Meʻa ʻOku Tau Ako Meia Sīsū

Fekauʻaki mo e “Ngataʻanga”

Ko e hā ʻe ngatá?

Naʻe ʻeke ange ʻe he kau ākonga ʻa Sīsuú kiate ia: “Ko e hā ʻa e fakaʻilonga ʻo hoʻo ʻi aí pea mo e fakaʻosiʻosi ʻo e fokotuʻutuʻu ʻo e ngaahi meʻá?” (Mātiu 24:3, NW) ʻI hono tali ʻa e fehuʻi ko iá, naʻe ʻikai pehē ʻe Sīsū ia ko e foʻi māmaní tonu ʻe ngatá. Ki muʻá, naʻá ne talanoa ai fekauʻaki mo e “fokotuʻutuʻu ʻo e ngaahi meʻá” pea naʻá ne ngāueʻaki ai ʻa e kupuʻi leá ʻo ʻuhinga ki he fokotuʻutuʻu fakakātoa fakaemāmani mo fakalotu ʻa ia ʻoku puleʻi ʻe Sētané. (Mātiu 13:22, 40, 49) Ko ia ko e fokotuʻutuʻu ia naʻe ʻi heʻene fakakaukaú ʻi heʻene pehē: “Pea toki hoko ʻa e ngataʻanga.”​—Mātiu 24:14.

Naʻe anga-fēfē hono fakamatalaʻi ʻe Sīsū ʻa e ngataʻangá?

Ko e ngataʻanga ʻo e fokotuʻutuʻu taʻefaitotonu ko ení ko e “ongoongolelei.” Naʻe pehē ʻe Sīsū: “ʻE ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.” Naʻe fakamatalaʻi ʻe Sīsū ʻa e ngataʻanga ʻo e fokotuʻutuʻu lolotonga ʻo e ngaahi meʻá ʻo peheni: “ʻE toki hoko ai ha mamahi lahi, ʻa ia kuo teʻeki hano tatau mei he kamataʻanga ʻo mamani ʻo aʻu mai ki he taimi ni, ʻoi, pea ʻe ʻikai ʻaupito toe ʻi ai. Pea ka ne taeʻoua ʻa e fakanounou ʻo e taimi ko ia, pehe ʻe ʻauha ʻa e kakano kotoa pe: kae telia ʻa e kakai fili ʻe fakanounou ai ʻa e taimi ko ia.”​—Mātiu 24:14, 21, 22.

Ko hai ʻe fakaʻauhá?

Ko e faʻahinga pē ʻoku ʻikai te nau ʻofa mo tauhi kia Sihova mo Sīsuú ʻe fakaʻauhá. Ko e kakai ko iá ʻoku ʻikai te nau tokanga ki he ʻOtuá. Naʻe pehē ʻe Sīsū: “Kae hange ko e taimi ʻo Noa, ʻe pehe foki ʻa e hoko mai ʻae Fanautama ʻa Tangata. He hange naʻe nofo ʻa e kakai ʻi he kuonga ʻo e Lomaki, . . . naʻe ʻikai te nau ʻaloʻiloa kaeʻoua ke hoko mai ʻa e Lomaki, ʻo ʻave kinautolu fulipe.” (Mātiu 24:36-39) Naʻe pehē ʻe Sīsū ko e tokolahi ʻoku nau ʻi he hala ʻoku taki atu ki he fakaʻauhá. Kae kehe, naʻá ne ʻomai ʻa e fakapapau ʻoku “ʻefiʻefi ʻa e hala, ʻoku fakatau ki he moʻui.”​—Mātiu 7:13, 14.

ʻE ngata ʻafē ʻa e fokotuʻutuʻu ko eni ʻo e ngaahi meʻá?

ʻI hono ʻeke ange fekauʻaki mo e fakaʻilonga ʻo ʻene ʻi aí pea mo e “fakaʻosiʻosi ʻo e fokotuʻutuʻu ʻo e ngaahi meʻá,” naʻe tali ʻa Sīsū: “ʻE tuʻu ʻa e fonua ki he fonua mo e puleʻanga ki he puleʻanga, pea ʻe ʻi ai ʻa e ngaahi nounou fakameʻatokoni mo e ngaahi mofuike mei he feituʻu ki he feituʻu . . . pea koeʻuhi ko e fakautuutu ʻa e maumau-laó ʻe fakaʻaʻau ʻo momoko ʻa e ʻofa ʻa e tokolahi.” (Mātiu 24:3-12, NW) Ko ia ai, ko e kotoa ʻo e ngaahi ongoongo fakamamahi ʻi he ʻaho ní ʻoku ʻi ai hono ʻuhinga fakalototoʻa​—kuo vavé ni ke ʻomai ʻe he founga-pule ʻa e Puleʻanga ʻo e ʻOtuá ʻa e melino ki he faʻahinga talangofua ʻo e tangatá. Naʻe pehē ʻe Sīsū: “Ka mou ka vakai kuo hoko ʻa e ngaahi meʻa ko ia, pea mou ʻilo kuo ofi ʻa e Puleʻanga ʻo e ʻOtua.”​—Luke 21:31.

Ko e hā ʻoku totonu ke ke faí?

Naʻe pehē ʻe Sīsū ko e ʻOtuá “naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) Ke tui pīkitai ki he ʻOtuá mo hono ʻAló, ʻoku fiemaʻu ke ke ʻiloʻi lelei kinaua. Ko ia ai, naʻe pehē ʻe Sīsū: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.”​—Sione 17:3.

Tokanga ke ʻoua ʻe taʻofi koe ʻe he loto-moʻuá mo e ngaahi palopalemá mei hono ako ʻa e founga ke fakahāhā ai ʻa hoʻo ʻofa ki he ʻOtuá. Naʻe pehē ʻe Sīsū: “Mou lamasi kimoutolu, naʻa ʻiloange ʻe mafatukituki homou loto, ko e meʻa ʻi he . . . lotomoʻua ki he moʻui ni, pea lapasi kimoutolu ʻe he ʻaho ko ia ʻo hangē ko ha hele puna: he te ne hoko.” Kapau ʻokú ke tokanga ki he fakatokanga ʻa Sīsuú, te ke “lava ke hao mei he ngāhi meʻa ko ia fulipe ʻoku ene ke hoko.”​—Luke 21:34-36.

Ki ha fakamatala lahi ange, sio ki he vahe 9, “ʻOku Tau Moʻui ʻi he ‘Kuonga Fakamui’?,” ʻi he tohi Ko e Hā ʻOku Akoʻi Moʻoni ʻe he Tohi Tapú?a

[Fakamatala ʻi lalo]