ʻOfa ʻa e ʻOtuá Hā Ia ʻi he ʻOfa ʻa ha Faʻē

“ʻE mangalo koā ʻi ha finemotuʻa ʻene tamasiʻi kei huhu, ke ʻoua te ne fakaʻatuʻi ʻa e tama ʻa hono manava? Talaatu, ka ne mangalo ʻa e faʻahinga ko ia, kae ʻikai mangalo koe ʻiate au.”—AISEA 49:15.

ʻOKU tokoto fiemālie ha kiʻi pēpē toki fāʻeleʻi ʻi he nima ʻo ʻene faʻeé ʻi heʻene fakahuhu iá. Ko e tuʻunga ia ʻo e fakaalaala mo e ʻofa. “ʻI heʻeku ʻuluaki fua ʻa ʻeku pēpeé,” ko e lau ia ʻa ha faʻē ko Pam, “naʻá ku ongoʻi ʻa e ʻofa lahi fakaʻulia mo e ongoʻi ʻoku ʻi ai hoku fatongia ke fai ki he kiʻi moʻui foʻou ko ení.”

ʻOku hā mahino ko ha foʻi moʻoni ia, ka kuo fakapapauʻi ʻe he fakatotoló ko e ʻofa lahi ʻa ha faʻē ʻoku tākiekina lahi ai ʻa e tupu ʻa ʻene pēpeé. Ko ha pepa naʻe pulusi ʻe he Polokalama ʻa e Kautaha Moʻui ʻa Māmaní ki he Moʻui Lelei Fakaʻatamaí ʻoku pehē ai: “Kuo fakahaaʻi ʻi he ngaahi fakatotoló ko e fanga kiʻi valevale kuo liʻaki pea fakamavaheʻi mei heʻenau faʻeé ʻoku nau hoko ai ʻo taʻefiefia mo loto-mafasia, ʻo aʻu ʻi he taimi ʻe niʻihi ki he tuʻunga ʻo e ilifia lahi.” ʻOku lave ʻi he pepa tatau ki ha fakatotolo naʻe fakahaaʻi ai ko e fānau ʻoku ʻofaʻi mo tokangaʻi kinautolu mei he kei siʻí ʻoku ngalingali te nau maʻu ʻa e tuʻunga fakaʻatamai lelei lahi ange ʻi he fānau ʻoku liʻakí.

Fekauʻaki mo e mahuʻinga ʻo e ʻofa ʻa ha faʻē, ʻoku pehē ʻe Alan Schore, ko ha palōfesa ki he uesia fakaʻatamaí ʻi he Akoʻanga Faitoʻo UCLA ʻi ʻAmeliká: “Ko e ʻuluaki vahaʻangatae ʻo e kiʻi tamá, ʻa ē mo e faʻeé, ʻoku ngāue ia ko ha sīpinga, ʻi heʻene fakafuo tuʻuloa ʻa e ngaahi malava ʻa e tokotahá ke ne fakatupulekina ʻamui ange ʻa e kotoa ʻo haʻane ngaahi vahaʻangatae fakaeongo.”

Ko e meʻa fakamamahí, ʻoku fakatupunga nai ʻe he loto-mafasiá, puké, pe ngaahi tenge kehe ha faʻē ke ne liʻaki ʻa ʻene tamá pe aʻu ʻo ‘mangalo ʻa ʻene tamasiʻi kei huhú.’ (Aisea 49:15) Ka ʻoku ʻikai angamaheniʻaki ʻa e meʻa ko iá. Ko hono moʻoní, ʻoku hā ngali fakanatula pē ke ʻofa ʻa e ngaahi faʻeé ʻi heʻenau fānaú. Kuo ʻilo ʻe he kau fakatotoló ʻi he lolotonga ʻa e fāʻelé, ʻoku maʻu ai ʻe he ngaahi faʻeé ha tuʻunga māʻolunga ʻo ha hōmone ʻoku ui ko e oxytocin, ʻa ia ʻokú ne ueʻi ʻa e ngāue ʻa e uouá ʻo fakatupunga ai ke mingi ʻa e taungafanaú pea tokoni ai ki mui ke lava ʻe he sinó ʻo faʻu ʻa e huʻakaú. Ko e hōmone tatau ko ení, ʻa ia ʻoku faʻu fakatouʻosi ʻi he tangatá mo e fefiné, ʻoku toe ʻi ai e tui ʻo pehē ʻokú ne ʻai ke fai ʻofa mo taʻesiokita ʻa e faʻeé ki he pēpeé.

Ko e Hā e Tupuʻanga ʻo e ʻOfá?

Ko e faʻahinga ʻoku nau pouaki ʻa e tui ki he ʻevalūsioó ʻoku nau akoʻi ko e ʻofa taʻesiokitá, hangē ko ia ʻi he vahaʻa ʻo ha faʻē mo ʻene tamá, naʻe hokonoa mai ia pea naʻe fakatolonga mai ia ʻi hono filifili ʻe natula koeʻuhi ko ʻene ʻaonga ki he faʻahinga ʻo e tangatá. Ko e fakatātaá, ko e pepa ʻi he ʻInitanetí ko e Mothering Magazine ʻoku fakahaaʻi ai: “Ko e ʻuluaki konga ʻo hotau foʻi ʻutó ʻa ia naʻe tupu ʻo tānaki atu ki he ʻuto naʻe maʻu tukufakaholo mei he fanga manu ngaoló ko e sisitemi limbic, ʻa e faʻuʻanga ʻo e ongoʻí. Ko e konga ko eni ʻo e foʻi ʻutó ʻa ē ʻokú ne faʻu ha haʻi vāofi ʻi he ngaahi faʻeé mo ʻenau pēpeé.”

Ko e moʻoni, kuo fakahaaʻi ʻi he fakatotoló ko e sisitemi limbic ʻoku tokoni ia ki heʻetau ongoʻí. Kae kehe, ʻoku ongo ʻo ʻuhinga lelei kiate koe ʻa e pehē ko e ʻofa ʻa ha faʻē ki heʻene tamá ko e tupu noa pē mei he ʻuto ʻo ha manu ngaolo?

Fakakaukau ki ha toe fakamatala ʻe taha. ʻOku pehē ʻe he Tohi Tapú naʻe fakatupu ʻa e tangatá ʻi he ʻīmisi ʻo e ʻOtuá, ʻa ia ko e malava ke tapua atu ʻa e ngaahi ʻulungāanga ʻo e ʻOtuá. (Senesi 1:27) Ko e ʻulungāanga tefito ʻo e ʻOtuá ko e ʻofá. “Ko ia ʻoku ʻikai te ne ʻofa, kuo ʻikai te ne momoʻi ʻiloʻi ʻa e ʻOtua,” ko e tohi ia ʻa e ʻapositolo ko Sioné. Ko e hā hono ʻuhingá? “He ko e ʻOtua ko e ʻOfa.” (1 Sione 4:8) Kātaki ange ʻo fakatokangaʻi ko e veesi Tohi Tapu ko ení ʻoku ʻikai ke pehē ia ai ko e ʻOtuá ʻokú ne maʻu ʻa e ʻofá. ʻI hono kehé, ʻoku pehē ai ko e ʻOtuá ko e ʻofa. Ko e Matavai ia ʻo e ʻofá.

ʻOku peheni hono fakamatalaʻi ʻe he Tohi Tapú ʻa e ʻofá: “Ko ʻOfa ʻoku ne angamokomoko, mo angalelei. Ko ʻOfa ʻoku ʻikai, te ne meheka, ʻoku ʻikai te ne fai pe ke ongoongoa, ʻoku ʻikai te ne fakafuofuolahi, ʻoku ʻikai te ne fai taʻetāu, ʻoku ʻikai te ne kumi ʻene lelei aʻana, ʻoku ʻikai te ne fakaʻita, ʻoku ʻikai te ne lau ʻa e kovi, ʻoku ʻikai te ne fiefia ʻi he taʻetotonu, ka ʻoku ne kaungā-fiefia mo e Moʻoni. ʻOku ne ʻukuma ʻi he meʻa kotoa pe, ʻoku ne tui ʻi he meʻa kotoa pe, ʻoku ne ʻamanaki ʻi he meʻa kotoa pe, ʻoku ne kataki ʻi he meʻa kotoa pe. Ko ʻOfa ʻoku ʻikai ke kaʻanga ia ʻi ha taimi.” (1 Kolinito 13:4-8) ʻOku hā ngali ʻuhinga lelei ke tui ko e ʻulungāanga mahuʻinga taha ko eni ʻi he ngaahi ʻulungāangá naʻe hokonoa mai pē ia?

Fēfē ʻEne Kaunga Kiate Koé?

ʻI hoʻo lau ʻa e fakamatala ki he ʻofá ʻi he palakalafi ki muʻá, naʻe fakaʻamua ʻe ho lotó ke fai atu ʻe ha taha ʻa e faʻahinga ʻofa ko iá kiate koe? ʻOku fakanatula pē ʻa e totonu ke ke ongoʻi ha fakaʻamu pehē. Ko e hā hono ʻuhingá? Koeʻuhí “ko e hako ʻo e ʻOtua ʻa kitautolu.” (Ngāue 17:29) Naʻe faʻu kitautolú ke tau maʻu pea ke fakahāhā ʻa e ʻofa ko iá. Pea ʻoku lava ke tau fakapapauʻi ʻoku ʻofa lahi ʻa e ʻOtuá ʻiate kitautolu. (Sione 3:16; 1 Pita 5:6, 7) Ko e konga Tohi Tapu naʻe lave ki ai he kamata ʻo e kupu ko ení ʻoku fakahaaʻi ai ko e ʻofa ʻa e ʻOtuá kiate kitautolú ʻoku toe mālohi ange ia, ʻo tuʻuloa ange ia, ʻi he ʻofa ʻa ha faʻē ki heʻene tamá!

Kae kehe, te ke fifili nai: ‘Kapau ʻoku poto, mālohi, mo ʻofa ʻa e ʻOtuá, ko e hā ʻoku ʻikai te ne fakangata ai ʻa e faingataʻá? Ko e hā ʻokú ne fakaʻatā ai ke mate ʻa e fānaú, fakaʻatā ke hokohoko atu ʻa e fakafeʻātungiá, pea ke maumauʻi ʻa e māmaní ʻe he ngāue halá mo e mānumanú?’ Ko e ongo fehuʻi lelei eni ʻoku taau ke ʻi ai hono ngaahi tali ʻuhinga lelei.

Neongo ʻa e meʻa nai ʻe tala ʻe he kau taʻetui ʻOtuá, ʻoku malava ke maʻu ʻa e ngaahi tali fakafiemālie ki he ongo fehuʻi ko iá. Kuo maʻu ʻe he kakai ʻe laui miliona ʻi he ngaahi fonua ʻe laui ngeau ʻa e ngaahi tali ko iá ʻi heʻenau ako Tohi Tapu mo e Kau Fakamoʻoni ʻa Sihová. Ko e kau faipulusi ʻo e pepa ko ení ʻoku nau fakaafeʻi atu koe ke ke fai ʻa e meʻa tatau. ʻI he tupulaki hoʻo ʻilo ki he ʻOtuá fakafou ʻi hano ako fakatouʻosi ʻa ʻene Folofolá mo ʻene fakatupú, te ke ʻiloʻi ai ʻoku ʻikai te ne mamaʻo mo taʻelava ke ʻafioʻi ha meʻa. ʻI hono kehé, ʻoku ngalingali te ke tuipau ai ko e ʻOtuá ʻoku ʻikai te ne “mamaʻo mei hatau toko taha.”—Ngāue 17:27.

[Fakamatala ʻi he peesi 8]

Ko e ʻofa ʻa e ʻOtuá kiate kitautolú ʻoku tuʻuloa ange ia ʻi he ʻofa ʻa ha faʻē ki heʻene tamá