“Ko e Meʻaʻofa Lelei Taha Ia Kuo Faifai Ange Peá U Maʻu”

Ko e anga ia ʻo e ongoʻi ʻa e kiʻi taʻahine taʻu 13 ʻi heʻene maʻu ha kiʻi kulī pusiaki ko ha meʻaʻofa. Naʻe pehē ʻe ha fefine pisinisi lavameʻa ko e komipiuta naʻe ʻoange ʻe heʻene tamaí ʻi heʻene kei ʻi he ako māʻolungá ko ha meʻaʻofa ia naʻá ne liliu ʻene moʻuí. Naʻe ongoʻi ʻe ha husepāniti toki mali foʻou ko e fuofua kaati fakamanatu ʻo ʻena nofo malí naʻe ngaohi ʻe hono uaifí ʻa e meʻaʻofa lelei taha kuo faifai ange peá ne maʻú.

ʻI he taʻu taki taha, ʻoku fakamoleki ʻe he kakai tokolahi ʻa e taimi mo e ivi ʻi he kumi ki he meʻaʻofa “lelei taha” ko ia ki ha kaumeʻa pe ki ha kāinga ʻi ha taimi makehe. Pea ʻoku saiʻia ʻa e faʻahinga tokolahi taha ʻi he fanongo ki he tali hangē ko ia naʻe lave ki ai ʻi he kamataʻangá. Fēfē koe? Te ke saiʻia ke ke malava ke foaki pe maʻu ha ngaahi meʻaʻofa ʻoku fakahoungaʻi moʻoni?

ʻOku lava ke mātuʻaki fakamānako ʻa e ʻamanaki ko iá, ʻo ʻikai koeʻuhi pē ko e ola ʻoku hoko ki he tokotaha ʻokú ne maʻu ʻa e meʻaʻofá ka ʻoku toe pehē foki ki he ongoʻi ʻoku maʻu ʻe he tokotaha foakí. He ʻoku pehē ʻe he Tohi Tapú: “ʻOku ʻi ai ʻa e fiefia lahi ange ʻi he foaki atú ʻi he maʻu maí.” (Ngāue 20:35) Ko e moʻoni, ko e fiefia ʻoku maʻu ʻi he foaki atú ʻe lava ke tupulaki kapau ʻoku fakamahuʻingaʻi moʻoni ʻa e meʻaʻofá ʻe he tokotaha ʻoku ʻave ki aí.

ʻE lava fēfē leva ke ke ʻai hoʻo meʻaʻofá ko ha matavai ʻo e fiefia moʻoni kiate koe mo e tokotaha ʻoku ʻave ki aí? Pea kapau ʻoku ʻikai lava ke foaki ʻa e meʻaʻofa “lelei taha,” ko e hā ʻe lava ke ke fai ke fakahoungaʻi moʻoni ʻa hoʻo meʻaʻofá?