Muimui ʻIa Kalaisi, ko e Taki Haohaoá
KO E faʻahinga ko ia ʻoku nau muimui ʻi he kau pule fakaetangatá ʻoku nau faʻa hokosia ʻa e loto-mamahi. Kae kehe, ko e ola ʻo e taki ʻa Kalaisí ki he faʻahinga ʻoku fakamoʻulaloa ki aí ʻoku kehe ʻaupito ia. Naʻe pehē ʻe Sīsū: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu. ʻAi ʻeku ioke kiate kimoutolu, pea mou ako ʻiate au: he ʻoku ou faʻa kataki mo angafākatuʻa, pea te mou ʻilo ha mālōlō ʻi homou laumalie.” (Mt. 11:28, 29) Ko e taki ʻa Sīsuú ʻoku hoko ia ko ha mālōlōʻanga mo e fakafiemālie. ʻOkú ne mahuʻingaʻia lahi ʻi he anga-fākatuʻá pe fakatōkilaló mo e faʻahinga ʻoku mafasiá, ʻo fakaafeʻi kinautolu ke nau haʻu ki he malumalu ʻo ʻene ʻioke anga-ʻofá. Ko ia ko e hā ʻoku kau ʻi he muimui ki he takimuʻa ʻa Sīsuú?
“Naʻe kataki mamahi ʻa Kalaisi foki koeʻuhi ko kimoutolu,” ko e tohi ia ʻa e ʻapositolo ko Pitá, “ʻo ne tuku ha faʻifaʻitakiʻanga kiate kimoutolu, ke mou muimui ofi, ʻo topuvaʻe taha mo ia.” (1 Pita 2:21) ʻOku mahuʻinga fēfē kia kitautolu ke muimui ʻi he topuvaʻe ʻo Sīsuú? Fakaʻuta atu naʻá ke ʻi ha kulupu naʻe pau ke nau kolosi ʻi ha feituʻu ʻoku tanu maina pea ko e toko taha pē ʻi hoʻo kulupú naʻá ne ʻiloʻi ʻa e founga ke hao ai ki he tafaʻaki ʻe tahá. ʻIkai te ke muimui ofi ʻi hono topuvaʻé, mahalo ʻo aʻu ʻo ke tuʻu ʻi he meʻa ʻoku ʻalu aí? ʻI he tuʻunga meimei tatau, ko ʻetau malu ʻi he kahaʻú ʻoku fakatuʻunga ia ʻi he fakatatau ʻetau moʻuí ki he faʻifaʻitakiʻanga ʻa Sīsuú. Ko e fai peheé ʻoku kau ki ai ʻa e fanongo pea talangofua kiate ia ʻo ngāue fāitaha mo e faʻahinga ʻoku nau fakafofongaʻi iá.
Fanongo pea Talangofua
ʻI he ofi ki he ngataʻanga ʻo ʻene Malanga ʻi he Moʻungá, naʻe fakahaaʻi ʻe Sīsū: “ʻIlonga ʻa ia ʻoku ne fanongo ki he ngāhi tala ni aʻaku, mo ne fai ki ai, te u fakatatau ia ki he tangata fakapotopoto, ʻa ia naʻa ne langa hono fale ki he maka: pea naʻe to ʻa e ʻuha, pea tafe mai ʻa e ngāhi vai, pea angi ʻa e ngāhi matangi, ʻo nau faʻafaʻaki ki he fale ko ia: ka naʻe ʻikai holo, he ne tuʻunga ki he maka.”—Mt. 7:24, 25.
Naʻe lave ai ʻa Sīsū ki ha tangata ʻa ia ʻoku fanongo pea talangofua ki heʻene ngaahi leá ko e “fakapotopoto.” ʻOku tau fakahāhā ʻetau talangofua loto-moʻoni ʻoku tau fakaʻapaʻapaʻi mo fakamahuʻingaʻi ʻa e faʻifaʻitakiʻanga ʻa Kalaisí, pe ʻoku tau hehema ke fili mei he ʻotu fekau ʻa Sīsuú ʻa e meʻa pē ko ia ʻoku faingofua pe faingamālie ke talangofua ki aí? Naʻe pehē ʻe Sīsū: “ʻOku ou fai maʻuaipē ʻa e ngaahi meʻa ʻoku ne hōhōʻia ai [ʻa e ʻOtuá].” (Sione 8:29) Tau feinga mālohi ke faʻifaʻitaki ki he faʻifaʻitakiʻanga ko iá.
ʻI he ʻuluaki senitulí, naʻe fokotuʻu ai ʻe he kau ʻapositoló ha faʻifaʻitakiʻanga lelei ʻo e fakamoʻulaloa ki he takimuʻa ʻa Kalaisí. ʻI he taimi ʻe taha, naʻe pehē ai ʻe Pita kia Sīsū: “Vakai, ko kimautolu kuo mau liʻaki ʻa e meʻa kotoa pe ʻo mau muimui kiate koe.” (Mk. 10:28) Ko e moʻoni, naʻe vakai ʻa e kau ʻapositoló ki he taki ʻa Sīsuú ʻoku mahuʻinga lahi pehē ʻo nau loto-lelei ai ke liʻaki ʻa e ngaahi meʻa kehé koeʻuhí ke nau muimui ai kiate ia.—Mt. 4:18-22.
Ngāue Fāitaha mo e Kau Fakafofonga ʻo Kalaisí
Taimi nounou ki muʻa heʻene pekiá, naʻe lave ai ʻa Sīsū ki ha toe founga ʻe taha ʻa ia ʻe lava ke tau muimui ai ʻi heʻene takí. Naʻá ne pehē: “Ko ia ʻoku ne tali ha toko taha pe te u fekau, ʻoku ne tali au.” (Sione 13:20) Ko hono moʻoní, naʻe lau ʻa Sīsū ki hono kau fakafofonga paní ko hono “ngāhi tokoua.” (Mt. 25:40) Hili hono fokotuʻu hake ʻa Sīsū ki hēvaní, ko hono “ngāhi tokoua” naʻe fakanofo kinautolu ke nau ngāue ʻi hono tuʻungá, “ko e fetongi ʻo Kalaisi” ʻi he tuʻunga ko e kau ʻamipasitoa ʻo fakaafeʻi ʻa e niʻihi kehé ke nau hoko ʻo fakalelei mo Sihova ko e ʻOtuá. (2 Kol. 5:18-20) Ko ʻetau ʻiloʻi ʻa e taki ʻa Kalaisí ʻoku kau ki ai ʻa e fakamoʻulaloa ki hono “ngāhi tokoua.”
ʻOku lelei ke tau sivisiviʻi ʻa e founga ʻo ʻetau tali ki he akonaki Fakatohitapu taimi totonu ʻoku ʻomai ʻi heʻetau ʻū tohi makatuʻunga ʻi he Tohi Tapú. ʻI hono ako ʻa e Tohi Tapú mo maʻu ʻa e ngaahi fakataha ʻa e fakatahaʻangá, ʻoku fakamanatu mai ai ʻa e ngaahi lea ʻa Kalaisí. (2 Pita 3:1, 2) ʻOku tau fakahaaʻi ʻa e houngaʻia loto-moʻoni ki he tokonaki ko eni ʻo e meʻakai fakalaumālié ʻaki ʻa e maʻu ʻinasi maʻu pē mei ai. Ko ia ai, ko e hā ʻoku totonu ko ʻetau talí ia kapau ʻoku toutou fai he taimi ki he taimi ha akonaki pau? Ko e fakatātaá, ko e Folofola ʻa e ʻOtuá ʻoku akonaki mai ai ki he kau Kalisitiané ke nau mali “i he Eiki be.” (1 Kol. 7:39, PM) Laka hake ʻi ha senituli, ko e kaveingá ni kuo toutou lāulea ki ai ʻi he Taua Leʻo. Ko e fanga tokoua ʻo Kalaisí ʻoku nau fakahāhā moʻoni ʻenau tokanga ʻofa ki heʻetau lelei fakalaumālié ʻaki hono pulusi ʻa e ngaahi kupu ʻi he meʻá ni mo e akonaki fakamānavaʻi kehe. Ko e tokanga ki he ngaahi fakamanatu ko ení ʻa e founga ʻe taha ke fakahaaʻi ai ʻoku tau muimui ʻi hotau Taki haohaoá, ʻa Sīsū Kalaisi.
“Ko e ʻalunga ʻo haʻa faitotonu ʻoku hange ko e maama hengihengi, ʻa e fakautuutu ʻene maama ʻo aʻu ki he hoʻatā malie,” ko e fakamatala ia ʻa e Palovepi 4:18. ʻIo, ko e taki ʻa Sīsuú ʻoku fakalakalaka, ʻo ʻikai tuʻu maʻu. Ko e toe founga ʻe taha ke ngāue fāitaha ai mo e “ngāhi tokoua” ʻo Kalaisí ko hono maʻu ha fakakaukau pau ki ha fakalelei pē ʻi heʻetau mahinoʻi ʻa e moʻoni Fakatohitapú hangē ko ia ʻoku pulusi ʻe he “tamaioeiki agatonu mo boto.”—Mt. 24:45, PM.
ʻOku tau toe fakahāhā ʻetau fakamoʻulaloa ki he “ngāhi tokoua” ʻo Kalaisí ʻaki ʻa e ngāue fāitaha mo e kau ʻovasia kuo fakanofo ʻi he fakatahaʻanga Kalisitiané. Naʻe pehē ʻe he ʻapositolo ko Paulá: “Mou tuitala ki he kau tuʻukimuʻa ʻomoutolu, pea fakavaivai kiate kinautolu; he ko kinautolu ia ʻoku nau ʻā ke leʻohi homou laumalie.” (Hep. 13:17) Ko e fakatātaá, ʻe ʻomai nai ʻe ha mātuʻa kia kitautolu ha fakalototoʻa felāveʻi mo e mahuʻinga ʻo hono maʻu ha efiafi Lotu Fakafāmili tuʻumaʻu pe fai mai nai ha fokotuʻu fekauʻaki mo ha tafaʻaki ʻo ʻetau ngāue fakafaifekaú. ʻE ʻomai nai kia kitautolu ʻe ha ʻovasia fefonongaʻaki ha akonaki ʻaonga Fakatohitapu ʻi ha tafaʻaki tefito ʻo ʻetau moʻui faka-Kalisitiané. Ko ʻetau ngāueʻaki loto-lelei ʻa e akonaki ko iá ʻe fakahaaʻi ai ʻoku tau muimui ʻia Sīsū ko hotau Taki.
Ko e māmaní ʻoku fakamamahi ʻa e ʻikai ha taki ola leleí. Ka he meʻa fakatupu mālōlō ē ke muimui ʻi he taki anga-ʻofa ʻa Kalaisí! ʻI he meʻa kotoa, tau talangofua ki hotau Takí pea ngāue fāitaha mo e faʻahinga ʻokú ne ngāueʻaki he ʻaho ní.
[Fakatātā ʻi he peesi 27]
ʻOkú ke tali ʻa e akonaki Fakatohitapu ke ʻoua ʻe mali mo ha tokotaha taʻetuí?