ʻOku Fie Maʻu Ke u Liliu Maʻu Pē?

ʻOku ʻi he Ko ʻEtau Ngāue Fakafaifekau ʻo e Puleʻangá kotoa pē ʻa e ngaahi founga malanga kehekehe makatuʻunga ʻi he Tohi Tapú ʻoku lava ke tau ngāueʻaki ʻi he ngāue fakamalangá. Ko e kau malanga tokolahi ʻoku ngāue lahí ʻoku nau vēkeveke ke maʻu ha ngaahi fakakaukau foʻou pea ngāueʻaki ʻa e ngaahi founga malanga kehekehe. ʻOku tokoniʻi kinautolu ʻe he Ko ʻEtau Ngāue Fakafaifekau ʻo e Puleʻangá ʻaki hono tokonaki mai ʻa e ngaahi fokotuʻu ʻi he māhina taki taha.

Kae kehe, mahalo pē ʻokú ke fakakaukau ʻoku ʻikai fie maʻu ke ke liliu maʻu pē ʻa e meʻa ʻokú ke ngāueʻakí. ʻOkú ke maʻu nai ha ngaahi houa siʻi pē ʻi he māhina taki taha ke ke kau ai ʻi he ngāue fale-ki-he-falé. ʻI he faai mai ʻa e taimí, kuó ke maʻu ha ngaahi founga malanga ʻe niʻihi ʻa ia ʻokú ke ongoʻi fiemālie ke ngāueʻaki, pea ʻokú ke maʻu ʻa e ngaahi ola lelei ʻi hoʻo ngāueʻaki iá. ʻOkú ke falala nai ki ha konga Tohi Tapu ʻoku lahi hono ngāueʻakí, ʻo kau ai mo e Sāme 37:​9-11, 2 Pita 3:​13, Fakahā 21:4, mo e niʻihi kehe. Kapau ʻoku pehē, ʻoku ʻikai fie maʻu ke ke ongoʻi kuo pau ke ke liliu maʻu pē ki ha meʻa kehe. Ko ʻetau taumuʻa tefitó ke fakahā atu ki he niʻihi kehé ʻa ʻetau ʻamanaki ʻo fekauʻaki mo e Puleʻangá pea ke tokoniʻi kinautolu ke nau ako ki he meʻa kuo pau ke nau fai ke nau taau ai ke nau maʻu ʻa e tāpuaki ʻa Sihová. Kapau te ke maʻu ʻa e ngaahi founga malanga faingatonu mo lelei ʻi he tohi Reasoning ʻokú ke saiʻia lahi ange ke ngāueʻakí pea ʻoku lelei ʻa e anga ʻo e tali ki aí, ʻoua ʻe toumoua ke ngāueʻaki kinautolu.