Ko ha Talanoa Mahuʻinga

ʻOku makehe atu ʻa e Tohi Tapú ʻi he kotoa ʻo e ngaahi tohi fakalotú. ʻOku ʻikai ha toe tohi te ne lava ke tākiekina ʻa e tui ʻa e tokolahi ʻi he faai mai ʻa e taimí. ʻI he taimi tatau, kuo ʻikai ke toe ʻi ai mo ha tohi kehe kuo lahi hono fehuʻia mo fakaangaʻí.

Ko e fakatātaá, ko e kau mataotao ʻe niʻihi ʻoku nau veiveiua ki he falalaʻanga ʻa e Tohi Tapu ʻi onopōní mei hono muʻaki tohí. “ʻOku ʻikai ke mau fuʻu fakapapauʻi pe naʻe tonu ʻemau toe fokotuʻutuʻu ʻa e muʻaki tohí,” ko e lau ia ha palōfesa ʻo e ngaahi ako fakalotú. “Ko e ngaahi tatau pē ʻoku mau maʻú ʻoku fehālaaki pea ko e lahi taha ʻi he ngaahi tatau ko ení kuo toʻo ia mei he muʻaki tohí ʻi ha laui senituli pea lahi ange hona kehekehé ʻi he ngaahi founga lahi.”

ʻOku fehuʻia ʻe he niʻihi ʻa e alafalalaʻanga ʻa e Tohi Tapú koeʻuhi ko honau puipuituʻa fakalotú. Ko e fakatātaá, ko Faizal, naʻe akoʻi ia ʻe hono fāmili ʻikai ko ha Kalisitiané ko e Tohi Tapú ko ha tohi māʻoniʻoni ia ka kuo liliu. “Ko hono olá, naʻá ku huʻuhuʻu, ʻi he taimi ʻoku loto ai ʻa e kakaí ke talanoa mai ʻo fekauʻaki mo e Tohi Tapú,” ko ʻene leá ia. “ʻOsi ko iá, kuo ʻikai te nau maʻu ʻa e muʻaki Tohi Tapú. Kuo fulihi!”

ʻOku mahuʻinga pe naʻe fulihi ʻa e Tohi Tapú? Sai, fakakaukau ki he ngaahi fehuʻi ko ení: ʻOku lava ke ke falala ki he ngaahi talaʻofa fakafiemālie ʻa e Tohi Tapú ki he kahaʻú ʻo tatau ai pē pe naʻá ke ʻiloʻi ko e ngaahi talaʻofa ko ení naʻe ʻi he muʻaki tohí? (Loma 15:4) Te ke ngāueʻaki ʻa e ngaahi tefitoʻi moʻoni mei he Tohi Tapú ke makatuʻunga mei ai haʻo ngaahi fili mafatukituki ʻo fekauʻaki mo hoʻo ngāué, fāmilí pe lotú kapau ko e Tohi Tapu ʻi onopōní kuo fakameleʻi ʻi hono hiki ʻe he kau tangatá?

Neongo naʻe mole ʻa e muʻaki ngaahi tohi ʻo e Tohi Tapú, ʻoku lava ke tau ngāueʻaki ʻa e ngaahi tatau ʻi he kuonga muʻá​—ʻo kau ai ʻa e maniusikilipi ʻe laui afe ʻo e Tohi Tapú. Naʻe anga-fēfē ʻa e kei hao ʻa e ngaahi maniusikilipi ko ení mei haʻane popo, fakafepakí mo e ngaahi liliu taʻefakamafaiʻi naʻe fai ki he Tohi Tapú? ʻE lava fēfē ke ke tuipau ki he alafalalaʻanga ʻa e Tohi Tapu ʻoku maʻu ʻi onopōní? Sio ki he tali ʻo e ngaahi fehuʻi ʻi he hoko atu ʻa e talanoa ki he tukuʻau mai ʻa e Tohi Tapú.