimi ʻo Sīsuú: “Naʻe fiemaʻu ʻa e fakamaʻa fakaeouaú ia ki ha Siu ki muʻa ke ne hū ki he Tuʻuʻanga Temipalé, ki muʻa ke ne fai ha feilaulau, ki muʻa ke ne maʻu ʻaonga mei ha feilaulau fakataulaʻeiki pea ki ha ngaahi taumuʻa kehe meimei tatau.” ʻOku pehē ʻi he ngaahi konga tohi Talamatá ko e faʻahinga naʻe kaukaú naʻe ʻamanekina ke fakauku kakato kinautolu.

Naʻe fakaangaʻi ʻe Sīsū ʻa e kau Fālesí ʻi heʻenau vilitaki ke fai e fakamaʻa fakaeouaú. ʻOku hā mahino naʻa nau tōʻongaʻaki ʻa e “ngaahi papitaiso kehekehe” ʻo kau ai ʻa e papitaiso ki he “ngaahi ipu, mo e ngaahi meʻafua, mo e ngaahi ipu kava.” Naʻe pehē ʻe Sīsū ko e kau Fālesí ne nau lākahala mei he ngaahi tuʻutuʻuni ʻa e ʻOtuá koeʻuhi ke fokotuʻu ʻenau ngaahi talatukufakaholo pē ʻanautolú. (Hepelu 9:10; Maake 7:​1-9; Livitiko 11:​32, 33; Luke 11:​38-42) ʻOku ʻikai ha konga ʻo e Lao ʻa Mōsesé naʻe fiemaʻu ai hano fakauku kakato ʻo e sinó.

Naʻe tupu nai ʻa e papitaiso faka-Kalisitiané mei he kaukau fakaeouau naʻe fai ʻe he kau Siú? ʻIkai!

Kaukau Fakaeouaú mo e Papitaiso Faka-Kalisitiané

Naʻe fai ʻe he kau Siú ha ngaahi ouau fakamaʻa kia kinautolu. Kae kehe, ko e papitaiso naʻe fai ʻe Sioné, naʻe ʻikai ko ha faʻahinga kaukau fakaeouau ia naʻe anga-maheni ki ai ʻa e kau Siú. ʻI he hoko ko ia ʻa Sione ʻo ʻiloa ko e tokotaha Faipapitaisó, ʻoku fakahaaʻi ai naʻe kehe ʻa e fakauku ia naʻá ne faí. Naʻe aʻu ʻo fekauʻi ʻe he kau taki lotu Siú ha kau fakafofonga kiate ia ke ʻeke ange: “Ko e hā ʻoku ke fai papitaiso ai?”—Sione 1:25.

Ko e fakamaʻa naʻe fiemaʻu ʻe he Lao ʻa Mōsesé naʻe pau ke toutou fai ia ʻi he taimi naʻe hoko ai ha tokotaha lotu ʻo taʻemaʻa. Naʻe ʻikai ke fiemaʻu eni ia ʻi he papitaiso naʻe fai ʻe Sioné pe ko ia naʻe fai ki mui ʻe he kau Kalisitiané. Naʻe fakahaaʻi ʻi he papitaiso ʻa Sioné ʻa e fakatomala mo hano fakataleʻi ha ʻalunga moʻui ki muʻa. Ko e papitaiso faka-Kalisitiané naʻe fakaʻilongaʻi ai ʻa e moʻoniʻi meʻa ko ia kuo fakatapui ha tokotaha ki he ʻOtuá. Naʻe fai tuʻo taha ia ʻe he Kalisitiané, kae ʻikai ke toutou fai.

Ko e kaukau fakaeouau ʻa ia naʻe fai ʻi he ngaahi ʻapi ʻo e kau taulaʻeiki Siú pea ʻi he ngaahi kaukauʻanga fakapuleʻanga naʻe ofi ki he Tuʻuʻanga Temipalé naʻe fakahaaʻi mai pē ai ha founga meimei tatau mo e papitaiso faka-Kalisitiané. Ko e ʻuhinga taki taha ʻo e ongo fakauku ko ení naʻe kehekehe ʻaupito ia. ʻOku fakamatala ʻa e Anchor Bible Dictionary: “ʻOku ʻi ai ha felotoi fakalūkufua ʻi he kau mataotaó ʻo pehē, naʻe ʻikai ke hoko atu pe toe feliliuaki ʻe Sione [Papitaiso] ha papitaiso makehe mei hono ʻātakaí,” ʻa ia ko e lotu faka-Siú. ʻE lava ke leaʻaki ʻa e meʻa tatau ki he papitaiso naʻe fai ʻe he fakatahaʻanga Kalisitiané.

ʻOku fakafofongaʻi ʻe he papitaiso faka-Kalisitiané ʻa e ‘kumi ha konisenisi ʻataʻatā ki he ʻOtuá.’ (1 Pita 3:21) ʻOku fakaʻilongaʻi ai ha tokotaha kuó ne fakatapui kakato ke tauhi kia Sihova ko ha ākonga ʻa Hono ʻAló. Ko e fakauku kakato ʻi he vaí ko ha fakaʻilonga feʻungamālie ia ʻo ha fakatapui pehē. Ko e fakauku ko ia ha tokotaha ʻi he vaí ʻoku fakafofongaʻi ai ʻene mate mei heʻene ʻalunga moʻui ki muʻá. Ko hono fokotuʻu hake ia mei he vaí ʻoku fakaʻilongaʻi ai ʻene toe moʻui hake ke fai ʻa e finangalo ʻo e ʻOtuá.

ʻOku ʻoange ʻe Sihova ko e ʻOtuá ha konisēnisi lelei ki he faʻahinga ʻoku nau fai ha fakatapui pehē pea nau papitaisó. Ko ia ai, naʻe malava ʻe he ʻapositolo fakamānavaʻi ko Pitá ke ne tala ki hono kaungātuí: “[Ko e papitaisó] ʻoku ne fakamoʻui ʻa kimoutolu foki ʻi onopōni.” Ko e meʻa ia heʻikai faifai ange pea lava ke aʻusia ʻe ha faʻahinga kaukau fakaeouau pē ʻa e kau Siú.