Ko e Anga-Tonú ʻOku Fakapaleʻi
1 ʻI he Hepelu 11:6 ʻoku tala mai ai kiate kitautolu ko e ʻOtuá “te ne hanga ʻo totongi kiate kinautolu ʻoku kumi hākili kiate ia.” Ko e founga ʻe taha ʻokú ne fakapaleʻi ai ʻene kau sevāniti mateakí, ʻa kinautolu kuo nau ‘lototō ʻi he ngaahi meʻa siʻí’ ko hono ‘fakanofo kinautolu ke pule ki he ngaahi meʻa lahi.’ (Mt. 25:23) ʻI hono fakalea ʻe tahá, ʻoku faʻa fakapaleʻi ʻe Sihova ʻa e ngāue leleí ʻaki hono ʻoange ki heʻene kau fakamoʻoni anga-tonú ʻa e toe ngaahi monū ʻo e ngāué.
2 Ko e anga-tonu ʻa e ʻaposetolo ko Paulá naʻe fakapaleʻi ʻaki hono vaheʻi ia ki he ngāue fakafaifekaú ʻa ia naʻe ʻave ai ia ki he ngaahi fonua mo e ngaahi kolo ʻo ʻIulope mo ʻĒsia Mainá. (1 Tim. 1:12) Neongo ko e feinga lahi naʻe kau atu ki hono fakahoko kakato ʻene ngāue fakafaifekaú, naʻe fakamahuʻingaʻi lahi ʻaupito ʻe Paula ʻa e monū naʻá ne maʻú. (Loma 11:13; Kol. 1:25) Naʻá ne fakahaaʻi ʻene houngaʻia lolotó ʻaki ʻene fekumi fakamātoato ki ha ngaahi faingamālie ke malanga. ʻI heʻene ngāue faivelengá, naʻá ne fakahaaʻi mahino ai naʻá ne moʻuiʻaki ʻene tuí. Ko ʻene faʻifaʻitakiʻangá ʻoku ueʻi ai kitautolu ke tau koloaʻaki hotau ngaahi monū ʻo e ngāué.
3 Kuo ʻOmai ʻe Sihova Maʻatautolu ha Ngāue Fakafaifekau: ʻOku anga-fēfē ʻetau fakahā ʻa e fakakaukau tatau naʻe fakahaaʻi ʻe Paula ki he monū ko ʻeni naʻe fakapaleʻí? ʻOku tau kumi ki ha ngaahi founga ke fakalahi ai ʻetau kau ʻi he ngāue fakafaifekaú. ʻOku tau ngāueʻaki ʻa e faingamālie kotoa pē ke faifakamoʻoni ʻi he founga ʻikai anga-mahení pea pehē mei he matapā ki he matapā. ʻOku tau toe foki ki he ʻikai-ʻi-ʻapi kotoa pē, pea fai ha ngaahi toe ʻaʻahi ki he faʻahinga kotoa pē naʻe mahuʻingaʻiá. Pea ke tau tauhi maʻu ʻa e ngaahi fokotuʻutuʻu ʻoku tau faí ke fai ha ngaahi ako Tohitapu ʻi ʻapi.
4 ʻI he fekauʻaki mo ʻetau ngāue fakafaifekaú, naʻe akonaki mai ʻa Paula: ‘Ke faʻa fai pe ia.’ (2 Tim. 4:2) Ko ha meʻa ʻoku fakavavevave ʻoku ʻuhingá ke tokanga leva ki ai. ʻOku tau fai ʻetau ngāue fakafaifekaú ʻi ha founga fakavavevave, ʻo fai ia ko e meʻa muʻomuʻa ʻi heʻetau moʻuí? Ko e fakatātaá, ʻoku ʻikai te tau fiemaʻu ke fakaʻatā ʻetau ngaahi ngāue fakafiefiá mo e ngaahi tulimui fakafoʻituitui kehe ʻi he fakaʻosinga ʻo e uiké ke ne felei ʻa e taimi kuo tau tukupā ke ngāueʻaki ki he malaʻe malangá. Koeʻuhi ʻoku tau tui pau ko e ngataʻanga ʻo e tuʻu ko ʻení ʻoku ofi ʻaupito, ʻoku tau tui pau foki ai ko hono malangaʻi ʻa e ongoongo lelei ʻo e Puleʻangá ko e ngāue mahuʻinga taha ia ʻoku lava ke tau faí.
5 Ko ʻetau anga-tonu ki he ʻOtuá ʻoku fakaʻilongaʻi ia ʻaki ʻetau hoko ʻo moʻoni pea mateaki kiate ia mo tuʻumaʻu ʻi he ngāue kuó ne vaheʻi mai kiate kitautolú. ʻAi ke tau fakahoko kakato ʻetau ngāue fakafaifekaú, koeʻuhí ʻe hanga ʻe Sihova ʻi ha founga lahi ʻo fakapaleʻi ʻetau anga-tonú.