Taʻu 100 e Pule ʻa e Puleʻangá ʻOku Anga-Fēfē ʻEne Kaunga Kiate Koé?

1, 2. Ko e hā ʻe fai ʻe he Puleʻanga ʻo e ʻOtuá, pea ʻoku tau ʻilo fēfē ʻe hoko mai ʻa e Puleʻangá?

ʻI HE faʻahitaʻu failau ʻo e taʻu 31 ʻi ha moʻunga ofi ki he kolo ko Kāpaneumé, naʻe akoʻi ai ʻe Sīsū Kalaisi hono kau muimuí ke lotu: “Tuku ke hoko mai ho Puleʻangá.” (Māt. 6:10) ʻI he ʻahó ni, ʻoku veiveiua ʻa e tokolahi pe ʻe toe hoko mai koā ʻa e Puleʻangá. Kae kehe, ʻoku tau falala-pau ʻe tali ʻe Sihova ʻetau ngaahi lotu ke hoko mai hono Puleʻangá.

² ʻE ngāueʻaki ʻe Sihova ʻa e Puleʻangá ke fakafāʻūtahaʻi hono fāmili ʻi hēvani mo māmaní. ʻE fakahoko ʻa e taumuʻa ʻa Sihová. (ʻAi. 55:10, 11) Ko e ngaahi meʻa fakafiefia ʻi he taʻu ʻe 100 kuohilí ʻoku fakamoʻoniʻi ai kuo ʻosi Tuʻi ʻa Sihova pea ʻokú ne fai ʻa e ngaahi meʻa fakaofo maʻá e laui miliona ʻo ʻene kau sevānití. (Sāk. 14:9; Fkh. 15:3) Kae kehe, ko e hoko ʻa Sihova ko e Tuʻí ʻoku kehe ia mei he hoko mai ʻa e Puleʻanga ʻo e ʻOtuá ʻa ia naʻe akoʻi ʻe Sīsū ke tau lotu fekauʻaki mo iá. Ko e hā hono kehekehe ʻa e ongo meʻá ni, pea ʻoku anga-fēfē ʻene kaunga kia kitautolú?

NGĀUE ʻA E TUʻI FAKANOFO ʻA SIHOVÁ

3. (a) Naʻe fakanofo Tuʻi fakakū ʻa Sīsū, pea ʻi fē? (e) ʻE anga-fēfē haʻo fakamoʻoniʻi naʻe kamata pule ʻa Sīsū ʻi he 1914? (Sio ki he fakamatala ʻi laló.)

³ ʻI he taʻu nai ʻe 20 ki muʻa ʻi he 1900, naʻe kamata ke mahinoʻi ʻe he kau sevāniti ʻa e ʻOtuá ha kikite naʻe tohi ʻe Taniela ʻi he taʻu ʻe 2,500 kuo maliu atú: “ʻI he taimi ʻo e ngaahi tuʻi ko ia, ko e ʻOtua ʻo Langi te ne fokotuʻu ha puleʻanga ʻe ʻikai fulihi ʻo taʻengata.” (Tan. 2:44) Laka hake ʻi he taʻu ʻe 20, naʻe malangaʻi ʻe he Kau Ako Tohi Tapú ʻe hoko ʻa e 1914 ko ha taʻu mātuʻaki mahuʻinga. Ko e kakai tokolahi ʻi he taimi ko iá naʻa nau mātuʻaki fakatuʻamelie atu ki he kahaʻú. ʻOku pehē ʻe ha tokotaha-tohi ʻe taha: “Ko e māmani ʻo e 1914 naʻe fonu ʻi he ʻamanaki mo e talaʻofa.” Kae kehe, ki mui ʻi he taʻu ko iá, naʻe kamata ʻa e Tau I ʻa Māmaní, pea fakahoko moʻoni ai ʻa e kikite Fakatohitapú. Ko e ngaahi nounou fakameʻatokoní, mofuiké, mahakí, mo e ngaahi kikite Fakatohitapu kehe naʻe fakahokó naʻe fakamoʻoniʻi ai kuo kamata pule ʻa Sīsū Kalaisi ʻi hēvani ko ha Tuʻi ʻo e Puleʻanga ʻo e ʻOtuá ʻi he 1914.a ʻI hono fakanofo hono ʻAló ko ha Tuʻi Faka-Mīsaiá, naʻe hoko ai ʻa Sihova ko ha Tuʻi ʻi ha founga foʻou.

4. Ko e hā ʻa e fuofua meʻa naʻe fai ʻe Sīsū ʻi he taimi naʻá ne hoko ai ko e Tuʻi? Ko e hā ʻa e meʻa hoko naʻá ne faí?

⁴ Ko e fuofua meʻa naʻe fai ʻe he Tuʻi foʻou ʻa e ʻOtuá ko e faitau mo e fili tefito ʻene Tamaí, ʻa Sētane. Naʻe lī hifo mei hēvani ʻe Sīsū mo ʻene kau ʻāngeló ʻa e Tēvoló mo e kotoa ʻene fanga tēmenioó. Naʻe hoko heni ha fiefia lahi ʻi hēvani kae ʻomai ai ʻa e faingataʻa lahi ange ʻi ha toe taimi ki he māmaní. (Lau ʻa e Fakahā 12:7-9, 12.) Hili iá, naʻe kamata ʻe he Tuʻí ke sivi, akoʻi mo fokotuʻutuʻu ʻene kau sevāniti ʻi he māmaní ke fai ʻa e finangalo ʻo e ʻOtuá. Tau sio angé ki he hanga ʻe heʻenau talangofua ki he tataki ʻa Sīsuú ʻo fokotuʻu ha faʻifaʻitakiʻanga lelei kia kitautolu he ʻaho ní.

SIVI ʻE HE TUʻI FAKA-MĪSAIÁ ʻENE KAKAI MATEAKÍ

5. Ko e hā ʻa e fakamaʻa naʻe hoko ʻi he 1914 ki he kamataʻanga ʻo e 1919?

⁵ Hili hono fakamaʻa ʻe Sīsū ʻa hēvani mei he tākiekina kovi ʻa Sētane mo ʻene fanga tēmenioó, naʻe ʻai ʻe Sihova ʻa Sīsū ke ne vakaiʻi mo sivi hono kau muimui ʻi heni he māmaní. Naʻe fakamatalaʻi eni ʻe he palōfita ko Malakaí ko ha fakamaʻa. (Mal. 3:1-3) ʻOku fakahaaʻi ʻe he hisitōliá ko e fakamaʻa ko ení naʻe fakahoko ʻi he 1914 ki he kamataʻanga ʻo e 1919.b Kapau ʻoku tau fie hoko ko ha konga ʻo e fāmili fakaeʻuniveesi ʻo Sihová, kuo pau ke tau hoko ʻo maʻa, pe māʻoniʻoni. (1 Pita 1:15, 16) Kuo pau ke tau tauhi ʻetau lotú ke maʻa mei hono ʻuliʻi ʻe he lotu loí pe politikalé.

6. ʻOku anga-fēfē hono tokonaki mai ʻa e meʻakai fakalaumālié, pea ko e hā ʻoku mātuʻaki mahuʻinga ai ʻa e meʻakai ko ení?

⁶ Naʻe ngāueʻaki leva ʻe Sīsū hono mafai ko ha Tuʻí ke fakanofo ha “tamaioʻeiki anga-tonu mo potó.” Ko e tamaioʻeiki ko ení te ne tokonaki maʻu pē ʻa e meʻakai fakalaumālie lelei ki he kotoa ʻo e faʻahinga ʻoku nau hoko ko e konga ʻo e “tākanga ʻe taha” ʻoku ʻi he malumalu ʻo e tokanga ʻa Sīsuú. (Māt. 24:45-47; Sione 10:16) Talu mei he 1919, kuo fakahoko mateaki ʻe ha kiʻi kulupu ʻo e fanga tokoua paní ʻa e fatongia mahuʻinga ʻo hono fafangaʻi ʻa e “kau sevāniti ʻo hono falé.” ʻOku tokonaki mai ʻe he tamaioʻeiki anga-tonu mo potó ʻa e meʻakai fakalaumālie lahi kia kitautolu koeʻuhí ke lava ʻo tupulaki ʻetau tuí. ʻOku ʻai ai ke tau fakapapauʻi lahi ange ke tauhi ʻetau lotú, tōʻongá, fakakaukaú, pehē foki ki hotau sinó ke maʻa ʻo fehoanaki mo e ngaahi tuʻunga ʻa e ʻOtuá. ʻOku toe akoʻi mo teuʻi kitautolu ʻe he meʻakai fakalaumālie ko ení ke tau ngāue mālohi ʻi he ngāue mahuʻinga taha ʻi he māmaní, ʻa e ngāue fakamalangá. ʻOkú ke kai maʻu pē ʻa e meʻakai fakalaumālie ko ení?

AKOʻI ʻE HE TUʻÍ HONO KAU MUIMUÍ KE MALANGA ʻI MĀMANI LAHI

7. Ko e hā ʻa e ngāue mahuʻinga naʻe kamataʻi ʻe Sīsū ʻi he taimi naʻá ne ʻi he māmaní ai, pea ʻe hokohoko atu ʻo aʻu ki he taimi fē?

⁷ ʻI he taimi naʻe kamata ai ʻe Sīsū ʻene ngāue fakafaifekau ʻi he māmaní, naʻá ne pehē: “Kuo pau ke u talaki ʻa e ongoongo lelei ʻo e Puleʻanga ʻo e ʻOtuá ki he ngaahi kolo kehé foki, koeʻuhi ko e meʻa ʻeni naʻe fekauʻi mai ai aú.” (Luke 4:43) ʻI he taʻu ʻe tolu mo e konga, naʻe hoko ʻa e ngāue fakafaifekau ko ení ko e ngāue mahuʻinga taha ia ʻi he moʻui ʻa Sīsuú. Naʻá ne akoʻi ʻene kau ākongá: “ʻI hoʻomou ʻalú, mou malanga ʻo pehē: ‘Kuo ofi ʻa e Puleʻanga ʻo hēvaní.’” (Māt. 10:7) Hili ʻene toetuʻú, naʻe tomuʻa tala ʻe Sīsū ʻe ʻave ʻe hono kau muimuí ʻa e pōpoaki ko ení “ki he feituʻu taupotu taha ʻo e māmaní.” (Ngā. 1:8) Naʻá ne talaʻofa kia kinautolu te ne poupouʻi tonu ʻa e ngāue mātuʻaki mahuʻinga ko ení ʻo aʻu ki he ngataʻanga ʻo e fokotuʻutuʻu ko ení.—Māt. 28:19, 20.

8. Naʻe anga-fēfē hono fakalototoʻaʻi ʻe he Tuʻí hono kau muimui ʻi he māmaní ke malangá?

⁸ ʻI he 1919, ko e ‘ongoongo lelei ʻo e Puleʻangá’ naʻe kau atu ki ai ha ʻuhinga foʻou. (Māt. 24:14) Naʻe pule ʻa e Tuʻí ʻi hēvani, pea naʻá ne fakatahatahaʻi ha kiʻi kulupu ʻo e kau muimui kuo fakamaʻa ʻi he māmaní. Naʻe talangofua vēkeveke ʻa e kulupú ni ki he fekau māʻalaʻala ʻa Sīsū ke malangaʻi ʻi he kotoa ʻo e māmaní ʻa e ongoongo lelei ko e Puleʻanga ʻo e ʻOtuá kuo pule ʻi hēvani! (Ngā. 10:42) Ko e fakatātaá, ʻi Sepitema 1922, naʻe ofi ki he kau poupou ʻo e Puleʻangá ʻe toko 20,000 naʻa nau ʻi he fakataha-lahi fakavahaʻapuleʻanga ʻi Cedar Point, Ohio, U.S.A. Sioloto atu ki he fiefia kuo pau naʻa nau maʻú ʻi he taimi naʻe fai ai ʻe Tokoua Rutherford ʻa e malanga naʻe fakakaveinga “Ko e Puleʻangá” pea fakahaaʻi: “Vakai, ʻoku pule ʻa e Tuʻí! Ko ʻene kau fakafofonga tuʻuakí kimoutolu. Ko ia tuʻuaki, tuʻuaki, tuʻuaki, ʻa e Tuʻí mo hono puleʻangá.” ʻI he ʻaho hokó, ko e toko ua afe ʻo kinautolu naʻa nau ʻalu atu ʻi he ngāue fakamalangá, pea ko e niʻihi naʻe aʻu ʻo nau fononga ʻi he mamaʻo ko e kilomita ʻe 72 (maile ʻe 45) mei he feituʻu fakataha-lahí ke malanga. Naʻe pehē ʻe ha tokoua ʻe taha: “Heʻikai ʻaupito ke ngalo ʻiate au ʻa e ui ke tuʻuaki ʻa e Puleʻangá mo e faivelenga ʻa e fuʻu kakai naʻe ʻi aí!” Naʻe ongoʻi pehē mo e niʻihi tokolahi.

9, 10. (a) Ko e hā ʻa e ngaahi ako ʻokú ne akoʻi kitautolu ki he ngāue fakafaifekaú? (e) Kuo anga-fēfē hoʻo maʻu ʻaonga fakafoʻituitui mei he ngaahi ako ko ení?

⁹ ʻI he 1922, naʻe laka hake ʻi he kau malanga ʻe toko 17,000 naʻa nau malanga ʻi he fonua ʻe 58 takatakai he māmaní. Kae kehe, naʻe fiemaʻu ke akoʻi kinautolu. ʻI he ʻuluaki senitulí, naʻe ʻoange ʻe he Tuʻi kuo filí ki heʻene kau ākongá ʻa e ngaahi fakahinohino mahino fekauʻaki mo e meʻa, feituʻu mo e founga ke malanga aí. (Māt. 10:5-7; Luke 9:1-6; 10:1-11) ʻI ha founga meimei tatau he ʻahó ni, ʻoku fakapapauʻi ʻe Sīsū ko e faʻahinga kotoa ʻoku malangá ʻoku nau maʻu ʻa e ngaahi fakahinohino mo e ngaahi meʻangāue ʻoku nau fiemaʻú ke hoko ai ko ha kau faiako lelei. (2 Tīm. 3:17) ʻOku ngāueʻaki ʻe Sīsū ʻa e fakatahaʻanga Kalisitiané ke akoʻi hono kau muimuí ki he ngāue fakafaifekaú. Ko e founga ʻe taha ʻokú ne akoʻi ai kinautolú ko hono ngāueʻaki ʻa e Ako Fakafaifekau Fakateokalatí ʻi he fakatahaʻanga laka hake he 111,000 ʻi māmani lahi. Ko e ako ko ení ʻokú ne akoʻi ʻa e kau malanga laka hake ʻi he toko fitu milioná ke nau malanga mo faiako ʻi ha founga ʻe tokoniʻi ai ʻa e “ngaahi faʻahinga kakai kotoa pē.”—Lau ʻa e 1 Kolinitō 9:20-23.

¹⁰ ʻOku toe ʻi ai mo e ngaahi ako Fakatohitapu kehe ke akoʻi ai ʻa e kau mātuʻa ʻi he fakatahaʻangá, kau tāimuʻá, fanga tokoua taʻemalí, ngaahi hoa mali Kalisitiané, kau mēmipa ʻo e Kōmiti Vaʻá mo honau ngaahi uaifí, kau ʻovasia fefonongaʻakí mo honau ngaahi uaifí mo e kau misinalé.c Naʻe lea ʻi he houngaʻia ha tokotaha ako ʻi ha kalasi ʻe taha ʻo e Ako Fakatohitapu Maʻá e Ngaahi Hoa Mali Kalisitiané: “Ko e ako makehe naʻá ma maʻú kuó ne fakalolotoʻi ʻema ʻofa kia Sihová pea kuó ne teuʻi lelei ange kimaua ke tokoniʻi ʻa e niʻihi kehé.”

11. Kuo anga-fēfē malava ʻa e kau muimui ʻo Sīsuú ke hokohoko atu ʻa e malangá neongo ʻa e fakafepaki ʻa Sētané?

¹¹ Ko e fili ko Sētané ʻoku sio ki he kotoa ʻo e ngaahi feinga lahi ko eni ke malangaʻi mo akoʻi ʻa e ongoongo leleí. ʻOkú ne loto ke taʻofi ʻa e ngāue fakamalangá pea te ne ngāueʻaki ha faʻahinga founga pē te ne malavá ke fakafepakiʻi ʻa e pōpoaki ʻo e Puleʻangá mo e faʻahinga ʻoku nau malangaʻi iá. Ka ko e fakafepaki ʻa Sētané heʻikai lavameʻa. Kuo fakanofo ʻe Sihova hono ʻAló ke “māʻolunga mamaʻo ia ʻi he puleʻanga mo e mafai mo e mālohi mo e tuʻunga ʻeiki kotoa pē.” (ʻEf. 1:20-22) ʻI he tuʻunga ko ha Tuʻí, ʻoku ngāueʻaki ʻe Sīsū hono mafaí ke maluʻi mo tataki ʻene kau ākongá ke fakapapauʻi ʻoku fakahoko ʻa e finangalo ʻene Tamaí.d ʻOku hokohoko atu hono malangaʻi ʻa e ongoongo leleí, pea ko e kakai loto-totonu ʻe laui miliona kuo akoʻi ke lotu kia Sihova. Ko ha monū moʻoni ia kiate kitautolu ke hoko ko ha konga ʻo e ngāue fakaofo ko ení!

FOKOTUʻUTUʻU ʻE HE TUʻÍ HONO KAU MUIMUÍ KE FAI ʻA E MEʻA LAHI ANGE

12. Talu mei he 1914, kuo anga-fēfē hono fokotuʻutuʻu lelei ange ʻa e kau sevāniti ʻa e ʻOtuá?

¹² Talu pē mei he kamata pule ʻa Sīsū ʻi he 1914, kuó ne sivi ʻa e founga ʻoku fokotuʻutuʻu ai ʻa e kau sevāniti ʻa e ʻOtuá ke fai ʻa e finangalo ʻene Tamaí. (Lau ʻa e ʻAisea 60:17.) ʻI he 1919, naʻe fakanofo ha talēkita ngāue ʻi he fakatahaʻanga taki taha ke takimuʻa ʻi he ngāue fakamalangá. ʻI he 1927, naʻe kamata ke ngāue fakamalanga maʻu pē ʻa e ngaahi fakatahaʻangá ʻi he Sāpaté. ʻI he 1931, naʻe kamata ngāueʻaki ai ʻe he kau sevāniti ʻa Sihová ʻa e hingoa Kau Fakamoʻoni ʻa Sihová, ʻa ia naʻá ne ueʻi lahi kinautolu ke fai ha meʻa lahi ange ʻi he ngāue ʻo e Puleʻangá. (ʻAi. 43:10-12) Kamata ʻi he 1938, ko e faʻahinga naʻa nau takimuʻa ʻi he fakatahaʻangá naʻe ʻikai ke toe fili ia ʻe he kakaí. Ka, naʻe fakanofo kinautolu. ʻI he 1972, ko e fatongia ʻo hono tokangaʻi ʻa e fakatahaʻangá naʻe ʻoatu ia ki ha kulupu ʻo e kau mātuʻá kae ʻikai ko ha tokoua pē ʻe taha. Ko e faʻahinga kotoa ʻoku nau taau ke hoko ko e kau mātuʻa mo e kau sevāniti fakafaifekaú naʻe fakalototoʻaʻi ke nau loto-lelei ke tokoni ki hono tauhi ʻa e fakatahaʻangá. (1 Pita 5:2) ʻI he 1976, naʻe fokotuʻutuʻu ʻa e Kulupu Pulé ki he kōmiti ʻe ono ke tokangaʻi ʻa e ngāue ʻo e Puleʻangá ʻi māmani lahí. Talu mei ai, kuo hokohoko ai pē hono fokotuʻutuʻu ʻe Sīsū hono kau muimuí ke nau fai ʻa e ngaahi meʻá ʻi he founga ʻa e ʻOtuá.

13. Kuo anga-fēfē hono ueʻi koe ʻe he meʻa kuo fakahoko ʻe he Tuʻi Faka-Mīsaiá lolotonga ʻene pulé?

¹³ Fakakaukau ki he lahi ʻo e meʻa kuo fakahoko ʻe he Tuʻi Faka-Mīsaiá lolotonga ʻa e ʻuluaki taʻu ʻe 100 ʻene pulé. Kuó ne fakamaʻa ha kulupu ʻo e kakai ke fakafofongaʻi ʻa Sihova. Kuó ne tataki ʻa e ngāue malangaʻi ʻo e ongoongo leleí ʻi he fonua ʻe 239 pea akoʻi mo e laui miliona ke lotu kia Sihova. Kuó ne fakafāʻūtahaʻi ʻa e kau muimui mateaki laka hake he toko fitu milioná ʻa ia ʻoku nau loto-lelei ke foaki atu kinautolu ke fai ʻa e finangalo ʻo ʻene Tamaí. (Saame 110:3) Kuo ngāueʻaki ʻe Sihova ʻa e Puleʻanga Faka-Mīsaiá ke fai ʻa e ngaahi meʻa fakaofo moʻoni. Ka ʻe hoko ha ngaahi meʻa fakafiefia lahi ange ʻi he kahaʻú!

NGAAHI TAPUAKI ʻI HE KAHAʻÚ ʻO E PULEʻANGA FAKA-MĪSAIÁ

14. (a) Ko e hā ʻoku tau kole ke fai ʻe he ʻOtuá ʻi he taimi ʻoku tau lotu ai: “Tuku ke hoko mai ho Puleʻangá”? (e) Ko e hā ʻetau konga tohi fakataʻu ki he 2014, pea ko e hā ʻoku feʻungamālie aí?

¹⁴ Neongo naʻe fakakalauni ʻe Sihova hono ʻAló, ʻa Sīsū Kalaisi, ko e Tuʻi Faka-Mīsaiá ʻi he 1914, naʻe ʻikai ko e tali kakato ia ki heʻetau lotu “tuku ke hoko mai ho Puleʻangá.” (Māt. 6:10) Naʻe tomuʻa tala ʻe he Tohi Tapú ko Sīsuú ʻe “bule i he lotolotoga” ʻo hono ngaahi filí. (Saame 110:2, PM) ʻOku kei fakafepakiʻi pē ʻe he ngaahi puleʻanga fakaetangata ʻi he malumalu ʻo e pule ʻa Sētané ʻa e Puleʻangá. ʻI he taimi ʻoku tau lotu ai ke hoko mai ʻa e Puleʻanga ʻo e ʻOtuá, ʻoku tau kole ki he ʻOtuá ke toʻo atu ʻe he Puleʻanga Faka-Mīsaiá mo e ngaahi tuʻi ʻe 144,000 ʻi hēvaní ʻa e pule fakaetangatá mo e faʻahinga ʻi he māmaní ʻoku nau fakafepakiʻi ʻa e Puleʻangá. ʻI he taimi ʻe hoko ai ʻa e meʻá ni, ʻe fakahoko ai ʻa e kikite ʻi he Taniela 2:44. ʻOku pehē ai ko e Puleʻanga ʻo e ʻOtuá “te ne laiki mo fakaʻauha ʻa e ngaahi puleʻanga ko ia.” Te ne fakaʻauha ʻa e ngaahi puleʻanga ʻa ia ko e ngaahi fili ʻo e Puleʻanga ʻo e ʻOtuá. (Fkh. 6:1, 2; 13:1-18; 19:11-21) Koeʻuhi ʻe vavé ni ʻaupito ke hoko ʻa e meʻá ni, ʻoku feʻungamālie ai ʻetau konga tohi fakataʻu ki he 2014 ko e Mātiu 6:10: “Tuku ke hoko mai ho Puleʻangá.” Ko e taʻu eni ʻe 100 talu ʻa e kamata pule ʻa Sīsū ʻi hēvaní!

15, 16. (a) Ko e hā ʻa e ngaahi meʻa fakafiefia ʻe hoko lolotonga ʻa e pule taʻu ʻe 1,000 ʻa Kalaisí? (e) Ko e hā ʻa e meʻa fakaʻosi ʻe fai ʻe Sīsū ko ha Tuʻi Faka-Mīsaiá? Ko e hā ʻa e kaunga ʻo e meʻa ko iá ki he taumuʻa ʻa Sihová?

¹⁵ Hili hono fakaʻauha ʻe Sīsū ʻa e ngaahi fili ʻo e ʻOtuá, te ne lī ʻa Sētane mo ʻene fanga tēmenioó ki he luo taʻehanotakelé ʻi ha taʻu ʻe 1,000. (Fkh. 20:1-3) ʻI he puli atu ʻa e tākiekina kovi ko iá, ʻe ngaʻunu vave ʻa e Puleʻangá ke tokoniʻi ʻa e kakaí ke maʻu ʻaonga mei he feilaulau huhuʻi ʻa Sīsuú, pea te ne toʻo ʻosi atu ʻa e ngaahi nunuʻa ʻo e angahala ʻa ʻĀtamá. ʻE fokotuʻu hake ʻe he Tuʻí ʻa e kakai ʻe laui miliona mei he maté pea te ne fokotuʻutuʻu ha polokalama fakaeako ʻi māmani lahi ke akoʻi kinautolu fekauʻaki mo Sihova. (Fkh. 20:12, 13) ʻE hoko ʻa e foʻi māmaní kotoa ko ha palataisi hangē pē ko e ngoue ʻo ʻĪtení, pea ʻe hoko ʻa e faʻahinga faitōnunga kotoa ʻo e tangatá ʻo haohaoa.

¹⁶ Hili ʻa e pule taʻu ʻe 1,000 ʻa Kalaisí, ʻe fakahoko ʻa e taumuʻa ʻa Sihova ki he māmaní. ʻE fakafoki leva ʻe Sīsū ʻa e Puleʻangá ki heʻene Tamaí. (Lau ʻa e 1 Kolinitō 15:24-28.) ʻE ʻikai ʻaupito te tau toe fiemaʻu ha taha ke ne fakafofongaʻi kitautolu kia Sihova. Ko e kotoa ʻo e ngaahi foha ʻo e ʻOtuá ʻi hēvani mo ʻene fānau ʻi he māmaní te nau fāʻūtaha mo ʻenau Tamai fakahēvaní ko ha konga ʻo hono fāmili fakaeʻunivēsí.

17. Ko e hā ʻokú ke fakapapauʻi ke fai maʻá e Puleʻangá?

¹⁷ Ko e ngaahi meʻa fakafiefia lolotonga ʻa e pule taʻu ʻe 100 ko eni ʻa e Puleʻangá ʻoku fakahaaʻi mai ai ʻoku kei pule ʻa Sihova pea ko ʻene taumuʻa ki he māmaní ʻe hoko moʻoni. ʻOfa ke tau tauhi mateaki ai pē kiate ia pea tuʻuaki ʻa e Tuʻí mo hono Puleʻangá. ʻOku tau falala-pau ʻe vavé ni ke tali ʻe Sihova ʻetau lotu: “Tuku ke hoko mai ho Puleʻangá”!