ʻOku Foaki Ivi ʻa Sihova
1 Koeʻuhi ko e kakai kitautolu ʻa Sihova, kuo ʻomai kiate kitautolu ʻa e ngāue ke malangaʻi ʻa e ongoongo leleí lolotonga ia ʻoku tau kei tauhi hotau ʻulungaangá ke ‘tāu ʻetau fakafeangai ki he Senitaile.’ (1 Pita 2:12; Mt. 24:14) ʻI he vakai ko ia ki he taimi faingataʻá ni pea pehē ki hotau ngaahi vaivaiʻangá mo e tōnounoú, ʻe ʻikai malava ke tau lavaʻi ʻa e ngāué ni ʻiate kitautolu pē. (2 Tīm. 3:1-5) Ko ha toki fiefia ē ka ko kitautolu he ʻe malava ke tau hanga kia Sihova ki ha tokoni!
2 Naʻe kātekina ʻe he ʻaposetolo ko Paulá ʻa e ngaahi ʻahiʻahi lahi. (2 Kol. 11:23-27) Naʻe malava fēfē ke ne fekuki mo e ngaahi meʻá ni mo fakaʻosi ʻa e ngāue naʻe vaheʻi ki aí? Naʻe ʻoange kiate ia ʻe Sihova ʻa e “makehe atu ʻo e mafai.” (2 Kol. 4:7) Naʻe fakahaaʻi ʻe Paula ʻa e tokoni pehē mei he ʻOtuá ʻi heʻene tohi: “ʻOku ou mafeia ʻa e meʻa kotoa pe ʻiate ia ʻoku ne fakakaukaua au.” (Fili. 4:13) ʻE tokoniʻi kitautolu ʻe Sihova ʻi he founga tatau. ʻE malava fēfē ke tau maʻu ʻa e tokoni ko ʻení?
3 ʻAki ʻa e Lotu Taʻetuku: Naʻe naʻinaʻi mai ʻa Sīsū kiate kitautolu ke tau ‘hanganaki kole, kumi pea tukituki,’ ʻo ʻoua ʻe foʻi. (Luke 11:5-10) Ko ʻetau kīkīvoi ʻi he lotú ʻokú ne fakahāhaaʻi ai kia Sihova ʻa e loloto ʻo ʻetau tokangá, ko e lahi ʻo ʻetau holí pea mo e moʻoni ʻo e angi hotau lotó. (Sāme 55:17; 88:1, 13; Loma 1:9-11) Naʻe ʻiloʻi ʻe Paula ʻa e mahuʻinga ʻo e kīkīvoi ʻi he lotú ʻi heʻene naʻinaʻi mai kiate kitautolu ke “lotu taʻetuku.” (1 Tes. 5:17) Ko e lotú ko e taha ia ʻo e ngaahi founga tefito ʻoku tau maʻu ai ʻa e tokoni ʻa Sihová.
4 ʻAki ʻa e Muimui ki he Tataki Fakateokalatí: Ko e “Teokalatí” ʻoku ʻuhingá ko e “puleʻi ʻe he ʻOtua” ʻa ia ʻoku ʻofá. ʻOku tau maʻu ha ʻaonga mei heʻene pulé ʻaki hono tali ʻa hono tuʻunga mafaí mo muimui ʻi heʻene ngaahi fakahinohinó ʻi he ngaahi fili lalahi pea mo e ngaahi fili iiki. ʻOku fakafofongaʻi ʻe he “tamaioeiki agatonu mo boto” ʻa e pule fakateokalatí ʻi he mamani ko ʻení. (Mt. 24:45-47, PM) Kapau ʻoku tau loto ke maʻu ʻa e tāpuaki ʻa Sihová ʻoku mahuʻinga ke ngāue fakataha mo e kautaha ʻa ia ʻoku ngāueʻaki ʻe he “tamaioeiki.” (Fakafehoanaki mo Hep. 13:17.) Ko ʻetau ʻofa māteaki kiate iá mo ʻetau loto-fiefai ke talangofua ki heʻene ngaahi laó ʻe fakapaleʻi ʻe Sihova ʻaki hono ʻomai e ivi ʻoku tau fiemaʻú ʻi hono taimi totonu.—Hep. 4:16.
5 ʻAki e Tauhi ke Vāofi mo Hotau Ngaahi Tokouá: Ko e ʻofá ko e fakaʻilonga ia ʻo e kau ākonga ʻa Sīsuú. (Sione 13:34, 35) ʻI he lahi mo e kehekehe ʻa e ngaahi angaʻitangatá, ʻe malava ke tupu hake ʻi hotau lotolotongá ha fepaki koeʻuhi ko e ngaahi faikehekehe ʻi he angaʻitangata ko iá. ʻOku fiemaʻu ke tau angaʻofa, ʻo fefakamolemoleʻaki. (ʻEf. 4:32) ʻE ʻai ʻe he meʻá ni ke malava ke kei nofo maʻu vāofi mo hotau ngaahi tokouá ʻi he tuí pea ʻoku toe fakalotolahiʻi kitautolu ʻe heʻenau tuʻumaʻu ʻo kātaki ʻi he ʻahiʻahí. “Mou ʻilo ʻoku tatau ʻaupito mo e ngaahi mamahi na ʻa e ngaahi meʻa ʻoku moʻua ai homou faʻahinga ʻi mamani,” ʻoku tau maʻu ʻa e ivi foaki ʻe he ʻOtuá ke fekuki mo e ngaahi mafasia meimei tatau.—1 Pita 5:9.
6 ʻAki e Tauhi Maʻu ha Taimi-Tēpile Lelei ʻo e Ako Fakafoʻituituí: ʻI hono fakamālohiʻi fakalaumālie hotau ngaahi ʻatamaí mo e lotó ʻe malava ai ke tau tauʻi ʻa e ngaahi ʻoho ʻa Sētané. (1 Pita 5:8) Ko ha taimi-tēpile lelei ʻo e ako fakafoʻituituí te ne fakalahi ʻetau ʻilo faka-ʻOtuá. ʻE malava ke tau ngāueʻaki ia ʻi he ʻaho kotoa pē ʻi heʻetau fehangahangai mo e ngaahi palopalemá. Naʻe fakamamafaʻi ʻe Paula ko e “ʻilo kanokano” ʻoku ʻi ai hono kaunga mahuʻinga ʻi hono maʻu ʻo e fakamoʻuí. (1 Tīm. 2:3, 4) ʻOku mātuʻaki fiemaʻu ke kai meʻakai fakalaumālie maʻu pē.
7 Ko e ngaahi tokonaki kotoa pē ʻoku fiemaʻu ke tokoniʻi ai kitautolu ke kei mālohí ʻoku ʻi ai ia ʻo malava ke maʻu fakafou mai ʻi he fakatahaʻanga Kalisitiané. Ko e poupou loto-kakato ki he ngaahi ngāue ko iá te ne fakapapauʻi te tau “haʻele ʻo ʻikai vaivai.”—ʻAi. 40:29-31.