Vēkeveke Foaki mei he Lotó
ʻI HE felāveʻi mo e foakí, naʻe tohi ʻe he ʻapositolo ko Paulá: “Ke taki taha fai ki he meʻa kuo ne tuʻutuʻuni ʻi hono loto,” peá ne hoko atu ʻo pehē: “ʻOua ʻe fai ʻi he mamahi, pe ko e puʻia; he ʻoku ʻofa ʻa e ʻOtua ki ha taha ʻoku vekeveke foaki.” (2 Kol. 9:7) ʻOku ʻikai kounaʻi ʻe Sihova ha taha ke poupou ki he lotu maʻá. ʻOkú ne fakaʻatā ʻene kau sevānití ke nau fakahaaʻi ʻenau līʻoá ʻaki ʻa e foaki nima-homo mo vēkeveke. ʻI he kotoa ʻo e hisitōliá, kuo tali loto-māfana ki ai ʻene kakaí. Fakakaukau angé ki he fakatātā ʻe tolu.
Hili hono taki atu ʻe Sihova ʻa e kau ʻIsilelí mei ʻIsipité, naʻá ne fakahinohino ke nau langa ʻa e tāpanekalé. Naʻe fiemaʻu ki ai ʻa e naunau, ko ia naʻe fakaafeʻi ʻa e kakai ʻIsilelí ke nau fai ha foaki. ʻI he tali ki aí, ko “kinautolu kotoa pe naʻe oʻi ʻe honau loto” naʻa nau ʻomai ʻa e koula mo e siliva, siueli mo e ngaahi naunau kehe. Naʻe nima-homo ʻaupito ʻa e kakaí he naʻe fai ha fanongonongo ʻo kole ke tuku ā ʻa e foakí.—Eki. 35:5, 21; 36:6, 7.
ʻI he taimi naʻe pau ke langa ai ʻa e temipalé ʻi ha ngaahi senituli ki mui aí, naʻe toe maʻu ʻe he kakai ʻa e ʻOtuá ʻa e faingamālie ke fakahāhā ʻenau poupou ki he lotu maʻá. Naʻe fai ʻe Tuʻi Tēvita ha fuʻu tokoni fakafoʻituitui ki he langá pea naʻá ne fakaafeʻi ʻa e niʻihi kehé ke nau kau ʻi he foakí. Naʻa nau fai loto-vēkeveke ia. He ko ē, ko hono foaki ʻo e koulá mo e silivá ʻataʻatā pē naʻe laka ange hono mahuʻingá ʻi he tola ʻe 100 piliona ʻi he mahuʻinga lolotongá! Naʻe fiefia ʻa e kakaí ʻi heʻenau fai ʻa e ngaahi tokoni loto-fiefoaki kia Sihová.—1 Kal. 29:3-9; 2 Kal. 5:1.
Ko ha laumālie fiefia ʻo e foakí naʻe fakahaaʻi tatau ia ʻe he muʻaki kau muimui ʻo Sīsū Kalaisí. ʻI he ʻaho ʻo e Penitekosi 33 T.S., naʻe papitaiso ai ʻa e toko 3,000 nai, ko e tokolahi ai naʻe ʻikai ko e kau nofo ʻi Selusalema. Ke fakafaingamālieʻi ʻa e faʻahinga ʻoku masivá ke nau kei nofo ʻi he koló ʻo ako lahi ange fekauʻaki mo ʻenau tui foʻoú, naʻe fai ha tātānaki fakataimi ʻo e ngaahi koloá. Naʻe fakatau atu ʻe he fanga tokouá ʻa e ngaahi meʻa ne nau maʻú pea ʻomi ʻa e paʻangá ki he kau ʻapositoló ke tokoniʻiʻaki ʻa e faʻahinga naʻe masivá. He fiefia ē ka ko Sihova ʻi heʻene ʻafio hifo ki ha fakahāhā pehē ʻo e tuí mo e ʻofá!—Ng. 2:41-47.
ʻI he ʻahó ni, ʻoku hokohoko atu ʻa e kau Kalisitiané ʻi hono poupouʻi ʻa e lotu maʻá ʻaki ʻa e foaki vēkeveke mo nima-homo ʻa honau taimí, iví mo e paʻangá. Ko e puha ʻoku ʻoatu hení ʻoku fokotuʻu mai ai ʻa e ngaahi founga ʻe niʻihi ʻa ia ʻe lava ke fai ai ení.
[Fakatātā ʻi he peesi 18]
NGAAHI FOUNGA ʻOKU FILI AI ʻA E NIʻIHI KE FAI HA FOAKÍ
NGAAHI MEʻAʻOFA KI HE NGĀUE ʻI MĀMANI LAHÍ
ʻOku tuku mavahe, pe vaheʻi ʻe he tokolahi ha paʻanga, ʻa ia ʻoku nau tuku ki he ngaahi puha meʻaʻofa kuo leipolo ko e “Ngaahi Meʻaʻofa ki he Ngāue ʻi Māmani Lahí.”
ʻI he māhina taki taha, ʻoku ʻoatu ai ʻe he ngaahi fakatahaʻangá ʻa e paʻanga ko ení ki he ʻōfisi vaʻa ʻo e Kau Fakamoʻoni ʻa Sihova ʻa ia ʻokú ne tokangaʻi ʻa honau ngaahi fonuá taki taha. Ko e ngaahi tokoni paʻanga loto-fiefoakí ʻe lava ke toe ʻoatu fakahangatonu ia ki he ʻŌfisi Tauhi Paʻangá, Watchtower Bible and Tract Society of New Zealand, PO Box 75142, Manurewa, Manukau 2243. (Ko e ngaahi tokoni loto-fiefoaki ʻoku lave ki ai ʻi laló ʻe lava ke toe ʻave ia ki he ʻōfisi vaʻa ʻo e Kau Fakamoʻoni ʻa Sihova ʻi ho fonuá.) Ko e ngaahi sieke ʻoku ʻave ki he tuʻasila ʻi ʻolungá ʻoku totonu ke ʻai ke ala totongi ia ki he “Watchtower.” ʻE lava foki ke tokoni nai ʻaki ʻa e ngaahi siueli pe ngaahi koloa mahuʻinga kehé. Ko ha tohi nounou ʻo fakamatalaʻi ai ko e ngaahi meʻa peheé ko ha meʻaʻofa fakahangatonu ia ʻoku totonu ke ʻave fakataha mo e ngaahi tokoni ko ení.
FOKOTUʻUTUʻU ʻO E TOKONI ʻOFÁ
ʻE lava ke meʻaʻofaʻaki ha paʻanga ʻi he malumalu ʻo ha fokotuʻutuʻu makehe ʻa ia, ʻoku totonu ai ki he tokotaha-foakí ke ne maʻu ha fiemaʻu fakafoʻituitui, ʻe lava ʻo fai ai ha tokoni fakapaʻanga kiate ia. Ki ha fakamatala lahi ange, kātaki ʻo fetuʻutaki ki he ʻŌfisi Tauhi Paʻangá ʻi he tuʻasila kuo hiki ʻi ʻolungá.
FOAKI ʻOSI PALANI
Tānaki atu ki he ngaahi meʻaʻofa paʻanga fakahangatonú mo e ngaahi tokoni ʻofa ʻo e paʻangá, ʻoku ʻi ai ʻa e ngaahi founga kehe ʻo e foakí ke ʻaonga ki he ngāue ʻo e Puleʻangá ʻi māmani lahi. ʻOku kau ki heni ʻa e:
Maluʻi: ʻE lava ke tohi-tuku nai ki he Sōsaieti Taua Leʻó ha tohi fakamoʻoni maluʻi moʻui/fokotuʻutuʻu ʻo ha vāhenga mālōlō.
Ngaahi ʻInasi mo e Ngaahi Pōnite: ʻE foaki atu nai ʻa e ngaahi ʻinasi mo e ngaahi pōnite ki he Sōsaieti Taua Leʻó ko ha meʻaʻofa fakahangatonu.
Kelekele: ʻE lava nai ke foaki ha konga kelekele ʻe ala fakatau ki he Sōsaieti Taua Leʻó ʻi hano fai ha meʻaʻofa fakahangatonu pe ʻi hano tauhi ha kelekele ʻo e tokotaha-foakí, ʻa ia ʻe lava ke hokohoko atu ʻene nofo aí ʻi heʻene kei moʻuí. Fetuʻutaki ki he ʻōfisi vaʻá ki muʻa ke ʻoatu ha kelekelé.
Ngaahi Tohi-Tuku mo e Ngaahi Talāsiti: ʻE tohi-tuku nai ha koloa pe paʻanga ki he Sōsaieti Taua Leʻó ʻo fakafou ʻi ha tohi-tuku fakahoko fakalao, pe ʻe ʻai nai ʻa e hingoa ʻo e Sōsaieti Taua Leʻó ke tohi-tuku ki ai ha aleapau ʻo ha talāsiti.
Ke maʻu ha tokoni ki hono fokotuʻutuʻu ha foaki ʻosi palani ke ʻaonga ki he ngāue ʻi māmani lahi ʻa e Kau Fakamoʻoni ʻa Sihová kātaki ʻo fetuʻutaki ki he ʻŌfisi Tauhi Paʻangá ʻi ha faitohi pe ʻi he telefoní, ʻi he tuʻasila ʻi laló.
ʻŌfisi Tauhi Paʻanga
Watchtower Bible and Tract Society of New Zealand
PO Box 75142
Manurewa, Manukau 2243
Telefoni: (09) 267-2227