Ko e Paʻangá ʻa e Tupuʻanga ʻo e Fiefia Moʻoní?

NAʻE fāʻeleʻi ʻa Sonia ʻi Sipeini. ʻI heʻene kei siʻí, naʻá ne maʻu ai mo ʻene faʻeé ʻa e fakataha ʻa e Kau Fakamoʻoni ʻa Sihová. Ka ʻi heʻene tupu haké, naʻá ne hiki ki Lonitoni, ʻIngilani, pea faifai pē ʻo ne kamata ngāue ai ʻi he kautaha ko ha tokotaha fakahū paʻanga.

Naʻe saiʻia ʻa Sonia ʻi heʻene ngāué. Naʻá ne fakatupu paʻanga lahi pea tokangaʻi ʻa e ngaahi fuʻu paʻanga ʻa ʻene kau kasitomaá. Naʻe fakafiefia ʻa e ngāué, pea naʻá ne lavameʻa. Naʻe ngāue maʻu pē ʻa Sonia ʻi he houa ʻe 18 he ʻaho, pea ʻi he ngaahi pō ʻe niʻihi naʻá ne mohe ai ʻi he houa pē ʻe ua pe tolu. Naʻá ne moʻuiʻaki ʻa ʻene ngāué. Fakafokifā pē, naʻe liliu lahi ʻa ʻene moʻuí. Naʻe tofanga ʻa Sonia ʻi ha pā kālava lahi—mahalo pē ko e tupu mei heʻene founga moʻui fakamafasiá. Naʻá ne taʻu 30 pē.

Naʻe mamatea fakafaʻahitaha ʻa e sino ʻo Sonia, pea naʻe ʻikai fakapapauʻi ʻe he kau toketaá pe ʻe toe lava ke lea. Naʻe folau mai leva ʻene faʻeé ki ʻIngilani ke tokangaʻi ia. ʻI he kamata ke toe luelue ʻa Sonia, naʻe tala ange ʻe heʻene faʻeé kiate ia, “Te u ʻalu ki he ngaahi fakataha ʻa e fakatahaʻangá, pea kuo pau ke ta ō koeʻuhi heʻikai lava ke u ʻalu ka ke nofo toko taha.” Naʻe loto ki ai ʻa Sonia. Ko e hā ʻa e olá?

“Naʻe ongo moʻoni ʻa e meʻa kotoa naʻá ku fanongo ki aí. Naʻe fakalata,” ko e manatu ia ʻa Sonia. “Naʻá ku fiefia ke tali ha ako Tohi Tapu mo e taha ʻo e faʻahinga tokolahi naʻa nau fakalea mai kiate au ʻi he ʻuluaki taimi naʻá ku ʻalu ai ki he Fale Fakatahaʻangá. Naʻe ʻikai toe ʻaʻahi mai kiate au hoku ngaahi maheni ki muʻá, ka ko hoku ngaahi kaumeʻa foʻoú naʻa nau loto-ʻofa mo tokanga.”

Faifai atu pē, naʻe toe lava ʻa Sonia ʻo lea, pea naʻá ne fai foki ʻa e fakalakalaka vave fakalaumālie. Siʻi hifo he taʻu ʻe tahá, naʻá ne papitaiso ai. Ko e tokolahi ʻo hono ngaahi kaumeʻa foʻoú naʻa nau ʻi he ngāue fakafaifekau faka-Kalisitiane taimi-kakató, pea naʻe lava ke ne sio ki heʻenau fiefiá. ‘ʻOku ou loto foki ke hangē ko kinautolú,’ ko e fakakaukau ia ʻa Sonia. ‘ʻOku ou loto ke foaki kia Sihova ko e ʻOtuá ʻa ʻeku lelei tahá!’ ʻOku ngāue taimi-kakato he taimí ni ʻa Sonia ʻi he ngāue fakafaifekaú.

Ko e hā kuo ako ʻe Sonia mei heʻene hokosiá? “Neongo naʻá ku ngāue ʻo maʻu ʻa e paʻanga lahi, ko e mafasia mo e ʻikai ha maluʻanga ʻi he ngāueʻangá naʻá ne ʻai au ke u hohaʻa mo loto-mamahi. Kuó u hoko ʻo ʻiloʻi ko e meʻa mahuʻinga taha ʻi he moʻuí ko hono maʻu ha vahaʻangatae lelei mo ʻeku Tamai fakahēvaní, ʻa Sihova. ʻOku ou fiefia moʻoni he taimí ni.”

“Ko e ʻofa ki he paʻanga ko e aka ʻoku tupu mei ai ʻa e ngaahi kovi kotoa pe,” ko e tohi ia ʻa e ʻapositolo ko Paulá. “Ko e niʻihi ʻi heʻenau ala ki he meʻa ko ia kuo nau hē mei he lotu, pea kuo nau hokohokaʻi ʻaki ʻa kinautolu ʻa e ngaahi mamahi lahi.” (1 Timote 6:10) ʻOku lava ke fakapapauʻi ʻe Sonia ʻa e moʻoni ʻo e ngaahi lea ko ení.