Polokalama ʻAsemipilī Fakafeituʻu Foʻou
1 Ko e polokalama ʻasemipilī fakafeituʻu foʻoú ʻoku kamata ia ʻi Sepitemá te ne fakaeʻa ai ʻa e kaveinga “Maʻu ʻa e Fiefia Lahi Ange ʻi Hono Fai ha Foaki.” (Ng. 20:35) ʻOku fakamatalaʻi ʻa e fiefiá ko ha “tuʻunga lelei mo e nonga.” Ko e kakai tokolahi he ʻahó ni ʻoku nau fakavave ke maʻu ha fiefia pē te nau maʻu ʻi he moʻuí, pea ʻi he taimi ʻoku nau maʻu aí, ʻoku faʻa taimi nounou. ʻOku ʻikai ko e fiefia moʻoní ia. Ka, ʻoku akoʻi kitautolu ʻe Sihova ki he founga te tau maʻu ai ha ʻaonga taʻengata maʻatautolu. (ʻAi. 48:17; 1 Sione 2:17) Ko e polokalama ʻasemipilī fakafeituʻu foʻoú te ne fakamamafaʻi ʻa e founga ʻe lava ke tau maʻu ai ʻa e fiefia lahi angé ʻaki hono fai ha foaki ʻi ha founga fakalaumālie.
2 Te tau ako ha ngaahi founga ʻaonga ʻi heʻetau foaki atu kitautolu ʻi he ngāue fakafaifekaú. Ko e ngaahi malanga ʻe niʻihi ke fai ia ʻe he ʻovasia fefonongaʻakí ʻoku fakakaveinga ko e: “ʻAi Kaumeʻa ʻo Fakafou he Koloa Taʻemāʻoniʻoní,” “Tokaʻi ʻa e Tokonaki Fakaʻotua ʻo e ‘Meʻaʻofa ko e Kau Tangatá,’” mo e “Aʻusia ʻa e Ngaahi Tafaʻaki Lahi ʻo e Fiefia Moʻoní.” Ko e faʻahinga ʻoku loto ke nau papitaiso ʻi he ʻasemipilií, ʻe fiemaʻu ke nau lea ki he ʻovasia tauhí koeʻuhi ke lava ke ne fokotuʻutuʻu ha kau mātuʻa ke fakamanatu ʻa e ngaahi fehuʻi papitaisó mo kinautolu. Ko hono tauhi ʻa Sihova ʻi ha vā ʻoku maʻá te ne ʻomai ai ʻa e fiefia lahi ki he faʻahinga papitaiso foʻoú.
3 Ko hono ʻiloʻi lelei ʻa e tuʻunga mafai ʻo Sihová ʻokú ne toe ʻomai ai ʻa e fiefia moʻoni mo e maluʻanga. ʻOku fiemaʻu ki he kakai kotoa pē ke nau ʻiloʻi ʻa e meʻá ni. Ko ia ai, ko e malanga maʻá e kakaí he ʻasemipilī fakafeituʻú te ne fakaeʻa ai ʻa e kaveinga ko e “Fāʻūtaha mo e Kakai Fiefia ʻa e ʻOtuá.” Fakapapauʻi ke fakaafeʻi ʻa e faʻahinga kotoa ʻoku nau fakahā ha mahuʻingaʻia ʻi he moʻoní ke nau haʻu ki he malangá ni. ʻOku ʻikai te nau maʻu ha maluʻanga moʻoni mo e fiefia tuʻuloa ʻi he malumalu ʻo e pule ʻa e tangatá ʻi he māmani ko ʻení, ʻa ia ʻoku tokoto ʻi he mālohi ʻo Sētané. (Koh. 8:9) Ka ko e loto-fiefia ē te nau maʻu ʻi he feohi mo e kakai fiefia ʻa Sihová!—Sāme 144:15e.
4 Neongo ʻa e ngaahi tuʻunga kovi ange ʻi he ngaahi meʻa ʻo e tuʻu ko ʻení, ko e faʻahinga ʻoku nau fiefia lahi ange ʻi hono fai ha foaki fakalaumālié ʻe ʻikai ʻaupito fakalotomamahiʻi kinautolu ʻe he ʻOtua ʻo e fiefiá. (1 Tīm. 1:11) Ko e polokalama ʻasemipilī fakafeituʻu foʻoú te ne fakahāhaaʻi ʻoku moʻoni ʻeni. ʻOua ʻaupito te ke tō mei ai!