Ako mei he Folofola ʻa e ʻOtuá
ʻOku Anga-Fēfē ʻEtau Maʻu ʻAonga mei he Ngaahi Lao ʻa e ʻOtuá?
ʻOku langaʻi hake ʻi he kupu ko ení ʻa e ngaahi fehuʻi kuó ke ʻeke nai pea fakahaaʻi ai ʻa e feituʻu ʻe lava ke ke lau ai ʻa e ngaahi talí ʻi hoʻo Tohi Tapú. ʻE fiefia ʻa e Kau Fakamoʻoni ʻa Sihová ke fetalanoaʻaki mo koe ki he ngaahi tali ko ení.
1. Ko e hā ʻoku totonu ai ke tau talangofua ki he ʻOtuá?
ʻOku totonu pē ke talangofua ki he ʻOtuá—ko ia naʻá ne fakatupu kitautolú. Naʻa mo Sīsū naʻá ne talangofua maʻu pē ki he ʻOtuá. (Sione 6:38; Fakahā 4:11) Ko e ngaahi lao ʻa e ʻOtuá ʻoku ʻomai ai kia kitautolu ha founga ke fakamoʻoniʻi ai ʻoku tau ʻofa kiate ia.—Lau ʻa e 1 Sione 5:3.
Ko e ngaahi lao kotoa pē ʻa Sihova ko e ʻOtuá ʻoku lelei kia kitautolu. ʻOku akoʻi mai ai kia kitautolu ʻa e founga lelei taha ʻo e moʻuí he taimí ni pea fakahaaʻi mai ai ʻa e founga ʻe lava ke tau maʻu ai ʻa e ngaahi pale taʻengata ʻi he kahaʻú.—Lau ʻa e Saame 19:7, 11; ʻAisea 48:17, 18.
2. ʻOku anga-fēfē ʻaonga e ngaahi lao ʻa e ʻOtuá ki heʻetau moʻuí?
Ko e lao ʻa e ʻOtuá ki he konaá ʻoku maluʻi ai kitautolu mei he mahaki fakatupu maté mo e ngaahi fakatuʻutāmakí. Ko e inu tōtuʻá ʻoku fakatupu maʻunimā pea ʻoku taki atu ia ki he tōʻonga fakavalevale. (Palōveepi 23:20, 29, 30) ʻOku fakaʻatā mai ʻe Sihova ke tau inu ʻolokaholo kae inu fakafeʻunga pē.—Lau ʻa e Saame 104:15; 1 Kolinitō 6:10.
ʻOku toe fakatokanga mai ʻa Sihova fekauʻaki mo e meheká, ʻita taʻemapuleʻí, mo e ngaahi tōʻonga fakatupu ʻauha kehe. Ko e lahi ʻo ʻetau ngāueʻaki ʻene faleʻí, ʻe ʻaonga ia ki heʻetau moʻuí.—Lau ʻa e Palōveepi 14:30; 22:24, 25.
3. ʻE lava fēfē ke maluʻi kitautolu ʻe he lao ʻa e ʻOtuá?
Ko e lao ʻa e ʻOtuá ʻoku tapui ai ʻa e fehokotaki fakasino ʻi tuʻa ʻi he nofo malí. (Hepelū 13:4) Ko e ongo meʻa ʻokú na talangofua ki he lao ko ení ʻokú na ongoʻi malu ange pea fakatupu ha ʻātakai lelei ange ki heʻena fānaú. ʻI he tafaʻaki ʻe tahá, ko e fehokotaki fakasino ʻi tuʻa ʻi he nofo malí ʻoku faʻa iku ia ki he mahaki, vete, fakamālohi, mamahi fakaeongo, mo e ngaahi fāmili mātuʻa pē taha.—Lau ʻa e Palōveepi 5:1-9.
ʻI he fakaʻehiʻehi mei he ngaahi tuʻunga ʻa ia ʻoku fakataueleʻi ai kitautolu ke fehokotaki fakasino ʻi tuʻa ʻi he nofo malí, ʻoku tau maluʻi ai ʻetau kaumeʻa mo e ʻOtuá. ʻOku tau toe fakaʻehiʻehi ai mei he fakatupu maumau ki he niʻihi kehé.—Lau ʻa e 1 Tesalonaika 4:3-6.
4. ʻOku anga-fēfē ʻetau maʻu ʻaonga mei he fakaʻapaʻapaʻi ʻo e moʻuí?
Ko e kakai ʻoku nau fakaʻapaʻapaʻi ʻa e meʻaʻofa ʻa e ʻOtuá ko e moʻuí ʻoku nau maʻu ʻa e ngaahi ʻaonga fakaemoʻui ʻi heʻenau liʻaki e ngaahi tōʻonga hangē ko e ifí mo e ngaahi maʻunimā kehe ʻoku fakatuʻutāmaki ki he moʻuí. (2 Kolinitō 7:1) ʻOku fakamahuʻingaʻi ʻe he ʻOtuá naʻa mo e moʻui ʻa ha pēpē ʻoku tupu ʻi he manavá. (ʻEkisoto 21:22, 23) Ko ia ai ʻoku ʻikai totonu ke tau tāmateʻi ʻosi fakakaukauʻi ha kiʻi tama ʻoku teʻeki fanauʻi. Pehē foki, ko e faʻahinga ʻoku nau mahinoʻi ʻa e vakai ʻa e ʻOtuá ki he moʻuí ʻoku nau fai e ngaahi tokateu maluʻi ʻi he ngāué, ʻi ʻapi, pea ʻi ha kā. (Teutalōnome 22:8) ʻIkai ko ia pē, ʻoku ʻikai te nau tuku ʻenau moʻuí ki ha fakatuʻutāmaki ʻi he sipotí, koeʻuhi ko e moʻuí ko ha meʻaʻofa ia mei he ʻOtuá.—Lau ʻa e Saame 36:9.
5. ʻOku anga-fēfē ʻetau maʻu ʻaonga mei he tuʻunga toputapu ʻo e totó?
Ko e totó ʻoku toputapu koeʻuhí ʻoku pehē ʻe he ʻOtuá ʻokú ne fakafofongaʻi ʻa e moʻui ʻa ha meʻamoʻui. (Sēnesi 9:3, 4) Ko e lao ʻa e ʻOtuá, ʻa ia ʻoku fakatatau ai ʻa e mahuʻinga ʻo e totó ki he moʻuí, ʻoku tau maʻu ʻaonga mei ai. Anga-fēfē? ʻOkú ne ʻai ke malava ʻa e fakamolemole ʻo e ngaahi angahalá.—Lau ʻa e Livitiko 17:11-13; Hepelū 9:22.
Ko e taʻataʻa ʻo Sīsuú naʻe tautefito ʻene mahuʻingá koeʻuhi naʻá ne haohaoa. Naʻe foaki ʻe Sīsū ki he ʻOtuá ʻa e meʻa naʻá ne fakafofongaʻi ʻene moʻuí—ko hono totó. (Hepelū 9:12) Ko hono taʻataʻa ne lilingí ʻokú ne ʻai ʻa e moʻui taʻengatá ke malava ʻo tau maʻu.—Lau ʻa e Mātiu 26:28; Sione 3:16.
Ki ha fakamatala lahi ange, sio ki he vahe 12 mo e 13 ʻo e tohi ko ení, Ko e Hā ʻOku Lava ke Akoʻi Mai ʻe he Tohi Tapú?, ko e pulusi ʻe he Kau Fakamoʻoni ʻa Sihová.