TALI ʻO E NGAAHI FEHUʻI FAKATOHITAPÚ

Ko e hā ʻoku tuku tauhi mai ʻi he kahaʻú ki he faʻahinga ʻo e tangatá?

ʻOku ʻikai ha veiveiua ʻe hokohoko atu hono fai ʻe he faʻahinga ʻo e tangatá ʻa e ngaahi fakalakalaka fakasaienisi. Ka te nau malava ʻiate kinautolu pē ke fokotuʻu ha sōsaieti ʻa ia ʻe fetokangaʻaki moʻoni ai ʻa e kakaí? ʻIkai. ʻI he ʻahó ni, ʻoku tākiekina ʻa e māmaní ʻe he siokitá mo e mānumanú. Kae kehe, ʻoku fakataumuʻa ʻe he ʻOtuá ha meʻa ʻoku lelei ange maʻá e faʻahinga ʻo e tangatá.—Lau ʻa e 2 Pita 3:13.

ʻOku fakamatalaʻi ʻi he Folofola ʻa e ʻOtuá ha sōsaieti fakamāmani lahi ʻi he kahaʻú ʻa ia ʻe feʻofaʻaki ai ʻa e kakaí. ʻE nofo malu ai ʻa e kakaí pea ʻe ʻikai ke toe ʻi ai ha taha te ne fai ha maumau kiate kinautolu.—Lau ʻa e Maika 4:3, 4.

ʻE anga-fēfē hono toʻo ʻosi atu ʻa e siokitá?

Naʻe muʻaki fakatupu ʻe he ʻOtuá ʻa e tangatá ʻo ʻikai ʻi ai ha hehema siokita. Ka ʻi he fili ke talangataʻa ki he ʻOtuá, naʻe mole ai mei he ʻuluaki tangatá ʻa ʻene haohaoá. ʻOku tau maʻu tukufakaholo ʻa e hehema siokitá meiate ia. Pea ʻe vavé ni, ke ngāueʻaki ʻe he ʻOtuá ʻa Sīsū ke ne fakafoki ʻa e faʻahinga ʻo e tangatá ke haohaoa.—Lau ʻa e Loma 7:21, 24, 25.

ʻI he fehoanaki mo e finangalo ʻo e ʻOtuá, naʻe pekia ʻa Sīsū ko ha feilaulau pea toʻo ʻosi atu ai ʻa e nunuʻa ʻo e talangataʻa ʻa e ʻuluaki tangatá. (Loma 5:19) ʻOku ʻai ai ʻe Sīsū ke malava ʻo maʻu ha kahaʻu fakaofo ʻa ia ʻe tauʻatāina ai ʻa e kakaí mei he hehema siokita ke faihalá.—Lau ʻa e Saame 37:9-11.