Fakahoa ʻAonga Taha Kuó Ke Faí
KUÓ KE fakapapauʻi ke hoko ko ha Kalisitiane? Kapau ko ia, kuó ke kau ʻi he toko ua piliona tupu ʻo e kakai ʻi he māmaní—ʻa ia meimei ko e toko taha ʻi he toko tolu kotoa pē—ʻoku nau taukaveʻi ko e kau muimui ʻo Kalaisi. ʻI he ʻahó ni, ʻoku laui afe ʻa e ngaahi lotu ʻoku ui ko e Kalisitiane, ka neongo ia ʻoku nau māvahevahe ʻi he ngaahi tokāteline fepakipaki mo e fakakaukau kehekehe. Ko ia mahalo ʻe kehe nai hoʻo tuí mei he niʻihi ʻoku nau taku ko e kau Kalisitiane. ʻOku ʻi ai hano mahuʻinga ʻo e meʻa ʻokú ke tui ki aí? ʻIo ʻoku pehē—kapau ʻokú ke loto ke fai ʻa e meʻa ʻoku akoʻi ʻe he Lotu faka-Kalisitiané mei he Tohi Tapú tonu.
Ko e ʻuluaki kau muimui ʻo Sīsū Kalaisí naʻa nau ʻiloa ko e ‘kau Kalisitiane.’ (Ngāue 11:26) Naʻe ʻikai toe fiemaʻu ha ngaahi hingoa kehe ke fakaʻilongaʻi ʻaki kinautolu, koeʻuhí naʻe taha pē ʻa e tui faka-Kalisitiané ia. Naʻe muimui fāʻūtaha ʻa e kau Kalisitiané ki he akonaki mo e fakahinohino ʻa e tokotaha naʻá ne Fokotuʻu ʻa e Lotu faka-Kalisitiané ʻa Sīsū Kalaisi. Kae fēfē lotu ʻokú ke kau ki aí? ʻOkú ke tui ʻokú ne akoʻi ʻa e meʻa naʻe akoʻi ʻe Kalaisí mo e meʻa naʻe tui ki ai ʻa e muʻaki kau muimui ʻo Kalaisí? ʻE lava fēfē ke ke fakapapauʻi ia? ʻOku ʻi ai e founga pē ʻe taha—ko hono ngāueʻaki ʻa e Tohi Tapú ko ha lula fua.
Fakakaukau ki heni: Ko Sīsū Kalaisi naʻá ne maʻu ʻa e fakaʻapaʻapa loloto ki he Tohi Tapú ko e Folofola ʻa e ʻOtuá. Naʻe ʻikai ke ne tali ʻa e faʻahinga naʻa nau huʻi ʻa e akonaki Fakatohitapú ʻaki hono fakamuʻomuʻa ʻa e akonaki faʻu ʻe he tangatá. (Maʻake 7:9-13) ʻE lava ke tau fakaʻosiʻaki ko e kau muimui moʻoni ʻo Sīsuú ʻoku makatuʻunga ʻenau tuí ʻi he Tohi Tapú. Ko ia ai, ko e Kalisitiane taki taha ʻoku lelei ke ʻeke hifo kiate ia tonu, ‘ʻOku fehoanaki ʻa e akonaki ʻi he Tohi Tapú mo e lotu ʻoku ou kau ki aí?’ Ke tali ʻa e fehuʻi ko iá, ko e hā ʻoku ʻikai ke ke fakahoa ai e akonaki ʻa e lotu ʻokú ke kau ki aí mo e meʻa ʻoku leaʻaki he Tohi Tapú?
ʻOku pehē ʻe Sīsū ko ʻetau lotu ki he ʻOtuá kuo pau ke makatuʻunga ia ʻi he moʻoní—ko e moʻoni ko iá ʻoku maʻu ʻi he Tohi Tapú. (Sione 4:24; 17:17) Pea naʻe pehē ʻe he ʻapositolo ko Paulá ʻe makatuʻunga hotau fakahaofí ʻi he hoko ʻo maʻu ʻa e “ʻilo totonu ki he moʻoní.” (1 Tīmote 2:4) Ko ia ʻoku mātuʻaki mahuʻinga ʻetau tuí ke makatuʻunga ʻi he ʻilo totonu ki he moʻoni ʻo e Tohi Tapú. Ko hono ʻuhingá, ʻe makatuʻunga mei ai hotau fakahaofí!
FOUNGA KE FAKAHOA ʻETAU TUÍ MO E TOHI TAPÚ
ʻOku mau fakaafeʻi atu koe ke lau ʻa e ngaahi fehuʻi ʻe ono ko ení pea fakatokangaʻi e tali ʻa e Tohi Tapú ki he ngaahi fehuʻi ko iá. Sio ki he ngaahi konga Tohi Tapu ʻoku haá pea fakakaukauloto ki he talí. ʻEke hifo kiate koe, ‘ʻOku fēfē akonaki ʻa e lotu ʻoku ou kau ki aí ʻi hono fakahoa ki he meʻa ʻoku leaʻaki ʻe he Tohi Tapú?’
Ko e kiʻi fehuʻi nounou ko ení ʻe tokoniʻi ai koe ke fai ʻa e fakahoa ʻaonga tahá. ʻOkú ke loto-lelei ke fakahoa ʻa e ngaahi akonaki kehe ʻi he lotu ʻokú ke kau ki aí mo e meʻa ʻoku leaʻaki ʻe he Tohi Tapú? ʻOku fiefia ʻa e Kau Fakamoʻoni ʻa Sihová ke tokoniʻi koe ke sivisiviʻi māʻalaʻala ʻa e mahino moʻoni ʻo e Tohi Tapú. Ko e hā ʻoku ʻikai ke ke kole ai kia kinautolu ki ha ako Tohi Tapu taʻetotongi? Pe ko hoʻo ʻaʻahi ki heʻemau uepisaiti, jw.org.