Tokoni ki he Niʻihi Kehé ke Nau Ako ʻo Kau ki he Moʻungaʻi Tangata
1 ʻOku tokolahi kuo nau lau ʻa e tohi ko e The Greatest Man Who Ever Lived kuo nau fakahā ʻenau houngaʻia loto-moʻoni ki he lelei kuó fakahoko ʻe he tohí ni ki heʻenau moʻuí. Naʻe tohi ʻe ha tokotaha: “ʻI heʻeku aʻu ki he ngataʻanga ʻo e tohí, naʻá ku ongoʻi hangē kuo fakaafeʻi au ʻe Sīsū ke feohi mo ia, ke nofo ʻi hono tafaʻakí, ke kau ʻi hono ngaahi mamahí, mo ʻene ngaahi ongoʻí mo e tafaʻaki hono kotoa pē ʻo ʻene ngāue fakamalangá. . . . Ko hono lau ʻo e tohí ʻoku hangē ia haʻate mamata ki ha filimi ʻo kau ki he moʻui ʻa Sīsuú.”
2 ʻOku tokoniʻi kitautolu ʻe he tohi ko e Greatest Man ke toe lelei ange ʻetau ʻiló ʻo ʻikai ngata pē ʻia Sīsū kae toe pehē foki kia Sihova. (Sione 14:9) Ko e lau ʻeni ʻa ha taha taʻu 12 hono motuʻá ʻo kau ki he tohí: “ʻI heʻeku lau iá naʻe lahi fau ʻa e fakafiemālie mei ai kiate aú pea u lotu leva kia Sihova mou fakatē-loʻimata ʻi he fiefia. Naʻá ku ongoʻi loloto ʻa e fakapapauʻi ʻoku tokanga mai ʻa Sihova mo Sīsū kiate kitautolu.” Naʻe pehē ʻe Sīsū, ʻa ia ʻoku hiki ʻi he Sione 17:3, ʻe maʻu ʻa e moʻui taʻengatá ʻe kitautolu ʻi he ʻiloʻi ʻa Sihova mo hono ʻAló. Ko hono ako ʻo e tohí ni ʻo kau ki he moʻui ʻa Sīsuú ʻokú ne ʻomai ai kiate kitautolu ʻa e mahino makehe ki he ʻulungaanga ʻo Sihová koeʻuhi ko Sīsū ko e “imisi ʻo ʻEne ʻAfio moʻoni.”—Hep. 1:3.
3 Kuo pulusi ʻo lahi hake ʻi he ngaahi tatau ʻe 19 miliona ʻo e tohi ko e Greatest Man pea lahi hake ʻi he ngaahi lea kehekehe ʻe 70. ʻOku hā heni ʻa hono tali lelei ʻo e tohí. Ko e tokolahi kuo nau lau fakakātoa ʻa e tohí ʻi he vave taha pē ʻo ʻenau maʻu iá. Ko e tangata mahuʻingaʻia ʻe taha ne ʻosi ʻene lau ʻa e tohí ʻi he teʻeki ai ke ʻosi ʻa e uike ʻe ua. Naʻe pehē ʻe he faifekau ʻe taha naʻá ne maʻu ʻa e tohí: “ʻOku ʻikai te u lava ke tuku hono lau ʻo e tohí. Ko au mo hoku uaifí ʻokú ma lau ha konga ʻo e tohí ʻi he pō kotoa pē peá ma toki mohe.”
4 Fakamoʻoni ʻIkai ʻi he Founga Anga-Maheni: Ko e tokoua ʻe taha naʻá ne fakahāhā ʻa e tohi ko e Greatest Man ki he kakai ʻi he ngāueʻanga ʻokú ne ʻi aí. Naʻe mafola ʻa e talanoa ʻokú ne maʻu ʻa e tohi ko ení, pea ʻalu takai ʻa e fakamatala ʻo kau ki he meʻa ʻoku ʻi he tohí. Naʻe hanga ʻe hono kaungāngāué ʻo hiki ha fakahokohoko ʻo kinautolu ʻoku nau fiemaʻu ha tatau. Naʻá ne tuku ai ʻa e ngaahi tohi ʻe 461! Ko e toko nima ʻo e faʻahinga naʻa nau maʻu iá ʻoku nau lolotonga ako. Ko ha tuofefine ʻe taha, lolotonga ʻene fononga ʻi ha vakapuna, naʻá ne ʻoatu ʻa e tohi ko e Greatest Man ki ha pātele ʻa ia ko ʻene ʻalu ki ha fakanofo ʻo ha kātinale foʻou. Naʻe ʻi he Vatikanó ʻa e pātelé ni feʻunga mo e taʻu ʻe 40. ʻOku totonu kiate kitautolu kotoa ke tau ngāuekakatoʻaki ʻa e ngaahi faingamālié ke fakahā atu ki he niʻihi kehé ʻoku ʻaonga ke nau lau ʻa e tohí ni.
5 ʻOku Loto-Hounga ki ai ʻa e Kau Talavou: ʻOku fakahā ʻe he kau talavoú ʻa e mahuʻingaʻia lahi ʻi he tohí ni. Naʻe tohi ha taha taʻu hiva hono taʻu motuʻá: “Ko e tohi ʻoku ou manako taha aí ko e The Greatest Man who Ever Lived koeʻuhi ʻoku lahi ʻa e meʻa ʻoku ou ako mei ai.” ʻI heʻetau fetaulaki mo e kau talavou ʻi he ngāue fakamalangá, ʻoku totonu ke tau tuku ha taimi feʻunga kapau ʻe fakangofua ʻe heʻenau ngaahi mātuʻá, ke fakahā ki he kau talavou ko ʻení ʻa e tohí pea vakai ki ha ngaahi meʻa mahuʻinga ai mo e ngaahi fakatātā ʻe niʻihi. Te tau lava nai ke tuku ha ngaahi tohi ki he kau talavou ko ʻení. ʻI hono tuku ha faingamālie ke maʻu ha ʻilo ʻo kau kia Sīsū, ʻoku fēongoaki ʻa e kau talavoú mo ia. Ko ha tokotaha anga-faingofua ʻa Sīsū.—Mt. 19:14, 15.
6 Ko hono lau ʻo e tohi ko e Greatest Man ʻe lava ke ne liliu ʻa e moʻui ʻa e kakaí. Feinga ke ʻai ke alāanga ʻa e tokolahi taha te ke malavá ki he ngaahi meʻa ʻoku ʻi he tohí. Ngāueʻaki ʻa e fakamatala ʻi he peesi fakaʻosi ʻo e talateu ʻo e tohí, ʻi he kaveinga tokoni ko e “Benefit by Learning About Him.” Ko e fakamatala ko ʻení te ne tokoniʻi ʻa e kakaí ke fakahangataha ki he meʻa te nau lava ke maʻu mei hono lau ʻo e tohí. Ko e tokolahi ʻi ho kauhalá te nau lea nai ʻo hangē ko ia naʻe fai ʻe ha tokotaha ʻi he ʻosi ʻene lau ʻa e tohí: “Ko e tohi lelei taha ia kuo u lau ʻi ha taimi! Kuó ne liliu ʻeku moʻuí.”