Ko e Lea Moʻoní—Ke ʻAmanekina Pē mei he Niʻihi Kehé?
“ʻOKU ou fehiʻa ʻi he loí, pea ʻoku ou fehiʻa ke lohiakiʻi au!” ko e kalanga ia ʻa ha taʻahine taʻu 16. Ko e tokolahi taha ʻo kitautolú ʻoku tau ongoʻi tatau. ʻOku tau saiʻia ke fakakaukau atu ko e fakamatala ʻoku fai mai kia kitautolú—ʻi he lea pe ʻi ha pepa—ʻoku moʻoni. ʻOku tau tala ʻa e moʻoní ʻi he taimi ʻoku tau ʻoatu ai ha fakamatala ki he niʻihi kehé?
ʻI ha savea naʻe fakahoko ʻi Siamane, ko e fuʻu tokolahi ʻo e faʻahinga naʻa nau kau ki aí naʻa nau ongoʻi ko e “loi ʻi he fanga kiʻi alea iiki koeʻuhi ke maluʻi ai kita pe ke maluʻi ai ʻa e niʻihi kehé mei he maumaú ʻoku lava pē ke fakangofua ia, ʻio, pea aʻu ʻo fiemaʻu, koeʻuhi ke lelei ai e vā ʻo e kakaí.” Pea naʻe tohi ʻe ha faiongoongo ʻe taha: “Ke tala ʻa e moʻoní pea ko e moʻoní pē ʻi he taimi kotoa pē ko ha fakakaukau fakaʻeiʻeiki ia ka ʻoku fakapipiko.”
ʻE lava ke pehē ʻoku tau saiʻia ke lea moʻoni ʻa e kakai kehé ka ʻi he taimi tatau ʻoku tau ongoʻi ʻoku ʻi ai ʻa e ʻuhinga lelei he taimi ʻe niʻihi ke ʻikai ai te tau lea moʻoni kitautolu? ʻOku mahuʻinga pe ʻoku tau tala ʻa e moʻoní pe ʻikai? Ko e hā e ngaahi nunuʻa ʻo e leaʻaki ʻa e meʻa ʻoku ʻikai moʻoní?
Maumau ʻOku Hoko ʻi he Leaʻaki e Meʻa ʻIkai Moʻoní
Fakakaukau ki he maumau ʻe lava ke hoko ʻi he leaʻaki e meʻa ʻoku ʻikai moʻoní. Ko e loí ʻokú ne fakatupunga ʻa e taʻefefalalaʻaki ʻi he vahaʻa ʻo e ngaahi hoa malí pea ʻi he lotolotonga ʻo e ngaahi mēmipa ʻi he fāmilí. Ko e lau taʻeʻiai hano moʻoní ʻe lava ke maumauʻi ai ʻa e ongoongo ʻo ha taha. Ko e kākā ʻa e kau ngāué ʻoku ʻalu ai ki ʻolunga ʻa e ngaahi fakamole ʻi hono fakalele ʻo e ngāué pea iku ai ki he mamafa ange ʻa e ngaahi koloá. Ko e fakamatala loi ʻi he totongi fakafoki ʻo e tukuhaú ʻoku kaihaʻasi ai mei he puleʻangá ʻa e paʻanga hū mai naʻe fiemaʻu ke ʻave ki he ngaahi ngāue tokoni maʻá e kakaí. Ko e fakamatala loi ʻa e kau fakatotoló ʻoku maumauʻi ai ʻa e ngaahi ngāue ngali lavameʻá pea fakameleʻi ai e ongoongo ʻo e ngaahi kautaha ʻoku fakaʻapaʻapaʻí. Ko e ngaahi founga fakatupu paʻanga vave taʻefaitotonú ʻokú ne toʻo mei he kau ʻinivesi kākaaʻingofuá ʻa ʻenau paʻanga naʻe tānakí pe ko e ngaahi nunuʻa kovi ange. Tā neʻineʻi ke tala mai ʻe he Tohi Tapú ʻoku ʻi he lotolotonga ʻo e ngaahi meʻa ʻa ia ʻoku fakalielia kia Sihova ko e ʻOtuá ʻa e “ʻelelo loi” mo e “fakamoʻoni kākā ʻoku hoʻaki loi”!—Palovepi 6:16-19.
Ko e loi ʻoku mafolalahiá ʻoku lava ke ne fakatupunga ʻa e maumau, fakatouʻosi ki he faʻahinga tāutahá pea ki he sōsaietí fakakātoa. Ko e tokosiʻi pē te nau fakakikihiʻi ʻa e moʻoniʻi meʻa ko iá. Ko e hā leva ʻoku tala ʻosi fakakaukauʻi ai ʻe he kakaí ʻa e meʻa ʻoku ʻikai moʻoní? Pea ko e leaʻaki kotoa pē ʻo e meʻa ʻoku ʻikai moʻoní ko ha loi ia? Te tau lāulea ki he tali ki he ongo fehuʻí ni mo e ngaahi fehuʻi kehe ʻi he kupu hoko maí.
[Fakatātā ʻi he peesi 3]
Ko e loí ʻokú ne fakatupunga ʻa e taʻefefalalaʻaki ʻi he vahaʻa ʻo e ngaahi hoa malí