ʻOkú Ke Manatuʻi?
Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sio angé pe ʻe lava ke ke tali ʻa e ngaahi fehuʻi ko ení:
• Ko e hā ʻoku mātuʻaki mahuʻinga ai ke tauhi maʻu ʻetau anga-tonu faka-Kalisitiané?
Ko hono tauhi maʻu ʻetau anga-tonú ʻoku ʻai ai ke tau malava ʻo tuʻu maʻá e tuʻunga-hau ʻo Sihová ʻi he ʻofa pea fakamoʻoniʻi ko Sētané ko ha tokotaha loi ia. Ko ʻetau anga-tonú ʻoku toe tokonaki mai ai ha makatuʻunga ʻa ia ʻe lava ke fakamāuʻi ai kitautolu ʻe he ʻOtuá, pea ko ia ai, ʻoku mātuʻaki mahuʻinga ia ki heʻetau ʻamanaki ki he kahaʻú.—12/15, peesi 4-6.
• Ko e hā ʻa e ngaahi hingoa fakalakanga ʻoku fakahaaʻi ai ʻa e ngafa ʻo Sīsū ʻi he taumuʻa ʻa e ʻOtuá?
Ko e ʻAlo tofu-pē-taha-ne-fakatupu. Ko Folofola. Ko ʻĒmeni. Ko e Fakalaloa ʻo e fuakava foʻoú. Ko e Taulaʻeiki Lahi. Ko e Hako naʻe talaʻofá.—12/15, peesi 15.
• ʻE lava fēfē ke tau muimui ʻi he faʻifaʻitakiʻanga ʻa Mele ʻi hono tukulotoʻi ʻa e ngaahi lea “kotoabe ki hono loto”?
Kuo pau ke tau vakai ki he Tohi Tapú ko e Folofola fakamānavaʻi ʻa e ʻOtuá pea lau maʻu pē ia. ʻOku fiemaʻu leva ke tau tukulotoʻi ʻa e ngaahi lea fakalaumālié ʻo maʻu mei ai ha fakamulituku. Kapau ʻoku tau fakalaulauloto ki he meʻa ʻoku tau lau ʻi he Tohi Tapú, ʻo fakakaukau ki he ngaahi founga ʻe lava ke tau ngāueʻaki ai ke toe kakato ange ʻa e akonaki ʻa Sihová, te tau fafangaʻi ai ʻetau tuí ʻaki ʻa e meʻakai ʻoku fiemaʻu ke tupu aí.—1/1, peesi 12-15.
• Ko e hā e niʻihi ʻo e ngaahi kī ki hono tauhi maʻu ʻo e tukupā ʻi he nofo malí?
Ko e kī eni ʻe ua: (1) Fakamuʻomuʻa ʻa hoʻo nofo malí. (2) Fakaʻehiʻehi mei he taʻemateaki kotoa pē. Pe ʻoku tuʻumaʻu pe palopalemaʻia ʻa hoʻo nofo malí, ʻoku fiemaʻu ke ʻiloʻi ʻe ho hoá ʻokú ke tukupā ke ʻai ʻa e nofo malí ke lavameʻa; ʻe tokoni ʻa e ongo kī ko ení.—1/1, peesi 18-21.
• Ko e hā ʻa e poini naʻe fakahaaʻi ʻe Sīsū ʻi heʻene fai ha talanoa fakatātā fekauʻaki mo hono langa ʻa e ongo fale, ko e taha naʻe langa ʻi he ʻoneʻoné pea ko e taha naʻe langa ʻi he maká?
Naʻe fai ʻe Sīsū ʻa e talanoa fakatātaá ke fakamamafaʻi ai ʻa e ngaahi ngāue ʻa e ongo tangata langá. Ko e faʻahinga ʻoku nau fanongo pē ki he ngaahi akonaki ʻa e Tohi Tapú pe lau ʻa e Tohi Tapú ʻi ʻapí ʻoku nau hangē ko e tangata naʻá ne langa ʻa hono falé ʻi he ʻoneʻoné. Ka ko e faʻahinga ʻoku nau ngāueʻaki ʻa e ngaahi akonaki ʻa Kalaisí ʻoku nau hangē ko e tangata naʻá ne “keli, ʻo toe foaʻaki, ʻo ne ʻai ʻa e tuʻunga ki he maka.” (Luke 6:48) Naʻa nau ngāue mālohi pea feinga ke ngāueʻaki ʻi heʻenau moʻui fakaʻahó ʻa e meʻa kuo nau ʻilo mei heʻenau ako ʻa e Tohi Tapú.—1/1, peesi 22-24.
• ʻE lava fēfē ke tau fakalahi ʻa e fiefia ʻoku tau maʻu ʻi heʻetau ngāue fakafaifekaú?
ʻE lava ke tau teuʻi hotau lotó, ʻo tokangataha ki he lahi ʻo e meʻa te tau lava ke tokoni ai ki he niʻihi kehé. ʻE lava ke tau malanga fakataha mo e taumuʻa ke kamata ha ngaahi ako Tohi Tapu. Kapau ʻoku tau fetaulaki mo ha taʻemahuʻingaʻia, ʻe lava ke tau feʻunuʻaki ʻetau fakaleá ki he meʻa ʻoku mahuʻingaʻia ai ʻa e faʻahinga ʻi hotau feituʻu ngāué.—1/15, peesi 8-10.
• ʻOku totonu ke fēfē ʻa e kaunga ʻo e ngaahi akonaki Fakatohitapu fekauʻaki mo e putú ki he fakakaukau mo e tōʻonga ʻa ha Kalisitiane?
Neongo ʻe mamahi nai ha Kalisitiane ʻi he mate ʻa e faʻahinga ʻofeiná, ʻokú ne ʻiloʻi ʻoku ʻikai ʻilo ha meʻa ʻe he kau maté. Tatau ai pē kapau ʻoku fakaangaʻi ia ʻe he kau taʻetuí, ʻokú ne fakaʻehiʻehi mei he anga fakafonua ʻoku fekauʻaki mo e tui ʻoku lava ke uesia ʻe he kau maté ʻa e kau moʻuí. Ke kalofi ʻa e ngaahi palopalemá, ʻoku tohi ai ʻe he kau Kalisitiane ʻe niʻihi ʻenau fakahinohino fekauʻaki mo e ngaahi fokotuʻutuʻu ki he putú.—2/15, peesi 22-24.
• Ko e “Tohi ko Sesa” mo e “Tohi ʻo e ngaahi Tau ʻa Sihova” ko e ongo tohi ia naʻe mole mei he Tohi Tapú? (Sios. 10:13; Nom. 21:14)
ʻIkai. ʻOku hā ngali ko e ongo tohi ia ʻi he taimi ʻo e Tohi Tapú naʻe ʻikai fakamānavaʻi pea naʻe lave ki ai ʻa e kau hiki Tohi Tapú.—3/15, peesi 32.