ʻOku ʻIkai Ke Na Kei Manavahē ki he Ngataʻangá
ʻI HE konga ki mui ʻo e 1970 tupú, ko Gary mo Karen naʻá na hoko ʻo tuipau ko e ngataʻanga ʻo e māmaní kuo ofi. Ko ia ai, naʻá na hiki mei he kolo lahí ki he feituʻu ʻutá peá na fili ke na mātuʻaki moʻui pē ʻia kinaua ʻo ʻikai toe fakafalala holo. Naʻá na loto ke na hao moʻui atu.
Ke maʻu ʻa e ngaahi pōtoʻi ʻe fiemaʻu kiate kinauá, naʻá na fakatau mai ai ha ʻū tohi, maʻu ʻa e ngaahi kalasi mo e ngaahi seminā, pea talanoa ki he kakai tokolahi taha naʻe ala lavá. Naʻá na tō ha ngoue vesitapolo mo e fanga kiʻi fuʻu ʻakau fua iiki ʻe 50. Naʻá na tānaki ʻo fokotuʻuna ʻa e ngaahi tengaʻi ʻakau mo e ngaahi meʻa ngāue. Naʻá na ako ke tō mo fakatolonga ʻa e meʻakaí. Naʻe akoʻi kinaua ʻe ha kaumeʻa ʻa e founga ki hono fahi mo fakatolonga ʻa e kakanoʻi manú. Naʻe ako ʻa Karen ke ne lava ʻo ʻilo ʻa e ngaahi ʻakau mo e ngaahi aka ʻi he loto vaotaá koeʻuhi ke na lava ʻo kai ia ʻo kapau ʻe ʻosi ʻa ʻena meʻakaí. Naʻe ako ʻa Gary ke ngaohi ha lolo mei he koané, faʻu ha sitou tafu ukamea, pea langa ha fale ʻoku ʻikai toe fakafalala ia ki ha meʻa mei tuʻa.
“Koeʻuhí ko e ngaahi tuʻunga fakalilifu ʻo e māmaní ʻi he taimi ko iá” ko e lea ia ʻa Karen, “naʻá ku ongoʻi ko e sōsaieti fakaetangatá ʻe vavé ni ke ngata.” ʻOku fakamatala ʻa Gary: “Hangē ko e kau talavou kehé, naʻá ku longomoʻui ʻi he feinga ke fakaleleiʻi ʻa e lau matakalí, ko e tau ʻi Vietinemí, mo e taʻefaitotonú. Ka naʻe vave ʻa e mole ʻeku ʻamanakí. Naʻe hā kiate au ngalingali naʻe huʻu atu ʻa e faʻahinga ʻo e tangatá ki heʻenau fakaʻauha pē ʻe kinautolu ʻa kinautolu.”
“ʻI he pō ʻe taha,” ko e lau ia ʻa Gary, “naʻe ʻi ai haku kiʻi faingamālie, ko ia ai naʻá ku toʻo hake ha Tohi Tapu peá u lau meia Mātiu kia Fakahā. ʻI he pō ʻe fā hoko maí, naʻá ku toe lau ia. ʻI he pongipongi hono nimá, naʻá ku tala ange kia Karen: ‘ʻOkú ta moʻui ʻi he ngaahi ʻaho fakaʻosí. ʻE vavé ni ke ngāue mai ʻa e ʻOtuá ke fakamaʻa ʻa e foʻi māmaní. ʻOku fiemaʻu ia ke ta ʻilo ʻa e faʻahinga te nau hao moʻui atú.’” Naʻe kamata ke hiki ʻa Gary mo Karen mei he lotu ki he lotu, ʻo kumi ki he faʻahinga kakai naʻa nau loto ke tokateu ki he ngataʻangá.
ʻI ha taimi nounou mei ai, naʻe haʻu ha taha ʻo e Kau Fakamoʻoni ʻa Sihová ki hona matapaá, pea naʻe kamata ai ha ako Tohi Tapu. “Naʻá ku fiefia ʻaupito,” ko e manatu ia ʻa Karen, “koeʻuhí naʻe fakamatalaʻi moʻoni mai kiate au ʻa e Tohi Tapú. Ko e moʻoni fekauʻaki mo e taimi ʻo e ngataʻangá ʻa e meʻa naʻá ku kumi ki aí, pea ko eni kuo faifai ange ʻo u maʻu ia. Naʻe ʻi ai ha ʻamanaki papau ki he kahaʻú. Ka, ko hono toe lelei angé, naʻá ku kamata ke fakatupulekina ha vahaʻangatae kaumeʻa mo ʻeku Tamai fakahēvaní, ʻa e Tokotaha-Fakatupu mo e ʻOtua ʻo e ʻunivēsí.”
ʻOku pehē ʻe Gary: “Naʻe hoko ʻo mohu ʻuhinga ange ʻeku moʻuí. ʻI heʻeku kamata pē ke ako ʻa e Tohi Tapú, naʻe ʻikai pē te u toe fie tuku ʻe au. Naʻá ku lau ʻa e kikite Fakatohitapú, sivisiviʻi ʻa e fakamoʻoni ʻa ia kuo hoko moʻoni mai ia peá u hoko ʻo tuipau ʻe vavé ni ke ngāue mai ʻa e ʻOtuá. Naʻá ku fakakaukau, ‘ʻOku totonu ke tokateu ʻa e kakaí, ʻo ʻikai ki he fakatamaki, ka ki he moʻui ʻa ia ʻoku finangalo ʻa e ʻOtuá ke tau maʻú.’” Naʻe maʻu ʻe Gary mo Karen ha vakai totonu ki he kahaʻú. ʻI he ʻikai loto-moʻua fekauʻaki mo e ngataʻanga ʻo e māmaní, naʻá na hoko ʻo falala-pau ʻe toʻo ʻe he ʻOtuá ʻa e ngaahi palopalema ʻokú ne fakafaingataʻaʻiaʻi ʻa e faʻahinga ʻo e tangatá pea te ne fakafoki ʻa e foʻi māmaní ki ha palataisi.
Ko e hā ʻa e meʻa ʻoku fai ʻe Gary mo Karen he taimí ni, ʻi he taʻu ʻe 25 mei aí? ʻOku pehē ʻe Karen: “ʻOku ou hanganaki fakatupulekina ʻeku ʻofa kia Sihova ko e ʻOtuá pea mo ʻeku tui kiate iá, pea ʻoku ou feinga ke tokoniʻi ʻa e niʻihi kehé ke fai ʻa e meʻa tatau. Ko au mo Gary, ʻokú ma fepoupouaki ʻi hono tauhi maʻu homa fāmilí ke mālohi mo fāʻūtaha ʻi he lotu ki he ʻOtuá. ʻOkú ma feinga ke fokotuʻutuʻu maau ai pē, pea ʻokú ma feinga ke tauhi ʻema founga moʻuí ke faingofua koeʻuhí ke ma lava ʻo tokangataha ki he niʻihi kehé mo ʻenau ngaahi fiemaʻú.”
ʻOku tānaki mai ʻe Gary: “ʻOku ou lotu maʻu pē ke hoko mai ʻa e Puleʻanga ʻo e ʻOtuá pea ʻomai ʻa e fakafiemālie ki he laui miliona. ʻI he taimi taki taha ʻoku ou vahevahe atu ai ʻa e ongoongo lelei ʻo e Puleʻanga ʻo e ʻOtuá ki he niʻihi kehé, ʻoku ou lotu ʻe lava ke u ʻoatu naʻa mo ha kiʻi konga pē ʻo ʻeku ʻamanaki mei he Tohi Tapú ki ha foʻi tokotaha pē ā. Laka hake ʻi he taʻu ʻe 25, kuo tali anga-lelei ʻe Sihova ʻa e lotu ko iá. Ko au mo Karen ʻokú ma tui ʻe vavé ni ke ʻomai ʻe Sihova ʻa e ngaahi liliu lahi ki he foʻi māmaní, ka ʻoku ʻikai ke ma kei manavahē ki he ngataʻangá.”—Mātiu 6:9, 10; 2 Pita 3:11, 12.
[Fakatātā ʻi he peesi 9]
Ko Gary mo Karen ʻokú na fiefia he taimí ni ʻi hono tokoniʻi ʻa e niʻihi kehé ke maʻu ʻa e ʻamanaki mei he pōpoaki ʻa e Tohi Tapú