“ʻE Feʻofaʻaki Kotoa Koā ʻa e Kakaí?”
1 Ko ha pōpoaki fakaʻofoʻofa, fakaueʻiloto, pea fakalotomāfana ʻe fanongonongo ʻi māmani lahi ʻi he ngaahi lea ʻe 169. Ko e hā ʻa e pōpoaki ko ʻení? Pea ʻe founga fēfē hono ʻoatu iá?
2 ʻOku fekauʻaki ʻa e pōpoakí mo e ʻofa ki he kaungāʻapí. ʻE maʻu ia ʻi he Ongoongo ʻo e Puleʻangá Fika 35, ʻoku fakakaveinga ko e “ʻE Feʻofaʻaki Kotoa Koā ʻa e Kakaí?” ʻOku sivisiviʻi nounou ʻe he Ongoongo ʻo e Puleʻangá ni ʻa e ngaahi meʻa ʻoku lolotonga hoko ʻi māmani lahí, ʻo hā ai ko e siʻi ʻa e ʻofa ʻi he lotolotonga ʻo e kakaí ko e tupuʻanga tefito ia ʻo e lahi taha ʻo e loto-mafasiá mo e mamahí. ʻOkú ne fakamatalaʻi ʻa e ʻuhinga, tautefito ʻi hotau ʻahó ni, ʻoku momoko ai ʻa e ʻofa ki he kaungāʻapí pea mo e meʻa ʻoku ʻuhinga ki ai ʻi he kahaʻú.
3 ʻI he taimi tatau, ʻoku fakahaaʻi ʻe he Ongoongo ʻo e Puleʻangá Fika 35 ko e ʻofa moʻoni ki he kaungāʻapí ʻoku ʻi he lotolotonga ia ʻo e moʻui ʻa e laui miliona ʻi he māmani ʻo e ʻaho ní. ʻOkú ne fakapapauʻi mai ʻa e faʻahinga ʻoku nau kau ʻi hono fakaake ʻa e muʻaki lotu faka-Kalisitiané—founga-lotu ʻi he ʻuluaki senitulí, ʻa ia naʻe fakaʻilongaʻiʻaki ʻa e ʻofa ki he kaungāʻapí ʻo hangē ko ia naʻe akoʻi ʻe Sīsū Kalaisí.—Luke 10:25-37.
4 ʻOku fakaʻosiʻaki ʻe he Ongoongo ʻo e Puleʻangá Fika 35 ʻaki ha fakamatala ki he founga ʻe vavé ni ke ngāueʻaki ai ʻa e ʻofa ki he kaungāʻapí ʻe he faʻahinga kotoa ʻo e tangatá ʻi he malumalu ʻo e pule ʻa Kalaisi ʻi he Puleʻanga ʻo e ʻOtuá. Ko e faʻahinga te nau lau ʻa e pōpoaki ko ʻení ʻoku fakalototoʻaʻi atu ke nau maʻu ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? pea nau ako ki he founga ke nau hoko ai ko ha konga ʻo e fokotuʻutuʻu anga-ʻofa ko ʻeni ʻi māmani lahi, ʻa ia ʻoku fakamatalaʻi fakaikiiki ʻi he Folofola ʻa e ʻOtuá.
5 Ko Hai Te Ne ʻOatu ʻa e Pōpoaki Ko ʻEní? Ko e Kau Fakamoʻoni ʻa Sihova ʻi māmani lahí te nau ʻoatu ʻa e pōpoaki ko ʻeni ʻo e ʻofa ki he kaungāʻapí ki honau ngaahi mahení, ngaahi kaungāʻapí, pea mo e ngaahi kāingá ʻi he lolotonga ʻo e māhina ko ʻOkatopa mo Nōvemá. Ko kimoutolu kotoa kuo tāú ʻoku fakalototoʻaʻi atu ke mou kau ʻi hono tufaki ki he kakaí ʻa e Ongoongo ʻo e Puleʻangá Fika 35.
6 Ko e taumuʻa tefito ʻo e feingangāue ko ʻení ke fakaʻaiʻai ʻa e mahuʻingaʻia ʻa e kakaí ʻi hono fai ha ako Tohitapu ʻi he polosiua Fiemaʻu, pe ko e tohi ʻIlo. Tānaki atu ki ai, ko ha feinga ʻaufuatō ʻi he tafaʻaki ʻa e tokotaha taki taha ʻo e kau sevāniti ʻa Sihová, ʻe maʻu ai ha fakamoʻoni lahi ʻaupito ki he ʻOtua ʻo e ʻofá, ko Sihova, pea ki hono ʻAló, ko Sīsū Kalaisi.