TALI ʻO E NGAAHI FEHUʻI FAKATOHITAPÚ

ʻOku fanongo ʻa e ʻOtuá ki he lotu kotoa pē?

ʻOku fanongo ʻa e ʻOtuá ki he kakai mei he Puleʻanga kotoa pē. (Saame 145:18, 19) ʻI heʻene Folofolá, ʻa e Tohi Tapú, ʻoku fakalototoʻaʻi ai kitautolu ke lea kiate ia fekauʻaki mo ha faʻahinga meʻa pē ʻokú ne fakahohaʻasi kitautolu. (Filipai 4:6, 7) Neongo ia, ʻoku ʻi ai ʻa e ngaahi lotu ʻe niʻihi ʻoku taʻefakahōifua ki he ʻOtuá. Ko e fakatātaá, ko hono toutou leaʻaki ʻa e ngaahi lotu ʻoku lau maʻulotó ʻoku ʻikai ke fakahōifua kiate ia.—Lau ʻa e Mātiu 6:7.

Tānaki atu ki aí, ʻoku ʻikai saiʻia ʻa Sihova ʻi he ngaahi lotu ʻa e kakai ʻoku nau taʻetokaʻi loto-lelei ʻene laó. (Palōveepi 28:9) Ko e fakatātaá, ʻi he taimi ʻo e Tohi Tapú, naʻe fakafisi ʻa e ʻOtuá ke fanongo ki he kau ʻIsileli naʻa nau halaia ʻi he fakapoó. ʻOku hā mahino, kuo pau ke tau aʻusia ʻa e ngaahi fiemaʻu pau kae fanongo mai ʻa e ʻOtuá.—Lau ʻa e ʻAisea 1:15.

Ko e hā kuo pau ke tau fai kae fanongo mai ʻa e ʻOtuá?

ʻOku ʻikai lava ke tau fakaofiofi ki he ʻOtuá ʻi he lotu ʻo taʻeʻiai ha tui. (Sēmisi 1:5, 6) Kuo pau ke tau tuipau ʻokú ne ʻi ai pea ʻoku tokanga mai fekauʻaki mo kitautolu. ʻOku lava ke fakaivimālohiʻi ʻetau tuí ʻaki hono ako ʻa e Tohi Tapú koeʻuhí ko e tui moʻoní ʻoku makatuʻunga ia ʻi he fakamoʻoni ʻo e fakapapauʻiʻanga ʻoku maʻu ʻi he Folofola ʻa e ʻOtuá.—Lau ʻa e Hepelū 11:1, 6.

ʻOku totonu ke tau lotu loto-moʻoni mo anga-fakatōkilalo. Naʻa mo e ʻAlo ʻo e ʻOtuá, ʻa Sīsū, naʻá ne anga-fakatōkilalo ʻi he taimi naʻá ne lotu aí. (Luke 22:41, 42) Ko ia, ʻi he ʻikai tala ange ki he ʻOtuá ʻa e meʻa ke faí, ʻoku totonu ke tau feinga ke mahinoʻi ʻene ngaahi fiemaʻú ʻaki hono lau ʻa e Tohi Tapú. ʻOku lava leva ai ke tau lotu ʻo fehoanaki mo e finangalo ʻo e ʻOtuá.—Lau ʻa e 1 Sione 5:14.