ʻUnuʻunu Ofi ki he ʻOtuá

ʻOkú Ne Fakaʻatuʻi ʻa Hotau Ngātangá

Livitiko 5:2-11

“NAʻÁ KU feinga mālohi moʻoni, ka naʻe ʻikai ʻaupito te u ongoʻi naʻe feʻunga.” Ko e lea ia ʻa ha fefine fekauʻaki mo ʻene ngaahi feinga ke fakahōifuaʻi ʻa e ʻOtuá. ʻOku tali ʻe he ʻOtua ko Sihová ʻa e ngaahi feinga lelei taha ʻa ʻene kau lotú? ʻOkú ne fakakaukauʻi ʻenau ngaahi malavá mo e ngaahi tuʻungá? Ke tali ʻa e ongo fehuʻi ko ení, ʻoku tokoni lahi ke fakakaukau ki he meʻa naʻe leaʻaki ʻi he Lao ʻa Mōsesé fekauʻaki mo e ngaahi feilaulau pau, hangē ko ia ʻoku hā ʻi he Livitiko 5:2-11.

ʻI he malumalu ʻo e Laó, naʻe fiemaʻu ʻe he ʻOtuá ʻa e ngaahi feilaulau pe foaki kehekehe, ke fakamolemoleʻi ai ʻa e angahalá. ʻI he ngaahi tuʻunga naʻe lave ki ai ʻi he kupu ko ení, ko e tokotahá naʻe faiangahala taʻeʻilo pe taʻefakakaukauʻi. (Veesi 2-4) ʻI heʻene ʻiloʻí, naʻe pau ke ne vete ʻene angahalá pea ʻoatu ha feilaulau halaia​—‘ko ha manu fefine ko ha lami pe ko ha kosi.’ (Veesi 5, 6) Kae fēfē kapau naʻá ne masiva pea naʻe ʻikai te ne maʻu ha lami pe ko ha kosi ke foaki? Naʻe fekauʻi ʻe he Laó ke ne kole mai ʻa e manu ko iá, ʻo ne maʻu ai ha moʻua? Naʻe pau ke ne ngāue kae ʻoua ke toki lava ʻo ne maʻu ha manu, ʻo toloi ai ʻa hono fakamolemoleʻi ʻo ʻene angahalá?

ʻI he fakakaukauloto ki he fakaʻatuʻi anga-ʻofa ʻa Sihová, naʻe pehē ʻi he Laó: “Pea kapau ʻe ʻikai feʻunga ʻene koloa ke maʻu ha sipi, ka te ne haʻu mo ia ki he ʻEiki ʻene feilaulau-halaia ʻi he angahala kuo ne fai, ko ha ongo kulukulu pe lupe mui.” (Veesi 7) Ko e kupuʻi lea “kapau ʻe ʻikai feʻunga ʻene koloa” ʻe toe fakalea nai “kapau . . . ʻoku ʻikai te ne maʻu.” Kapau naʻe fuʻu masiva ha ʻIsileli ke ne maʻu ha sipi, naʻe hōifua leva ʻa e ʻOtuá ke tali ha meʻa ʻa ia naʻe maʻu ʻe he tokotaha foakí​—ko e ongo kulukulu pe lupe mui.

Fēfē kapau naʻe ʻikai lava ke maʻu ʻe he tokotahá ʻa e ongo foʻi manupuná? “Ke ne haʻu mo ia ʻene kopano koeʻuhi ko e angahala kuo ne fai, ko e vahe hongofulu ʻo e efa [ipu ʻe valu pe hiva ʻo e] mahoaʻa lelei: ko ene feilaulau-angahala ia,” ko e fakamatala ia ʻa e Laó. (Veesi 11) Ki he masiva ʻaupitó, naʻe fili ʻe Sihova ke fai ha meʻa kehe ʻo fakaʻatā ha feilaulau angahala taʻekau ai ʻa e totó.a ʻI ʻIsileli, ko e masivá naʻe ʻikai taʻofi ai ha taha mei he tāpuaki ʻo e fakaleleí pe ko e faingamālie ke fakamelino mo e ʻOtuá.

Ko e hā ʻoku tau ako fekauʻaki mo Sihova mei he lao fekauʻaki mo e ngaahi feilaulau halaiá? Ko ha ʻOtua manavaʻofa ia mo ne maʻu ʻa e mahinó ʻa ia ʻokú ne fakakaukauʻi ʻa e ngātanga ʻo ʻene kau lotú. (Sāme 103:14) ʻOkú ne loto ke tau ʻunuʻunu ofi kiate ia pea fakatupulekina ha vahaʻangatae lelei mo ia ʻo tatau ai pē pe ʻoku ʻi ai hatau ngaahi faingataʻaʻia, hangē ko e hoholo ke motuʻá, mahamahakí, ngaahi fatongia fakafāmili pe fatongia kehe. ʻE lava ke tau maʻu ʻa e fakafiemālie ʻi he ʻiloʻi ʻoku hōifua ʻa e ʻOtua ko Sihová ʻi heʻetau fai ʻa e meʻa kotoa ʻoku tau malavá.

[Fakamatala ʻi lalo]