Fakalototoʻa “mei he Gutu oe Kau Valevale”

ʻI Tīsema 2009, naʻe taukapoʻi ai ʻe he Fakamaauʻanga Lahi ʻa Lūsiá ha tuʻutuʻuni naʻe iku ki hono tāpuni ʻa e kautaha fakalotu ʻa e Kau Fakamoʻoni ʻa Sihová ʻi Taganarog, Lūsia, faʻao ʻa e Fale Fakatahaʻangá, pea talaki fakahāhā ko ʻetau tohi ʻe 34 naʻe lau ia ʻoku fuʻu tōtuʻa. Ko e meʻa fakaʻohovale ko ení naʻe fokotuʻu ia ʻi he Uepisaiti fakaʻofisiale ʻa e Kau Fakamoʻoni ʻa Sihová fakataha mo e ʻū tā ʻo e Kau Fakamoʻoni naʻe uesia ʻe he tuʻutuʻuní, kau ai mo e longaʻi fānaú.

ʻI ha ngaahi māhina siʻi mei ai, naʻe maʻu ai ʻe he Senitā Pule ʻo e Kau Fakamoʻoni ʻa Sihova ʻi Lūsiá ha puha mo e tohi ko ení mei ha fāmili Fakamoʻoni ʻi Kuinisilani, ʻAositelēlia, ʻa ia kuo nau sio ʻi he līpooti ʻo e tuʻutuʻuni ʻa e Fakamaauʻangá: “Siʻi Fanga Tokoua, ko ʻEma fānaú, ʻa Cody mo Larissa, naʻe maongo ʻaupito kia kinaua ʻa e tui mo e ngaahi ʻahiʻahi ʻa e ngaahi kaungāmeʻa ʻi Lūsiá. Kuó na hiki ʻa e ngaahi kaati mo e ngaahi tohi, pea kuo mau ʻai ha fanga kiʻi puha meʻaʻofa ʻoku mau saiʻia ke ʻoatu ki he fānau ʻi Taganrog, ko e ʻai pē ke nau ʻilo ʻi he mamaʻo ʻaupitó, ʻoku ʻi ai ʻa e fānau kehe ʻoku nau toe tauhi faitōnunga kia Sihova pea ʻoku nau fakakaukau atu kia kinautolu. ʻOkú na ʻoatu kiate kinautolu kotoa ʻena fāʻofua lahi mo ʻena ʻofa.”

ʻI hono maʻu ʻa e ngaahi meʻaʻofá, naʻe tā fakatātaaʻi ʻe he fānau ʻi Taganrog ha ngaahi tohi fakamālō ki he fāmili ʻi ʻAositelēliá. ʻI he maongo ʻa e ngaahi fakahāhā ʻo e fakalototoʻa “mei he gutu oe kau valevale,” naʻe tohi ai ha Fakamoʻoni ʻoku ngāue ʻi he vaʻa ʻi Lūsiá kia Cody mo Larissa: “ʻE lava ke mo sioloto atu ki he meʻa tamaki ko ia ki he fānaú mo e kakai lalahí fakatouʻosi ʻa hono tautea kinautolu ki ha meʻa naʻe ʻikai ke nau fai. Kuo ʻikai fai ʻe hotau fanga tokoua mo e fanga tuofāfine ʻi Taranrog ha meʻa ʻoku hala, ka naʻe ʻave honau Fale Fakatahaʻangá. Naʻe ʻai ai heni kinautolu ke nau mātuʻaki mamahi. ʻE hoko ko e fakalototoʻa kia kinautolu ke ʻilo ʻoku ʻi ai ha taha ʻi he tafaʻaki ʻe taha ʻo e māmaní ʻoku fakakaukau mai kia kinautolu. Fakamālō atu ki homo laumālie māfana mo nima-homó!”—Saame 8:2, PM.

Ko e konga moʻoni kitautolu ʻo ha fetokouaʻaki ʻi māmani lahi, pea ko ʻetau feʻofaʻakí ʻoku tokoniʻi ai kitautolu kotoa ke tau fekuki mo e ngaahi ʻahiʻahi mo e ngaahi faingataʻa ʻo e moʻuí. Lolotonga ʻa e tipeiti ʻi he ngaahi fakamaauʻangá pe ʻoku fakaʻaiʻai ʻe he ʻū tohi ʻa e Kau Fakamoʻoni ʻa Sihová ʻa e tāufehiʻa, ʻoku fakahāhā fakalongolongo ʻe heʻetau fānaú ʻenau fetokangaʻaki ki heʻenau leleí, fakangatangata ʻa e ngaahi ngatangataʻanga fakaepuleʻanga mo fakaetukufakaholó pea fakahāhā ʻa e moʻoni ʻo e ngaahi lea ʻa Sīsuú: “ʻI he meʻá ni ʻe ʻilo ai ʻe he faʻahinga kotoa ko kimoutolú ko ʻeku kau ākonga, ʻo kapau ʻoku mou maʻu ʻa e ʻofá ʻi homou lotolotongá.”—Sione 13:35.