Faʻifaʻitaki ki Heʻenau Tuí
1 Naʻe fakaʻuhingaʻi ʻe he ʻaposetolo ko Paulá ʻa e tuí ko e “fakasino ʻa e ngaahi meʻa ʻoku ʻamanekina, ʻoku ne mafakamoʻoni ʻa e ngaahi meʻa ʻoku ʻikai ha.” Naʻá ne tānaki atu “ka ʻo ka taʻekau ʻa e tui, ʻoku ʻikai momoʻi lava haʻate fakahōifua ia [ʻOtuá].” (Hep. 11:1, 6) Naʻe naʻinaʻi kitautolu ʻe Paula ke tau ngāueʻi ʻa e tuí, fonu mahuohua ʻi ai, pea tulimui ki ai.—2 Kol. 4:13; Kol. 2:7; 2 Tīm. 2:22.
2 ʻOku lahi ʻa e ngaahi faʻifaʻitakiʻanga tuʻu-ki-muʻa ʻo e tuí ʻoku fakamatalaʻi ʻi he Tohitapú. ʻI he Hepelū vahe 11, ʻoku ʻomai ai ʻe Paula ha fakahokohoko lōloa ʻo e kau fakamoʻoni naʻa nau fakahāhā ʻa e tui taʻemamotu. Naʻe kau ʻi he fakahokohoko ko ʻení ʻa ʻĒpeli, ʻa ia ko e fuofua tokotaha ia naʻe mate māʻata maʻa ʻene tuí. Naʻe fakahokohoko ai ʻa Noa koeʻuhi ko ʻene tuí naʻá ne fakahāhā ai ʻa e manavahē fakaʻotua ʻa ia naʻe fiemaʻu ki hono fakahaofi hono fāmilí. Naʻe fakaongoongoleleiʻi ʻa ʻĒpalahame koeʻuhi ko ʻene tuí pea mo ʻene talangofuá. Naʻe fakahīkihikiʻi ʻa Mōsese koeʻuhi ʻi heʻene tuí naʻá ne hokohoko atu tuʻumaʻu ʻi he sio atu ki he Tokotaha ʻa ia ʻoku taʻehāmai. Ko e fakahokohoko ʻo e ngaahi faʻifaʻitakiʻangá naʻe fuʻu lōloa ʻa ia naʻe pehē ai ʻe Paula ʻe ʻikai ha taimi feʻunga kiate ia ke ne hoko atu ʻene lave kiate kinautolú kotoa. Ko ha fakamālō lahi ē ko kitautolu he ʻe lava ke tau ʻai ke mālohi ʻetau tuí ʻaki ʻa e fakamanatu ki heʻenau “toʻonga maʻoniʻoni mo e lotu moʻoni”!—2 Pita 3:11.
3 ʻI he ʻuluaki Senitulí, naʻe ʻeke ai ʻe Sīsū ha fehuʻi: “Ka ʻo ka hoko mai ʻa e Fanautama ʻa Tangata, te ne ʻilo koā ha kei tui pehē ʻi mamani?” (Luke 18:8) Sai, ʻoku tau maʻu ha ngaahi faʻifaʻitakiʻanga moʻoni ʻo e tuí ʻi hotau lotolotongá he ʻahó ni? ʻOku tau vakai ki ha kau tangata mo e kau fefine, talavou mo e taʻumotuʻa fakatouʻosi, ʻoku nau fakahāhā ʻa e tui taʻeueʻia kia Sihova ʻo hangē ko ia naʻe moʻoni ʻi he kakai ʻa e ʻOtuá ʻi he taimi ʻo e Tohitapú?
4 Ngaahi Faʻifaʻitakiʻanga ʻi Onopooni ʻo e Tuí: Ko e faʻifaʻitakiʻanga tuʻu-ki-muʻa ʻo e tuí ʻoku maʻu ia takatakai ʻiate kitautolu! Ko e tui ʻa e kau ʻovasia ʻoku nau takimuʻa ʻi hotau lotolotongá ʻoku taau ke faʻifaʻitaki ki ai. (Hep. 13:7) Ka ʻoku ʻikai ko kinautolu pē ʻa e faʻahinga ʻoku faʻifaʻitakiʻanga ʻi he tuí. ʻI he feohi mo e fakatahaʻanga kotoa pē, ʻoku ʻi ai ʻa e faʻahinga mateaki ʻoku nau maʻu ha lēkooti lōloa ʻo e ngāue anga-tonu kia Sihova, ʻa ia ʻoku faʻa fakahoko ia ʻi he ngaahi tuʻunga faingataʻa ʻaupito.
5 ʻOku pau te tau mālieʻia ʻi hotau ngaahi tuofāfine anga-tonu, ʻa ia naʻa nau kātakiʻi, ʻi he ngaahi taʻu ʻa e fakatanga mei honau ngaahi husepāniti fakafepakí. Ko e ngaahi mātuʻa taʻehoá kuo nau fehangahangai mo e pole ko hono tauhi hake tokotaha ʻa e fānaú. ʻOku ʻi ai ʻa e kau uitou taʻumotuʻa ʻi hotau lotolotongá ʻoku ʻikai te nau liʻaki mei he ngaahi ngāue ʻa e fakatahaʻangá neongo ʻoku ʻikai te nau maʻu nai ha fāmili ke tokoni kiate kinautolu. (Fakafehoanaki mo Luke 2:37.) ʻOku tau ofo ʻi he tui ʻa e faʻahinga ʻoku nau kātakiʻi ʻa e ngaahi palopalema ʻo e moʻui mahamahakí. Ko e tokolahi ʻoku hokohoko atu ke tauhi mateaki neongo ʻoku nau maʻu ʻa e ngaahi fakangatangata ʻokú ne taʻofi ai kinautolu mei hono vaheʻi ange ha ngaahi monū lahi ange ʻo e ngāué. ʻOku ʻi ai ʻa e Kau Fakamoʻoni kei talavou kuo nau ngāueʻi loto-toʻa ʻa e tuí neongo ʻa e fakatanga ʻi he akoʻangá. ʻOku toe mālohi ange ʻetau anga-līʻoa fakaʻotuá ʻi heʻetau vakai ki he kau tāimuʻa anga-tonu ʻa ia ʻoku nau kītaki ʻi he taʻu ki he taʻu ʻi he fehangahangai mo e ngaahi palopalema taʻefaʻalaua. Hangē pē ko Paulá, ʻe ʻikai ha taimi feʻunga kiate kitautolu kapau ʻoku tau feinga ke lave ki he kotoa ʻo e ngaahi meʻa naʻe hokosia ʻi he ngāue ʻo e Puleʻangá pea mo e ngaahi ngāue ʻo e tuí naʻe fai ʻe he ngaahi tokoua mo e ngaahi tuofāfine ko ʻení!
6 Ko e ngaahi faʻifaʻitakiʻanga ʻa e faʻahinga anga-tonú ni ʻokú ne ʻomai kiate kitautolu ʻa e fiemālie mo e fakalototoʻa. (1 Tes. 3:7, 8) ʻOku tau lava lelei ke faʻifaʻitaki ki heʻenau tuí koeʻuhi “ʻilonga ha fai moʻoni ko hono mamana ia [Sihova].”—Pal. 12:22.