Foki Kiate Kinautolu Naʻa Nau Fakahā ʻa e Mahuʻingaʻiá
1 Ko e tohi Ngaahi Talanoa Faka-Tohitapú ʻokú ne ʻomai ʻa e moʻoní ʻi ha founga pau ʻo ʻikai nofo ʻi he ngaahi tokāteline loí. Ke lavameʻa ʻi hono ngāueʻaki ʻa e meʻangāué ni, kuo pau ke tau fai ʻa e ngaahi toe ʻaʻahi kiate kinautolu naʻa nau fakahā ʻa e mahuʻingaʻiá. Tānaki atu ki hono fakalahi ʻa e mahuʻingaʻia ʻi he tohi Ngaahi Talanoa Faka-Tohitapú, ʻe taki atu ai kitautolu ki ha ako Tohitapu ʻo ngāueʻaki ʻa e tohi Moʻui Taʻengata.
2 Kapau naʻá ke lea ki ha tokotaha naʻe ʻikai ke tui ia ki he ʻOtuá ka naʻá ne fakahāhā ha mahuʻingaʻia, te ke kamata ʻaki nai hono fakaava ʻa e tohí ki he fakatātā kuo ngāueʻaki ʻi he Talanoa 71 pea pehē:
◼ “ʻI heʻeku ʻi heni ki muʻa atú, naʻá ta sio ai ki he fakatātā fakamānako ko ʻeni ʻo e ngaahi ʻātakai fakaʻofoʻofá. Ko e hā kuo pau ke ke fai ke ke maʻu ai ha fiefia ʻi ai? Ko e hā haʻo tali ki aí? [Tuku ke ne tali.] ʻOku fakapapauʻi mahino ʻe he Tohitapú ʻa e taha ʻo e ngaahi fiemaʻu tefitó. [Lau Sione 17:3.] ʻOku mātuʻaki fiemaʻu ʻa e ʻilo kānokanó ki heʻetau tui ki he ʻOtuá. Ko ha founga lelei ʻaupito ʻoku lava ke tau ako ai ʻa e meʻa ʻoku fiemaʻu ke tau ʻiló ko hono ako fakafounga pau ʻa e Tohitapú.” Ngāueʻaki ʻa e talanoa ko iá ke fakamatalaʻi ʻa e anga ʻo hono fai ha ako Tohitapu, pea aleaʻi ke foki atu ki ha toe fetalanoaʻaki.
3 Kapau ko hoʻo foki ke hoko atu hoʻomo fetalanoaʻakí ʻi he ʻuhinga ʻoku fakangofua ai ʻe he ʻOtuá ʻa e faingataʻá, te ke pehē nai:
◼ “Ko e taimi fakamuimui naʻá ku ʻi heni aí, naʻá ta talanoa ai ʻo fekauʻaki mo e [ha meʻa pē naʻe hoko]. Naʻe maheʻa hake ai ha fehuʻi ki he ʻuhinga ʻoku fakangofua ai ʻe he ʻOtuá ʻa e faingataʻa lahi ʻi he māmaní. Ko e hā ʻa e fakamulituku ne ke aʻu ki aí? [Tuku ke ne tali.] ʻOku fakalototoʻa ke ʻilo ʻoku ʻikai ko e ʻomi ʻe he ʻOtuá ʻa e ngaahi tuʻunga fakamamahi peheé.” Huke ki he peesi 104 ʻi he tohi Moʻui Taʻengata, pea fetalanoaʻaki ki he ngaahi fakakaukau Fakatohitapu ʻoku lave ki ai ʻa e palakalafi 12 ki he 14. Kapau ʻoku hā mei he tokotaha ko iá ha mahuʻingaʻia, tuʻuaki ʻa e tohí pea tala ange te ke toe foki atu ke fakamatala ki he ʻuhinga ʻoku lava ke tau fakapapauʻi ai ko e fakangofua ko ia ʻe he ʻOtuá ʻa e faingataʻá ʻe vavé ni ke ngata.
4 Kapau ko hoʻo foki ke ʻaʻahi ki ha mātuʻa ʻa ia naʻe tokanga ʻo fekauʻaki mo e ngaahi palopalema ʻa e fāmilí, te ke leaʻaki nai ʻeni:
◼ “ʻOku ou ʻilo, ʻi ho tuʻunga ko ha mātuʻá, ʻokú ke fiemaʻu ʻa e lelei tahá ki hoʻo fānaú. Koeʻuhi ʻoku ʻikai ke lava ke maluʻi kinautolu mei he meʻa kotoa pē ʻoku koví, kuo pau ke ke akoʻi kinautolu ki he founga ke fekuki ai mo e ngaahi palopalema ʻo e moʻuí. ʻOkú ke fakakaukau ʻe anga-fēfē hono fai ʻa e meʻa ko ʻení? [Tuku ke ne tali.] Ko e taha ʻo e ngaahi meʻa mahuʻinga taha ʻoku lava ke tokonaki ʻe ha mātuʻa ko e akoʻí.” Huke ki he peesi 245-246 ʻi he tohi Moʻui Taʻengata, pea fakahanga ʻa e tokangá ki he akonaki ʻaonga ʻi he Tohitapú, fakamamafaʻi ʻa hono mahuʻingá pea mo e lava ke hoko ko e tāpuaki ʻa e muimui ki aí. Kapau ʻoku hā mei he tokotaha ko iá ha mahuʻingaʻia, tuʻuaki ʻa e tohí pea fakahā ange te ke toe foki atu ke fakahāhā ʻa hono ngāueʻaki ʻa e tohi ko ʻení ke ako lahi ange ai ʻo fekauʻaki mo hono maʻu ha moʻui fakafāmili fiefiá.
5 Kapau ko haʻo fai ha ʻaʻahi ʻa ia te ke ngāueʻaki ai ha tuʻuaki nounou pē, ʻoku lava ke ke pehē:
◼ “Naʻe ʻikai ʻaupito ko e taumuʻa ia ʻa e ʻOtuá ke tau tupu ʻo motuʻa pea mate. Naʻá ne taumuʻá ke tau moʻui taʻengata ʻi he māmani palataisí.” Fakaʻaliʻali ʻa e fakatātā ʻi he Talanoa 115. Lau ʻa e talanoá pea lau mo e ngaahi konga Tohitapú. Fai ha ngaahi fokotuʻutuʻu ki ha toe ʻaʻahi.
6 Ko e moʻoni ko e tohi foʻou ko ʻení ko ha toe tokonaki ia mei a Sihova ke “fakavave” ʻa e ngāue fakatahatahaʻí ʻi he ngaahi ʻaho fakaʻosí ni. (ʻAi. 60:22) Kapau te tau ngāueʻaki ia ke ola lelei, ʻoku lava ke tau ʻoatu ʻa e ʻilo ʻe tokoni nai ki ha tokotaha ke ne maʻu ai ʻa e moʻui taʻengatá.