Ngaahi Mātuʻa—Akoʻi Hoʻomou Fānaú ke Malanga
1 ʻOku tāpuakiʻi ʻa ʻetau ngaahi fakatahaʻangá ʻaki ʻa e fānau tokolahi ʻoku nau holi loto-totonu ke ngāue ki he ʻOtuá. (Koh. 12:2 [Malaga 12:1, PM]) ʻOku fakakau kinautolu ʻi he lotolotonga ʻo e faʻahinga ʻoku fakaafeʻi ʻe Sihova ke kau ʻi hono fakahīkihikiʻi iá. (Sāme 148:12-14) Ko ia ai, ko e ako ʻi he ʻaho ki he ʻaho ʻoku ʻoange ʻe he ngaahi mātuʻá ki heʻenau fānaú, ʻoku totonu ke fakakau atu ki ai ʻa e fakahinohino ki he founga ke vahevahe atu ai ʻenau tuí ki he niʻihi kehé ʻi he ngāue malangaʻi ʻo e Puleʻangá.—Teu. 6:6, 7.
2 Akoʻi ʻa e Fānaú ʻi he Ngaahi Sitepu Fakalakalaka: ʻOku taau mo e fānaú ke akoʻi ʻi heʻenau kei iikí ke ngāue fakataha mo ʻenau ngaahi mātuʻá ʻi he ngāue fakafaifekaú. Ki muʻa ke ʻalu ʻi he ngāué, teuteuʻi ʻa hoʻo fānaú ke nau kau ki ai ʻi ha founga mohu ʻuhinga. Fakapapauʻi ki muʻa ʻa e meʻa ʻokú ke ʻamanekina meiate kinautolu te nau fai ʻi he matapaá. Ko e fānau kei iikí ʻe lava ke nau tuku atu ʻa e ngaahi tulekí mo e ngaahi lauʻi pepa tuʻuakí pea fakaafeʻi ʻa e kakaí ki he Fale Fakatahaʻangá. Ko e faʻahinga kei iiki ʻoku nau lautohi leleí ʻe lava ke fakaafeʻi kinautolu ke nau lau ʻa e ngaahi konga Tohitapú ʻi he matapaá. ʻE lava ke nau tuʻuaki ʻa e ngaahi makasiní, ʻo ngāueʻaki ha tuʻuaki nounou. ʻI heʻenau hoko ʻo taukeí, akoʻi kinautolu ke ngāueʻaki ʻa e Tohitapú ʻi heʻenau tuʻuakí. Ko e kau malanga kei iiki tokolahi kuo nau kamata haʻanau tufaʻanga makasini pau pē ʻa kinautolu pea fai maʻu pē mo e ngaahi toe ʻaʻahi. ʻOku lelei ange ki ha kiʻi tama ke ngāue fakataha mo ha taha lahi kae ʻikai ko ha tokotaha kei siʻi ʻe taha. ʻE lava ke fakamatalaʻi ʻe he tokotaha lahí ki he tokotaha-ʻapí ko e tokotaha kei siʻí ʻoku kei akoʻi ʻi he ngāue fakafaifekaú.
3 Naʻe kole ʻe ha kiʻi taʻahine ʻe taha ʻa e tokoni ʻa e kau mātuʻá koeʻuhi ka ne lava ʻo taau ke hoko ko ha tokotaha malanga ʻo e Puleʻangá. Neongo ko hono taʻumotuʻá naʻe kei taʻu nima ʻi he taimi ko iá pea ʻikai te ne lava ke lautohi, ka naʻá ne malava pē ke ʻoatu ʻa e pōpoaki ʻo e Puleʻangá ʻo ola lelei ʻi he ngaahi matapaá. Naʻá ne maʻuloto ʻa e tuʻuʻanga ʻo e ngaahi konga Tohitapú, peá ne huke ki ai, ʻo ne kole ange ki he tokotaha-ʻapí ke lau kinautolu, peá ne fai atu leva ʻa e fakamatalá.
4 ʻOku totonu foki ke akoʻi ʻa e fānaú ʻaki ʻa e faʻifaʻitakiʻanga fakaemātuʻá ki he mahuʻinga ʻo hono maʻu ha taimi-tēpile lelei ke kau maʻu pē ʻi he ngāue fakafaifekaú. ʻOku fiemaʻu ki he ngaahi mātuʻá ke nau fokotuʻu maʻu pē ha taimi-tēpile fakauike pau ki he ngāue fakamalangá pea fai ki ai, koeʻuhi ke ʻilo ʻe he fānaú ʻa e konga ʻi he uiké ʻoku vaheʻi maʻu pē ki he ngāue fakamalangá.
5 ʻI he taimi ʻoku akoʻi ai ʻa e fānaú mei he kei siʻí ke ʻofa pea fiefia ʻi he ngāue fakafaifekaú, ʻe ueʻi ai kinautolu ke nau kakapa atu ki ha ngaahi monū lahi ange ʻi he kahaʻú, mahalo ko e fakakau atu ki ai ʻa e ngāue tāimuʻá. (1 Kol. 15:58) Ko kitautolu kotoa pē ʻoku totonu ke tau fakalototoʻaʻi ʻa e fānau ʻi hotau lotolotongá ke nau fai ha fakalakalaka lelei ʻi he tuʻunga ko e kau fakahīkihikiʻi ʻo Sihova.