ʻOku Mahuʻinga ʻa e Talí?

“Te mou ʻilo ʻa e moʻoní, pea ko e moʻoní te ne fakatauʻatāinaʻi kimoutolu.”—SIONE 8:32.

ʻOKU ʻi he Tohi Tapú ʻa e moʻoni ʻa ia ʻe lava ke ne fakatauʻatāinaʻi kitautolu mei he ngaahi tui fakapuputuʻu pea naʻa mo fakatupu takihala fekauʻaki mo Sīsuú. Ka ʻoku mahuʻinga moʻoni ʻa e meʻa ʻoku tau tui ki ai fekauʻaki mo iá? ʻIo, ʻoku pehē. ʻOku mahuʻinga ia kia Sihova. ʻOku mahuʻinga ia kia Sīsū. Pea ʻoku totonu ke mahuʻinga ia kia kitautolu.

● Ko e hā ʻoku mahuʻinga ai ia kia Sihová? Ko hono ʻai mahinó, koeʻuhí “ko e ʻOtuá ko e ʻofa.” (1 Sione 4:8) ʻOku finangalo ʻa Sihova ke tau moʻui fiefia ʻo taʻengata. Naʻe pehē ʻe Sīsū: “Naʻe ʻofa lahi ʻaupito ʻa e ʻOtuá ki he māmaní [ʻo e faʻahinga ʻo e tangatá] ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke [ne] . . . maʻu ʻa e moʻui taʻengatá.” (Sione 3:16) Naʻe fekau mai ʻe he ʻOtuá ʻa hono ʻAló ke hoko ko hotau Huhuʻi pea ke fakaʻatā ʻa e hala kiate kitautolu ke tau moʻui taʻengata ʻi ha Palataisi ʻi he māmaní, ʻo fehoanaki mo ʻEne fuofua taumuʻá. (Sēnesi 1:28) ʻOku vēkeveke ʻa e ʻOtuá ke ʻoange ʻa e meʻaʻofa ʻo e moʻui taʻengatá ki he faʻahinga ʻoku nau ako ʻa e moʻoni fekauʻaki mo hono ʻAló pea ngāue ʻo fehoanaki mo iá.—Loma 6:23.

● Ko e hā ʻoku mahuʻinga ai ia kia Sīsuú? ʻOku ʻofa foki mo Sīsū ʻi he faʻahinga ʻo e tangatá. Naʻá ne fakahāhā ʻa e ʻofa feilaulauʻi-kitá ʻaki ʻene loto-lelei ke foaki ʻene moʻuí koeʻuhi ko kitautolu. (Sione 15:13) Naʻá ne mahinoʻi naʻá ne tokonaki mai ai ʻa e hala pē ko ia ʻe taha ki he fakamoʻuí. (Sione 14:6) ʻOku totonu nai ke fakaʻohovale kiate kitautolu ʻa e loto ʻa Sīsū ke sio ʻoku maʻu ʻaonga ʻa e tokolahi taha ʻe ala lavá mei heʻene feilaulau huhuʻí? Ko e ʻuhinga ia naʻá ne fekauʻi atu ai ʻa ʻene kau muimui moʻoní ke akoʻi ʻa e kakai ʻi he māmaní fekauʻaki mo e finangalo pea mo e taumuʻa ʻa e ʻOtuá.—Mātiu 24:14; 28:19, 20.

● Ko e hā ʻoku totonu ai ke mahuʻinga kia kitautolú? Fakakaukau angé ʻi ha mōmeniti ʻo fekauʻaki mo e ngaahi meʻa ʻoku ʻikai ha veiveiua ʻoku mahuʻinga ʻaupito kiate koe—ko hoʻo moʻuileleí pea mo ho fāmilí. ʻOkú ke fakaʻamua ha sino moʻuilelei pea mo ha moʻui lelei ange kiate koe pea mo e faʻahinga ʻokú ke ʻofa aí? Ko Sihova fakafou ʻia Sīsū ʻokú ne ʻoatu kiate koe mo e faʻahinga ʻokú ke ʻofa aí ʻa e ʻamanaki ki ha moʻuilelei haohaoa pea mo e moʻui taʻehanongataʻanga ʻi ha māmani foʻou, ʻoku ʻatā mei he mamahí mo e faingataʻaʻiá. (Saame 37:11, 29; Fakahā 21:3, 4) ʻOku fakamānako ʻa e ʻamanaki ko iá kiate koe? Kapau ko ia, ʻoku ʻi ai ʻa e meʻa ʻoku fiemaʻu ke ke fai.

Toe sio angé ki he konga Tohi Tapu ʻoku hā fakataha atu mo e kaveingá: “Te mou ʻilo ʻa e moʻoní, pea ko e moʻoní te ne fakatauʻatāinaʻi kimoutolu.” Ko e moʻoni fekauʻaki mo Sīsū pea mo hono ngafa ʻi hono fakahoko ʻa e taumuʻa ʻa e ʻOtuá ʻe lava ke ne fakatauʻatāinaʻi kitautolu mei he faʻahinga kovi taha ʻo e pōpulá—ʻa e haʻisia ki he angahalá mo e maté. Ka ke hokosia ʻa e fakatauʻatāina ko iá, ʻoku fiemaʻu ke ke “ʻilo ʻa e moʻoní.” Fēfē ke ke ako lahi ange ʻo fekauʻaki mo e moʻoni ko ení pea mo e founga ʻe lava ai ke ke hoko pea mo e faʻahinga ʻokú ke ʻofa aí ʻo maʻu ʻaonga mei aí? ʻE fiefia ʻa e Kau Fakamoʻoni ʻa Sihová ke tokoniʻi koe.