“Ke ʻAsili Hoʻomou Feinga”
1 ʻI he taimi ʻoku tau fakatapui ai kitautolu kia Sihová, ʻoku tau palōmesi ai te tau foaki atu ʻetau lelei tahá kiate ia. ʻOku feʻungamālié, he naʻe fakalototoʻaʻi ʻe he ʻaposetolo ko Pitá ʻa e kau Kalisitiane ʻi he ʻuluaki senitulí ke fai ʻenau feinga lelei tahá ʻi hono ʻai ke fakapapauʻi ʻenau tuʻu ʻi he ʻao ʻo Sihová. (2 Pita 1:10) ʻOku tau fiemaʻu moʻoni ke fai ʻetau feinga lelei tahá ke fakahōifuaʻi ʻa Sihova ʻi hono tauhi ia ʻi he ʻaho ní. Ko e hā ʻa e meʻa ʻoku kau ki hení? ʻI he loloto ange hotau vahaʻangatae mo Sihová pea tau fakalaulauloto ki he kotoa ʻo e ngaahi meʻa kuó ne fai maʻatautolú, ʻoku ueʻi maʻu pē ai kitautolu ʻe hotau lotó ke fai hotau lelei tahá ʻi heʻene ngāué. ʻOku tau fiemaʻu ke fakaleleiʻi ʻa e founga ʻetau ngāue fakafaifekaú, pea ʻo ka malava, fakatupulekina ʻa hono lahí.—Sāme 34:8; 2 Tim. 2:15.
2 Ko ha tokoua kei talavou naʻá ne fiemaʻu ke ne fai ʻa e meʻa lahi ange ʻi he ngāue fakafaifekaú naʻá ne ʻilo ko hono ako maʻu pē ʻa e Folofola ʻa e ʻOtuá ʻe loloto ange ai ʻene houngaʻia kia Sihová pea fokotuʻu ai ʻiate ia ʻa e faivelenga lahi. Naʻe ueʻi ai ia heni ke ne kole ki he ngāue tāimuʻá. Ko ha tuofefine naʻá ne ʻilo ʻoku faingataʻa ke talanoa ki he faʻahinga foʻoú naʻá ne ʻahiʻahiʻi ha niʻihi ʻo e ngaahi tuʻuaki ʻi he tohi Reasoning pea vave ʻene kamata ke fiefia ʻi he lavameʻa lahi ange ʻo ʻene ngāue fakafaifekaú. Naʻe malava ke ne fai ha ako Tohitapu mo ha ongo mātuʻa naʻá na tali ʻa e moʻoní.
3 Fiefia ʻi he Meʻa ʻOku Lava ke Ke Faí: Ko e niʻihi ʻiate kitautolu ʻoku tau hokosia ʻa e ngaahi tuʻunga faingataʻa hangē ko e mahamahakí, fakafepaki mei he fāmilí, masivá, pe ʻikai ha tali lelei ʻi he feituʻú. Ko e ngaahi palopalema kehe lahi ʻoku hoko lahi ʻi he ngaahi ʻaho fakaʻosí ni ʻoku nau fakafaingataʻaʻiaʻi nai ʻetau ngāué. (Luke 21:34; 2 Tim. 3:1) ʻOku ʻuhinga ʻení kuo tō ʻetau fakatapui kia Sihová? ʻIkai, kapau kuo tau ngāue kiate ia ʻo faiʻaki ʻetau feinga lelei tahá.
4 ʻOku ʻikai ke fakapotopoto ke tau fakamāuʻi kitautolu ʻo fakatuʻunga ʻi he meʻa ʻoku malava ke fakahoko ʻe he niʻihi kehé. Ka, ʻoku fakalototoʻaʻi kitautolu ʻe he ngaahi Konga Tohitapú “ke taki taha sivi ʻene ngaue aʻana.” Ko hono foaki kakato atu kitautolu ki he lahi taha ʻo e meʻa te tau malava fakafoʻituituí, ʻoku fakahōifua ia kia Sihova pea ʻoku ʻomai ai kiate kitautolu ke “fakafuofuaʻaki ia pe hono polepoleʻanga.”—Kal. 6:4; Kol 3:23, 24.
5 ʻOfa ke tau tokanga ki he ngaahi lea ʻa Pitá ‘ke tau fai feinga ke ʻiloa kitautolu kuo tau lelei, kuo tau taʻe ha ʻila, pea taʻe ha mele ʻi heʻene vakai aʻaná.’ (2 Pita 3:14) Ko e laumālie ko iá, te ne ʻai kitautolu ke tau ongoʻi malu pea te ne ʻomai kiate kitautolu ʻa e nonga ʻi he ʻatamaí ʻa ia ko Sihova pē te ne malava ke ʻomaí.—Sāme 4:8.