Ko e Hā ke Fakaʻapaʻapaʻi Ai ʻa e Kau Taʻumotuʻá?
ʻOKU tuʻu ʻi he matāfonua ʻo Kalefōnia, ʻAmeliká, ʻa e taha ʻo e ʻuluʻakau faitaaʻi lahi taha ʻi he māmaní. ʻOku ʻiloa ia ko e Saipalesi Laulōtaha. ʻI hono līpōtí, ko e ʻakaú ni ʻoku laka hake hono motuʻá ʻi he taʻu ʻe 250. ʻI he ʻiloa heʻene tuʻumaʻú, ko e ʻakau fakaʻofoʻofá ni kuo fai hono tokangaʻi ʻi he ngaahi founga kehekehe. Hangē ko ení, kuo ʻai ia ke mālohi ʻaki hono haʻi ki ai ha uaea ke ne poupouʻi pea simaʻi takatakai hono tefitó.
Ko e Saipalesi Laulōtahá ʻoku lava ke fakamanatu mai ai kia kitautolu ʻa e kau Kalisitiane taʻumotuʻa ʻi hotau lotolotongá, ʻa ia ʻoku nau fakahāhā ʻa e tuʻumaʻu ʻoku taau ke fakatokangaʻi. Ko e founga ʻiloa ʻe taha ʻoku nau fai ai ení ko hono fanongonongo ʻa e ongoongo leleí . Naʻe tomuʻa tala ʻe he palōfita ko Sioelí ʻo pehē ko e “kau matuʻa” te nau talaki ʻa e pōpoaki ʻa e Tohi Tapú. (Sioeli 2:28-32; Ng. 2:16-21) Fakakaukau atu pē ki he ngaahi houa lahi ʻoku fakamoleki tōtōivi ʻe he faʻahinga ko iá ʻi hono tokoniʻi ʻa e niʻihi kehé ke nau ako fekauʻaki mo e ‘ongoongo lelei ʻo e puleʻangá’! (Mt. 24:14) Ko e niʻihi ʻo e kau fanongonongo taʻumotuʻa ko eni ʻo e Puleʻangá kuo nau tuʻumaʻu ʻi he ngaahi taʻu ʻo e fakatanga pe ngaahi faingataʻa kehe. Kapau ʻoku fakatokangaʻi ha fuʻu saipalesi ʻi heʻene tuʻumaʻú pea ʻai ke mālohi ʻaki hono simaʻi pea haʻi ki ai ha uaeá, huanoa ange ai ʻa e tuha ʻa e kau taʻumotuʻa ʻi hotau haʻohaʻongá ke fakatokangaʻi pea fai kia kinautolu ʻa e fakangeingeia mo e fakaʻapaʻapa!
Naʻe fekauʻi ʻe he ʻOtua ko Sihová ʻa hono kakai ʻi he kuonga muʻá: “Te ke tuʻu ki ʻolunga ʻi he ʻao ʻo e ʻuluhinā, pea te ke fakaʻapaʻapa kiate ia ʻoku motuʻa.” (Liv. 19:32) ʻI he haʻohaʻonga ʻo e kau sevāniti ʻa Sihova he ʻaho ní, ʻoku tau maʻu ai ʻa e ngaahi faʻifaʻitakiʻanga lelei ʻaupito ʻo e faʻahinga faitōnunga kuo nau ‘aeva mo e Otuá’ ʻi he ngaahi taʻu lahi. (Mai. 6:8, PM) ʻI heʻenau hokohoko atu hono ngāueʻaki ʻa e ngaahi tefitoʻi moʻoni Fakatohitapú, ko honau ʻulu hinaá ko e moʻoni ko ha “kalauni matamatalelei.”—Pal. 16:31.
Naʻe fakahinohinoʻi ʻe he ʻapositolo ko Paulá ʻa e talavou ko Tīmoté: “ʻOua naʻa haʻaki valokiʻi ha motuʻa.” ʻI hono kehé, naʻe pau kia Tīmote ke ne ‘fai fakaoleole ki ai ʻo hange ko haʻane tamaí’ pea fai ki he ‘kau fineʻeikí ʻo hange ko haʻane faʻeé.’ (1 Tim. 5:1, 2) Ko hono moʻoní, naʻe pau kia Tīmote ke ne “tuʻu ki ʻolunga” ʻi he ʻao ʻo e ʻulu hinaá. ʻOku hā mahino leva ʻoku ʻamanekina mai ʻe Sihova ke tapua atu ʻi he anga ʻo ʻetau leá ʻa e fakaʻapaʻapa ko iá.
“ʻI he fakaʻapaʻapa mou tāimuʻa kimoutolu,” ko e fakamatala ia ʻi he Loma 12:10. Ko e kau ʻovasia ʻi he fakatahaʻangá ʻoku nau fakahaaʻi moʻoni ʻa e fakaʻapaʻapa ki he kau Kalisitiane taʻumotuʻá. Ka ko kitautolu kotoa ʻoku fiemaʻu ke tau tāimuʻa ʻi hono fefakahāhāʻaki ʻa e fakaʻapaʻapá.
Ko e moʻoni, ko e ngaahi mēmipa ʻi he fāmilí ʻoku ʻi ai honau fatongia makehe ki heʻenau mātuʻá mo e fanga kuí. ʻI he tuʻunga ʻo e Saipalesi Laulōtahá, kuo kumi ai ʻa e kakaí ki he ngaahi founga ke tokoni ki hono ʻai ke tuʻumaʻu iá, pea ʻoku hokohoko atu ʻenau fai peheé. Ko e moʻoni, ʻoku totonu leva ke tau kumi ki ha ngaahi founga ke tokoni ki hono ʻai ke tuʻumaʻu ʻa e ngeia ʻo ʻetau mātuʻa mo e fanga kui taʻumotuʻá. Ko e fakatātaá, ko e hoko ko ha tokotaha fanongo leleí te ne taʻofi kitautolu mei he vilitaki ke fai ha ngaahi meʻa ʻi he founga pē ʻatautolú ʻo taʻetokangaʻi ʻenau ongoʻí.—Pal. 23:22; 1 Tim. 5:4.
Ko e kau taʻumotuʻa ʻi hotau haʻohaʻongá ʻoku nau mahuʻinga ʻaupito kia Sihova. ʻOku ʻikai te ne liʻaki kinautolu. (Sāme 71:18) Ko e ʻOtua moʻoní ʻokú ne ʻai moʻoni ke nau mālohi ke hokohoko atu ʻenau tauhi faitōnunga kiate iá. ʻOfa ke tau hokohoko atu mo kitautolu foki ʻi hono poupouʻi mo fakaʻapaʻapaʻi ʻa e kau taʻumotuʻá.
[Fakatātā ʻi he peesi 7]
Hangē ko e fiemaʻu ʻe he Saipalesi Laulōtahá ʻa e poupoú, ʻoku fiemaʻu ke fai ki he kau taʻumotuʻá ʻa e fakangeingeia mo e fakaʻapaʻapa
[Credit Line]
American Spirit Images/age fotostock