Ko Hono Tomuʻa Tala ʻa Hotau Kahaʻú Tonu

ʻI HE lāulea ki he kahaʻu ʻo e tangatá mo e māmaní, naʻe tohi ʻe he ʻapositolo ko Pitá: “ʻI he funga ʻo e talaʻofa ʻa ʻEne ʻAfio ʻoku tau ʻamanaki ki ha ngaahi langi foʻou mo ha fonua foʻou, ʻa ia ʻoku nofoʻanga ai ʻa maʻoniʻoni.” (2 Pita 3:13) Ko ha talaʻofa ʻo e “ngaahi langi foʻou mo ha fonua foʻou” naʻe tomuʻa ʻomai ia fakafou ʻi he palōfita ko ʻAiseá. (Aisea 65:17; 66:22) ʻI he lave ki he kikite ko ení, naʻe fakahaaʻi ʻe Pita ʻi hono taimí ne teʻeki ai ke fakahoko kakato ia.

Ki mui ai, ʻi he taʻu 96 T.S. nai, ko e meʻa Fakahā naʻe fai fakafou ʻi he ʻapositolo ko Sioné naʻe fekauʻaki ia mo e “fonua foʻou” ko iá fakataha mo e ngaahi tāpuaki ʻi he malumalu ʻo e Puleʻanga ʻo e ʻOtuá. (Fakahā 21:1-4) Ko e ngaahi lea ʻa Sīsū pea pehē ki he ʻapositolo ko Paulá ʻo fekauʻaki mo e ngaahi tuʻunga ʻo e māmaní ki muʻa pē ke hoko mai ʻa e Puleʻanga ʻo e ʻOtuá ʻoku lolotonga fakahoko ia. Ko ia ai, ʻoku lava ke tau ʻamanekina kuo vavé ni ke fakahoko mai ʻe he Puleʻanga ʻo e ʻOtuá ʻa e māmani foʻoú. ʻE fēfē ʻa e māmani foʻou ko iá? ʻOku tala mai ia kia kitautolu ʻe he tohi Aiseá.

Tāpuaki ʻi he Māmani Foʻoú

Melino mo e Lotu Fāʻūtaha ʻi Māmani Lahi. “Te nau tuki huo ʻaki ʻenau ngaahi heleta, mo e ngaahi hele ʻauhani ʻaki honau ngaahi tao: ʻe ʻikai ofa heleta ha puleʻanga ki ha puleʻanga, pea ʻe ʻikai kei fai ha akotau.”—Aisea 2:2-4.

Melino ʻa e Tangatá mo e Fanga Manú. “Pea ʻe nonofo ʻa e ulofi mo e lami, pea ʻe takoto ʻa e lepati mo e kiʻi kosi, pea fakataha ʻa e kafi mo e laione mui mo e pulu sino, pea ʻoku fakateka kinautolu ʻe ha momoʻi tamasiʻi. Pea ʻoku kaikai fakataha ʻa e kau mo e pea fefine; ʻoku fetākotoʻi hona ʻuhiki: pea ʻoku kai kaui koane ʻe he laione hange ko e pulu. . . . ʻE ʻikai te nau fai ha maumau, pea ʻe ʻikai te nau fai ha fakaʻauha ʻi he kotoa ʻo hoku moʻunga tapu: he ʻe fonu ʻa mamani ʻi he ʻiloʻi ʻo Sihova, ʻo hange ko e mafola ʻa e vai ʻi he tahi.”—Aisea 11:6-9.

Lahi Fau e Meʻakaí ki he Tokotaha Kotoa. “ʻI he moʻunga ko eni ʻe fai ʻe Sihova Sapaoti ki he ngaahi kakai kotoa pe ha katoanga meʻa lolo, ha katoanga uaine kuo fisi, ʻani meʻa lolo kuo loloʻi ʻaki ʻa e ngako ʻo e hui, ʻani uaine kuo fisi, ʻo sivi ke masivi.”—Aisea 25:6.

ʻIkai Toe ʻi Ai ha Mate. “[Ko e ʻOtuá] te ne folofua ʻa mate ʻo taʻengata; pea ko Atonai Sihova te ne holoholo ʻa e loʻimata mei he mata fuape; pea te ne ʻave ʻa e manukiaʻanga ʻo hono kakai mei he funga ʻo mamani katoa: he kuo folofola ki ai ʻa Sihova.”—Aisea 25:8.

Fokotuʻu Hake ʻa e Kau Maté. “Ko ʻenau kau maté te nau moʻui, ʻe toetuʻu hake honau ngaahi sinó. Ko kinautolu ʻoku mohe ʻi he kelekelé te nau ʻā hake ʻo kaila fiefia . . . ʻE toe fanauʻi mai ʻe he māmaní ʻa e faʻahinga kuo fuoloa ʻenau maté.”—Aisea 26:19, The New English Bible.

Ko ha Fakamaau Māʻoniʻoni ʻa e Mīsaiá. “Ko ʻene fai fakamaau ʻoku ʻikai fai ki he meʻa ʻoku ha ki he mata, pea ko ʻene fakaʻosi ʻe ʻikai fai ki he ongo ʻo e telinga. Ka ʻe fou ʻi he totonu ʻene fakamaau ʻa e kau masiva, pea ʻe fai ki he tuha ʻene tuʻutuʻuni meʻa ki he faʻahinga maʻulalo ʻo mamani.”—Aisea 11:3, 4.

Fakamoʻui ʻa e Kuí mo e Tulí. “ʻE toki fakaava ʻa e mata ʻo e kui, pea toʻo ʻa e telinga ʻo e tuli.”—Aisea 35:5.

Moʻui Lelei ʻa e Feituʻu Liʻakí. “E fiefia ae toafa moe botu lala koeuhi ko kinautolu, bea e fiefia ae botu liaki, bea fiji o hage koe lose. E fiji lahi ia, bea fiefia i he fiefia moe hiva.”—Aisea 35:1, 2, PM.

Ko ha Māmani Foʻou. “ʻOku ou fakatupu ha ngaahi langi foʻou [ko ha founga-pule fakahēvani foʻou] mo ha fonua foʻou [ko ha sōsaieti fakaetangata foʻou māʻoniʻoni]: pea ʻe ʻikai manatua ʻa e ʻuluaki, pea ʻe ʻikai te nau hake ʻi he loto ʻo ha taha. ʻIkai, ka mou fiefia mo tomeʻe ʻo taʻengata, ʻi he meʻa ʻoku ou fakatupu: he ko au eni ʻoku ou fakatupu foʻou . . . Pea [ko e kau nofo ʻi he māmani foʻou ʻa e ʻOtuá kuo talaʻofá] te nau langa fale, ʻo nofo ai; pea te nau to ngouevaine, pea kai hono fua. ʻE ʻikai te nau langa, kae nofo ai ha taha kehe; ʻe ʻikai te nau to, kae kai ʻe ha taha kehe: he hange ko e fuoloa ʻo ha ʻakau ʻe pehe ʻa e fuoloa ʻa hoku kakai; pea ko ʻeku fanga pele te nau ʻosiki ʻa e ngaue ʻa honau nima. ʻE ʻikai te nau fakaongosia noa, pea ʻe ʻikai te nau fakatupu fanau ke fakapoongi; he ko e hako kinautolu ʻo e kau tapuekina meia Sihova, pea ʻe feʻao mo kinautolu ʻa honau pikilau. Pea ʻi he taimi ko ia, kuo teʻeki te nau kamata ui, kuo u tali; ʻoku nau kei lea, kuo u ongoʻi.” “He hange ʻoku feʻao maʻu pe mo au ʻa e ngaahi langi foʻou mo e fonua foʻou ʻa ia ʻoku ou ngaohi—ko Sihova ia mei he Taʻehamai—ʻe pehe ʻa e feʻao mo au homou hako mo homou hingoa.”—Aisea 65:17-25; 66:22.

Tomuʻa Tala ha Kahaʻu Maʻongoʻonga

Ko e tohi Aiseá ʻoku ʻikai ko e tohi Fakatohitapu pē ia ʻokú ne tomuʻa tala e ngaahi tāpuaki ki he kahaʻú. ʻOku fonu ʻa e Tohi Tapú ʻi he ngaahi kikite ʻoku fakamatalaʻi ai ʻa e ngaahi meʻa fakaofo ʻa ia ʻe fakahoko ʻe he ʻOtuá fakafou ʻi hono Puleʻangá ʻi he malumalu ʻo Kalaisí.a Te ke saiʻia ke moʻui ʻi he malumalu ʻo e ngaahi tuʻunga fakaepalataisi ko iá? Te ke malava! Kumi ke ke ʻiloʻi ʻa e meʻa ʻoku akoʻi moʻoni ʻe he Tohi Tapú fekauʻaki mo e ngaahi taumuʻa lelei ʻa e ʻOtuá ki he kahaʻú, pea ako ʻa e founga ʻe lava ke ke hoko ai ko e konga ʻo iá. ʻE fiefia ʻa e Kau Fakamoʻoni ʻa Sihová ke tokoniʻi koe.

[Fakamatala ʻi lalo]

[Fakatātā ʻi he peesi 8]

ʻE melino ʻa e faʻahinga ʻo e tangatá fakaekinautolu pea mo e fanga manú

[Fakatātā ʻi he peesi 9]

ʻE toe moʻui ʻa e kau maté

[Fakatātā ʻi he peesi 10]

ʻE hoko ʻa e foʻi māmaní kotoa ko ha palataisi