“Fehiʻa ʻIate Au ʻa e Kakai Tokolahi”

KO HOKU KUOHILÍ:

Naʻá ku tupu hake ʻi Santiago, ko e kolomuʻa ia ʻo Silí, ʻi ha feituʻu kaungāʻapi ʻa ia naʻe lahi ai ʻa e faitoʻo kona tapú, kau kengí pea mo e faihiá. ʻI he taimi naʻá ku taʻu nima aí, naʻe fakapoongi ai ʻeku tamaí. Hili iá, naʻe nonofo ʻeku faʻeé mo ha tangata ʻa ia naʻe anga-fakamamahi. Naʻá ne faʻa tā kimaua fakatouʻosi. ʻOku kei ʻiate au pē ʻa e ngaahi lavea fakaeongo mei he ngaahi taʻu ko iá.

ʻI heʻeku tupu haké, naʻá ku muimui ʻi he ngaahi tākiekina koví peá u hoko ʻo anga-fakamālohi lahi fakaʻulia. Naʻá ku fanongo ki he ngaahi fasi ngatūtū ololaló, inu tōtuʻa pea ngāueʻaki ʻi he taimi ki he taimi ʻa e faitoʻo kona tapú. Naʻá ku kau maʻu pē ʻi he ngaahi fuhu ʻi he hala puleʻangá mo e kau tila faitoʻo kona tapú ʻa ia naʻa nau feinga ʻi he taimi lahi ke tāmateʻi au. ʻI ha taimi ʻe taha, naʻe totongi ʻe ha kau kengi ʻe taha naʻa mau feʻauʻauhi ha tokotaha ʻiloa ʻi he sinaipá ke ne tāmateʻi au, ka naʻe malava ke u hao neongo naʻá ku lavea. ʻI ha toe taimi ʻe taha, naʻe fokotuʻu ai ʻe ha kulupu ʻo e kau tila faitoʻo kona tapú ha meʻafana ki hoku ʻulú pea nau feinga ke tautau au.

ʻI he 1996, naʻá ku ʻofa ai ʻi ha fefine naʻe hingoa ko Carolina pea ʻi he 1998 naʻá ma mali ai. Hili hono fanauʻi homa ʻuluaki fohá, naʻá ku hoko ai ʻo tailiili koeʻuhi ko ʻeku ʻita anga-fakamālohí, telia naʻá ku hoko pē ʻo hangē ko ʻeku tamai-uá ʻo ngaohi koviʻi hoku fāmilí. Ko ia ai, naʻá ku kumi tokoni ki ha senitā fakalelei ʻatamai ʻi he feituʻú. Naʻá ku maʻu ha tokoni fakafaitoʻo ka naʻe ʻikai hano ʻaonga. Naʻe hoko atu pē ʻeku loto-lili ʻi he fanga kiʻi meʻa īkí; naʻe ʻikai ke u mapuleʻi au. ʻI ha feinga ʻi he fakakaukau hala ke taʻofiʻaki ʻeku fakamamahiʻi hoku fāmilí, naʻá ku feinga taonakita. Ko e meʻa mālié, naʻe ʻikai ke u lavameʻa.

Naʻá ku hoko ko ha tokotaha fakaʻikaiʻi-ʻOtua ʻi he ngaahi taʻu lahi, ka naʻá ku loto ke u tui ki he ʻOtuá. Ko ia, naʻá ku kau ai ki ha lotu fakaʻevangeliō ʻi ha taimi. Lolotonga iá, naʻe ako Tohi Tapu hoku uaifí mo e Kau Fakamoʻoni ʻa Sihová. Naʻá ku fehiʻa ʻi he Kau Fakamoʻoní, pea ʻi he taimi lahi naʻá ku kaikaila ʻo leakoviʻi kinautolu. Ka naʻa nau fakafeangai melino maʻu pē, ʻa ia ko ha meʻa naʻe ʻikai ke u ʻamanekina.

ʻI ha ʻaho ʻe taha, naʻe kole mai ai ʻe Carolina ke u sio ki he Saame 83:18 ʻi heʻeku Tohi Tapú tonu. Ko e veesi ko iá ʻoku fakahaaʻi mahino ai ko e huafa ʻo e ʻOtuá ko Sihova. Naʻá ku ʻohovale ʻi hono ʻiloʻi ko e lotu ʻoku ou kau ki aí naʻá ku ako ai fekauʻaki mo ha ʻotuá, kae ʻikai fekauʻaki mo Sihova. ʻI he konga ki muʻa ʻo e taʻu 2000, naʻá ku kamata foki ai ke ako Tohi Tapu mo e Kau Fakamoʻoní.

FOUNGA HONO LILIU ʻE HE TOHI TAPÚ ʻA ʻEKU MOʻUÍ:

ʻI heʻeku fakalakalaká, naʻá ku maʻu ha fiemālie ʻi he ʻiloʻi ko Sihová ko ha ʻOtua manavaʻofa mo fakamolemole. Ko e fakatātaá, ʻi he ʻEkisoto 34:6, 7, ʻoku fakamatalaʻi ai ʻe he Tohi Tapú ʻa Sihova ko ha “ʻOtua, ʻAloʻofa mo Anga lelei, Tuai ki he Houhau, pea Fonu ʻi he Kelesi mo e Moʻoni; ʻOku taʻofi mesi maʻa e ngaahi toko afe, ʻOku ne fakamolemole ʻa e kovi mo e talangataʻa mo e angahala.”

Neongo ia, naʻe ʻikai faingofua ke u ngāueʻaki ʻa e meʻa naʻá ku akó. Naʻá ku tuipau ʻe ʻikai ʻaupito ke malava ke u mapuleʻi ʻa ʻeku ʻita anga-fakamālohí. ʻI he taimi taki taha naʻá ku taʻelavameʻa aí, naʻe fakalototoʻaʻi anga-ʻofa au ʻe Carolina. Naʻá ne fakamanatu mai kiate au ʻoku fakatokangaʻi ʻe Sihova ʻeku ngaahi feingá. Ko ʻene poupoú naʻe ʻomai ai kiate au ʻa e mālohi ke u hokohoko atu ʻeku feinga ke fakahōifuaʻi ʻa Sihová, neongo ʻeku faʻa ongoʻi ʻoku ʻikai ha ʻamanakí.

ʻI he ʻaho ʻe taha, ko ʻeku tokotaha faiakó, ʻa Alejandro, naʻá ne kole mai ke lau ʻa e Kalētia 5:22, 23. Naʻe pehē ʻe he ongo veesi ko iá ko e fua ʻo e laumālie ʻo e ʻOtuá ko e ‘ʻofa, fiefia, melino, kātaki-fuoloa, anga-lelei, lelei, tui, anga-malū mo e mapuleʻi-kita.’ Naʻe fakamatala ʻe Alejandro ko ʻeku fakatupulekina ʻa e ngaahi ʻulungaanga ko iá naʻe ʻikai ke fakatuʻunga ia ʻi hoku mālohi pē ʻoʻokú ka ʻi hono kehé, ko e laumālie māʻoniʻoni ia ʻo e ʻOtuá. Ko e moʻoni ko iá naʻá ne liliu fakaʻaufuli ʻa ʻeku fakakaukaú!

Ki mui aí, naʻá ku kau ki ha fakataha lahi ʻa e Kau Fakamoʻoni ʻa Sihová. Ko e maau, maʻa mo e feohi naʻá ku mamata aí naʻe fakatuipauʻi ai kiate au kuó u maʻu ʻa e lotu moʻoní. (Sione 13:34, 35) Naʻá ku papitaiso ʻi Fepueli 2001.

FOUNGA ʻO ʻEKU MAʻU ʻAONGÁ:

Kuo liliuʻi au mei ha tangata anga-fakamālohi ki ha tokotaha fakamelino. Naʻá ku ongoʻi ʻokú ne hiki hake au mei he pelepela naʻá ku tō tangutu aí. Naʻe fehiʻa ʻiate au ʻa e kakai tokolahi pea naʻe ʻikai ke u tukuakiʻi kinautolu. Kae kehe ʻi he taimi ní, ʻoku ou fiefia ʻi he tauhi ʻa Sihova ʻi he nonga fakataha mo hoku uaifí mo homa ongo fohá.

Ko hoku kāingá mo e ngaahi kaungāmeʻa ki muʻá naʻe ʻikai malava ke nau tui ki he liliu lahi naʻá ku faí. Ko hono olá, ko e niʻihi ʻo kinautolu naʻa nau fakahāhā ʻa e mahuʻingaʻia ʻi hono ako ʻa e moʻoni ʻo e Tohi Tapú. Naʻá ku toe maʻu foki ʻa e monū ki hono tokoniʻi ʻa e niʻihi kehé ke nau hoko ʻo ʻiloʻi ʻa Sihova. Ko ha fiefia ē ke sio ki hono liliu ʻe he moʻoni ʻo e Tohi Tapú ʻa ʻenau moʻuí foki!