Ko Hono Kumi ʻa e Faʻahinga Fie Fanongó ʻo Fakafou ʻi he Fakamoʻoni Ola Lelei ʻi he Halá

¹ Naʻe tuʻutuʻuni ʻe Sīsū ki heʻene kau ākongá ke nau kumi ʻa kinautolu ʻoku taau ke fanongo ki he ongoongo lelei ʻo e Puleʻangá. (Mt. 10:11) Ka neongo iá, ʻi he ngaahi feituʻu lahi ʻi he ʻahó ni, kuo hoko ʻo faingataʻa pea toe faingataʻa ange ke feʻiloaki mo e kakaí ʻi honau ngaahi ʻapí. Ko ia, ko e hā ʻe malava ke fai kae aʻu ai ki he faʻahinga ʻoku tāu kuo ʻikai te tau aʻu ki aí?

² Ko e ngāue fakamoʻoni ʻi he halá ʻoku malava ke hoko ia ko ha founga ola lelei ke maʻu ai ʻa e kakai naʻe ʻikai te tau maʻu ʻi he ngāue fale-ki-he-falé. ʻOku malava ke tau fai ʻa e ngāue fakamoʻoni ʻi he halá ʻi he ngaahi tauʻanga pasí, ko e māketí, ko e ngaahi paʻaké pea mo e ngaahi feituʻu kehe ʻoku ʻalu ki ai ʻa e kakaí ʻi heʻenau ngāue fakaʻahó.

³ ʻI he lave ki he ngāue fakamoʻoni ʻi he halá, ʻoku ongoʻi manavasiʻi ʻa e niʻihi. ʻOku nau veiveiua nai ke kau ki he ngāue ko iá koeʻuhi ʻoku nau hehema ke mā pe kuo nau toka fakakaukauʻi ʻa hono keuʻi ia ʻe he kakai ʻoku nau fihufihutāmaki ki he pōpoaki ʻo e Puleʻangá. Ko e ngaahi loto-moʻua ko ʻení ʻoku ʻikai ke faʻa hoko ia. ʻOku pehē ʻe kinautolu ʻoku nau taukei ʻi he ngāue ko ʻení ʻoku faingofua ange ia ʻi he ngāue fakamoʻoni ʻi he matapā ki he matapaá. Ko hono moʻoní, ʻoku nau ʻilo ko e tokolahi taha ʻo e kakaí kuo nau anga ki he lea ange ki ai ha toko taha ʻi he halá ʻi he ngaahi ʻuhinga kehekehe, pea ko e niʻihi ʻoku nau hehema lahi ke fetalanoaʻaki pe fie fanongo ange ʻi he taimi ko ení ʻi he taimi ʻoku tau tukituki ai ʻi honau matapaá. Kapau te tau ‘maʻu ʻa e fai mālohi,’ te tau ʻohovale nai ʻi he ngaahi ola lelei.​—1 Tesalonaika 2:2.

⁴ ʻOku malava fēfē ke fai ola lelei taha ʻa e ngāue ʻi he halá? ʻOku mahuʻinga ke teuteu lelei. ʻUluaki lau ʻa e makasiní, pea fili ha poini mahuʻinga ʻe taha pe ua ʻokú ke pehē ʻe mahuʻinga ki he kakai te ke fetaulaki mo iá. ʻOku feʻungamālie ʻa e tuʻuaki ʻoku sēkoni ʻe 30 pē hono lōloá. Pea koeʻuhi ko e taumuʻá ke fai ha fetuʻutaki fakaekita mo e niʻihi kehé, fili ha feituʻu ʻa ia ʻoku tokolahi ai ʻa e kakai ʻoku fononga aí. Neongo ʻe fakapotopoto nai ke ʻi ai ha toko taha malanga ʻe taha ʻoku ngāue ofi mai pē, ka ʻoku faʻa lelei taha ke na ngāue makehekehe pē. Ko e kau malanga ʻoku nau tuʻu fakatahá te nau hehema nai ke ngāueʻaki ʻa e taimí ke fetalanoaʻaki ai kae ʻikai te nau tokanga kiate kinautolu ʻoku nau loto nai ke fanongo ki he popoaki ʻo e Puleʻangá.

⁵ Ko e tuʻu ʻi ha feituʻu pē ʻe taha ʻo fakaʻaliʻali ai ʻa e ngaahi makasiní ʻoku ʻikai ke ola lelei ia ʻo hangē ko ʻete poto ʻi he ʻuluaki kamata ke fakalea ki he kakaí. Feinga ke mo fesiofaki. Ke ke loto-māfana, anga-fakakaumeʻa, mo fakahangatonu ʻi hoʻo feinga ke kamata ha fetalanoaʻakí. ʻI he taimi lahi, te ke kiʻi luelue fakataha nai mo e toko taha ko iá lolotonga ʻa hoʻo lea kiate iá. Kapau ʻoku maongo ki ai, tuʻuaki ʻa e ngaahi makasiní. Kapau ʻoku fakafisingaʻi ʻa e ngaahi makasiní, te ke loto nai ke tuʻuaki atu ha tuleki.

⁶ ʻOku faʻa lelei taha ke teuteu ha tuʻuaki fuonounou ʻokú ne langaʻi ha fehuʻi pe fai ha fakamatala te ne fakatupunga ha fie fanongo. Kapau ʻoku tali lelei ia, feinga ke maʻu ʻa e hingoa ʻo e toko taha ko iá, tuʻasilá, pea naʻa mo e fika nai ʻo ʻene telefoní koeʻuhi ke ke toe ʻaʻahi ki he tokotaha fie fanongo ko iá. Te ke lea pehē nai: “Kapau ʻokú ke fie ako lahi ange, te u fuʻu fiefia ke ʻaʻahi atu kiate koe ʻi ho ʻapí pe fokotuʻutuʻu ki ha tokotaha Fakamoʻoni ʻe taha ke ne fai ʻa e ʻaʻahi atú.”

⁷ Naʻe fakalea ha toko taha ʻo e kau mātuʻá naʻe kau ki he ngāue fakamoʻoni ʻi he halá ki ha fefine mali pea naʻá ne ʻilo ai ta naʻe teʻeki ai pē ke ʻi ai ha taimi ia ne talanoa ai ʻa e fefiné ia mo e kau Fakamoʻoní ʻi hono ʻapí. Naʻá ne tali ha tohi ʻo ne loto lelei ke ʻaʻahi ange ha tuofefine ki hono ʻapí ʻi ha taimi ʻe faingamālie. Kapau ʻoku tau ola lelei ʻi he ngāue fakamoʻoni ʻi he halá, ʻe toe tokolahi ange ʻa e faʻahinga ʻoku tāu ʻe malava ke maʻu mo tokoniʻí.​—Ng. 17:17.