Muimui ʻIa Sīsū Maʻu Ai Pē
1 ʻI he taimi ʻe taha naʻe pehē ai ʻe Sīsū: “Kabau e muimui ha taha iate au, tuku ke ne liaki eia ia, bea too hake ene akau mafajia o muimui iate au [“maʻu ai pē,” NW].” (Mt. 16:24, PM) ʻOku tau fiemaʻu moʻoni ke pau ʻetau tali ki he ngaahi lea ʻa Sīsuú. Tau sivisiviʻi angé pe ko e hā ʻoku kau ki he kupuʻi lea taki taha ʻo ʻene fakaafé.
2 “Tuku ke Ne Liaki Eia Ia”: ʻI he taimi ʻoku tau fakatapui ai ʻetau moʻuí kia Sihová, ʻoku tau liʻaki atu ai kitautolu. Ko e ʻuhinga tefito ʻo e foʻi lea faka-Kalisi ʻoku liliu ko e “liaki” ko e “pehē ʻikai.” ʻA ia ʻoku ʻuhingá ʻoku tau loto-lelei ke tukuange ʻetau ngaahi ʻamanakí, ngaahi holí, ngaahi fiemālié, pea mo e ngaahi fakafiefia siokitá—kae hoko ʻo fakapapauʻi ke fakahōifuaʻi ʻa Sihova ʻo aʻu ki ʻitāniti.—Loma 14:8; 15:3.
3 “Too Hake Ene Akau Mafajia”: Ko e moʻui faka-Kalisitiané ko ha moʻui ia ʻo hono fua ʻo e ʻakau mafasia ʻo e ngāue fakaefeilaulau kia Sihova. Ko e founga ʻe taha ʻoku tapua atu ai ʻa e laumālie ʻo e feilaulauʻi-kitá ko ʻete ngāue mālohi ʻi he ngāue fakafaifekaú. ʻI he aʻu mai ki he taʻu ní, ʻoku tokolahi ʻa e kau malanga kuo nau fiefia ʻi he ngāue tāimuʻa tokoní. Mahalo pē ʻokú ke kau ʻi honau lotolotongá pea lava ke ke fakamoʻoniʻi ko e ngaahi tāpuaki ʻokú ke maʻú ʻoku lahi ange ia ʻi he totongi ki he ngaahi feilaulau ʻokú ke faí. Ko kinautolu ʻoku ʻikai malava ke nau ngāue ko ha kau tāimuʻa tokoní kuo nau faʻa fokotuʻutuʻu ke fakamoleki ha taimi lahi ange ʻi he ngāue fakamalangá, ʻi honau tuʻunga ko e kau malanga ʻi he fakatahaʻangá. ʻI he fakakaukau ki he taumuʻa ko iá, kuo fakataimi-tēpileʻi ʻe he ngaahi fakatahaʻanga ʻe niʻihi ʻenau ngaahi fakataha ki he ngāue fakamalangá ki ha ngaahi miniti siʻi ki muʻa ʻi he meʻa naʻa nau faʻa faí. ʻOku houngaʻia ʻa e kau malanga tokolahi ʻi heʻenau maʻu ʻa e vahaʻa taimi lōloa ange ko ʻeni ki he ngāue fakamalangá. Kuo maʻu foki ʻe ha niʻihi ha ngaahi ola lelei ʻaupito ʻi he taimi ʻoku nau fakakaukau ai ke ʻaʻahi ki ha ‘toe fale pē ʻe taha’ pe ke ngāue atu ‘ʻo lōloa ange ʻaki ha ngaahi miniti siʻi.’
4 Ko e founga ʻe taha ʻoku fakahāhā ai ʻa e laumālie ʻo e feilaulauʻi-kitá ko hono fokotuʻu ha ngaahi taumuʻa fakafoʻituitui. ʻI ha fokotuʻutuʻu lelei pea mo hono feʻunuʻaki ʻenau taimi-tēpilé, kuo hoko ai ha niʻihi ko e kau tāimuʻa tuʻumaʻu. Kuo malava ai ʻe ha niʻihi kehe ke fokotuʻutuʻu ʻenau ngaahi meʻá koeʻuhi ka nau lava ke fakafaingamālieʻi kinautolu ki he ngāue Pētelí pe ko e ngāue fakamisinalé. Kuo hiki ai ha niʻihi ki ha feituʻu ʻoku lahi ai ʻa e fiemaʻu ki ha kau malanga ʻo e Puleʻangá.
5 “Muimui Iate Au Maʻu Ai Pē”: Neongo ʻoku aʻusia ʻe he kau ākonga ʻa Sīsuú ʻa e ngaahi ʻahiʻahi lahi, ʻoku nau hoko ʻo loto-toʻa koeʻuhi ko ʻene faivelenga mo e kātaki ʻi he ngāue fakafaifekaú. (Sione 4:34) Kuo nau ongoʻi fakafoʻou ʻi honau laumālié ʻi heʻene ʻi aí pea mo ʻene pōpoakí. Ko e ʻuhinga ia naʻe tapua mai ai ʻa e fiefia moʻoní mei he faʻahinga naʻa nau muimui ʻiate iá. (Mt. 11:29) ʻOfa ke pehē ʻetau fefakalototoʻaʻakí ke tau kātaki ʻi he ngāue mahuʻinga taha ko hono malangaʻi ʻo e Puleʻangá mo e ngaohi-ākongá.
6 ʻOfa ke tau tali lelei kotoa ʻa e fakaafe ʻa Sīsuú ke muimui ʻiate ia maʻu ai pē ʻaki hono fakatupulekina ʻa e laumālie ʻo e feilaulauʻi-kitá. ʻI heʻetau fai peheé, te tau maʻu ai ʻa e fiefia lahi he taimí ni pea malava ai ke tau fakatuʻotuʻa atu ki he ngaahi tāpuaki lahi ange ʻi he kahaʻú.