Polokalama ʻAsemipilī Fakafeituʻu Foʻou
1 Kamata ʻi Sepitema, ko e kaveinga ki he ngaahi ʻasemipilī fakafeituʻú ʻe pehē, “Fanongo Pea Ako ke Talangofua ki he Folofola ʻa e ʻOtuá.” Ko e kaveingá ni, ʻe fakatefito ʻi he Teutalōnome 31:12, 13, ʻoku tokonaki mai ai ha makatuʻunga feʻunga ki he polokalamá fakakātoa ke fakaeʻa ai ʻa e ngaahi lēsoni ʻoku fiemaʻu ke tau ako mo ngāueʻakí.
2 Neongo ʻoku tokolahi ʻa e kakai ʻi he ʻahó ni ʻoku nau fanongo ki he ngaahi kupuʻi lea fakamānavaʻi kehe ʻoku fakatupu takiheeʻi, ʻoku ʻi ai ʻa e fiemaʻu mahuʻinga ki he tokotaha taki taha ʻo kitautolu ke fanongo ki he Folofola ʻa e ʻOtuá pea ako ke fai ki ai. (Luke 11:28; 1 Tīm. 4:1) Ko hono ʻuhinga ia, ko e polokalama ʻasemipilī fakafeituʻú kuo fakataumuʻa ia ke tokonaki mai ʻa e fakalototoʻa mo e tokoni maʻá e kau malangá, ngaahi fāmilí, kau mātuʻá, mo e kau tāimuʻá. ʻI he Tokonakí, ʻe ʻi ai ha malanga fakakongokonga konga ʻe fā ʻi he kaveinga ko e “Fekuki mo Hotau Ngaahi Palopalemá—ʻAki ʻa e Fanongo Tokanga ki he Folofola ʻa e ʻOtuá.” Pea ʻi he pongipongi Sāpaté, ʻe ʻi ai ha malanga fakakongokonga ʻoku fakakaveinga ko e “Founga ʻOku Akonaki Ai ʻa e Tohitapú ʻi he Māʻoniʻoní.” Ko e polokalamá fakakātoa te ne ʻomai ʻa e fakalototoʻa fakalaumālie ʻoku ʻikai totonu ke liʻaki ʻe koe mo ho fāmilí.
3 ʻI he Tokonakí mo e Sāpaté fakatouʻosi, ʻe fai ai ʻa e ngaahi fokotuʻu ʻaonga ki he ngāue fakamalangá mo fakahāhaaʻi ia. ʻE toe fakahā ai ʻa e ngaahi meʻa naʻe hokosia mo e ngaahi fakaʻekeʻeke ʻoku fakalototoʻa mo fakatupu-ʻilo. Ko ia, ke ke ʻi ai pea mo fanongo, mo ha vakai atu ke ngāueʻaki ʻa e meʻa ʻokú ke akó, te ke ʻi ha tuʻunga lelei ange ai ke fai kakato ʻa e ngaahi fekau ʻa e Folofola ʻa e ʻOtuá.
4 Ko e taha ʻo e ngaahi meʻa tuʻu-ki-muʻa ʻo e ʻasemipilī fakafeituʻú ko hono papitaiso ʻo e ngaahi tokoua mo e tuofāfine fakatapui foʻoú. Ki muʻa ke fakahāhā ko ʻeni ʻa ʻenau fakatapuí, ko e kau teu papitaisó ʻoku totonu ke fakahā ʻenau loto ke papitaisó ki he ʻovasia pulé koeʻuhi ke malava ke ne fai ha fokotuʻutuʻu mo e kau mātuʻá ke nau fakataha mo kinautolu.
5 Ko e malanga fakahāhā ki he hokohoko ʻo e ngaahi ʻasemipilī fakafeituʻu ko ʻení ʻoku fakakaveinga “Ko e Hā ke Tataki Ai ʻe he Tohitapú?” Fakaafeʻi ʻa e faʻahinga mahuʻingaʻiá ke haʻu ki ai. ʻI he fakatuʻamelie atu ki he fakalototoʻa mo e tokoni ʻoku fiemaʻu lahi kiate koe mo ho fāmilí ʻa ia te mou maʻú, fai ha fokotuʻutuʻu pau ke ʻi ai ʻi he polokalamá fakakātoa.