Tokoniʻi ʻa e Niʻihi Kehé ke Nau Maʻu ʻa e ʻAonga mei he Tataki ʻa e Tohitapú
1 ʻOku fakafuofua ki he ngaahi Tohitapu ʻe fā piliona kuo pulusi ʻi he ngaahi lea mo e ngaahi lea fakafeituʻu laka hake ʻi he 2,100, ʻo ʻai ai ke ala maʻu ʻa e Folofola ʻa e ʻOtuá ʻo laka hake ʻi he peseti ʻe 90 ʻo e tokolahi ʻo e māmaní. Ka, ʻoku ʻi ai ʻa e hōngea ʻi he māmaní “ʻi he fanongo ki he folofola ʻa Sihova.” (Emosi 8:11) Ko e kakai tokolahi ʻoku nau maʻu ha tatau ʻo e Tohitapú ka ʻoku ʻikai pē ke nau lau ia pe ʻoku ʻikai pē ke mahino ʻa hono ngaahi meʻa ʻona ʻi lotó. ʻE lava fēfē ke tau fakaivimālohiʻi kinautolu ke ngāueʻaki ʻa e Tohitapú ko ha tataki ʻaonga ʻi heʻenau moʻuí?
2 ʻI Tīsema te tau tuʻuaki ai ʻa e tohi Te Ke Malava ʻo Moʻui Taʻengata he Palataisi ʻi he Māmaní. Neongo ko e tohi ʻIlo ko ʻetau tohi ako tefito ia he taimi ní, ʻoku ʻi ai ha fakamatala lelei ʻaupito ʻi he tohi Moʻui Taʻengata ʻa ia ʻe lava ke ʻaonga ki he kakai loto-totonu ʻi hotau feituʻú. ʻI hono fai ʻetau ngaahi malangá, ʻoku ʻi ai ʻa e ngaahi founga kehekehe ʻe lava ke tau fakahā ai ʻa e mātuʻaki ʻaonga ʻo e Tohitapú.
3 ʻI he vakai ki he hulu ʻa e palopalema ʻi he nofo malí he ʻaho ní, te ke fili nai ke fakaeʻa ʻa e fakakaukau ko ʻení:
◼ “Ko e lahi taha ʻo e kakai kuó u lea ki aí ʻoku nau fuʻu hohaʻa fekauʻaki mo e tupulekina fakaʻulia ʻi he nofo malí ʻa e taʻefiefiá mo e vete malí. ʻOku anga-fēfē hoʻo ongoʻi fekauʻaki mo e palopalema ko ʻení? [Tuku ke ne tali.] Kuo ʻikai malava ke ʻilo ʻe he tokolahi ʻa e tupuʻanga tefitó. Kapau te nau fai ha feinga loto-totonu, ʻe ʻikai ngata pē ʻi he malava ʻe he ongo meʻa malí ke fakahaofi ai ʻena nofo malí, ka te na malava foki ke maʻu ai ʻa e fiefia moʻoní. Ko e kī ki he lavameʻá ʻoku fakatuʻunga ia ʻi hono ngāueʻaki ʻa e akonaki ʻoku maʻu ʻi he Tohitapú.” Lau ʻa e Efeso 5:28, 29, 33. Huke ki he peesi 243, ʻo fakamatalaʻi ʻa e palakalafi 16 mo e 17, pea tuʻuaki leva ʻa e tohí. Kapau ʻoku talitali lelei ʻa e tohí, lave ki he fokotuʻutuʻu ki hono fai ʻo e tokoní.
4 Kapau ko hoʻo fetalanoaʻaki ki muʻá naʻe fekauʻaki mo e hulu ʻo e palopalema ʻi he nofo malí he ʻaho ní, ʻe lava ke ke kamata hoʻo fetalanoaʻakí ʻi he founga ko ʻení:
◼ “ʻI heʻeku ʻaʻahi mai ki muʻá, naʻá ta fetalanoaʻaki ai fekauʻaki mo e nofo malí pea mo e akonaki ʻaonga faka-Tohitapu ʻa ia ʻe lava ke ne tokoniʻi kitaua ke maʻu ha fiefia lahi angé. ʻIkai ʻoku moʻoni naʻa mo e ngaahi fāmili lelei tahá, ʻoku malanga hake maʻu pē ʻa e ngaahi palopalemá? [Tuku ke ne tali.] ʻOku ʻomai ʻe he Tohitapú ha akonaki lelei ʻaupito ʻa ia ʻe lava ke ne tokoniʻi kitautolu ke fakaleleiʻi ʻa e ngaahi palopalema ʻi he ngaahi vā ʻo e fāmilí. ʻE lava ke tāpuakiʻi ha fāmili ʻi hono ako fakataha ʻa e Tohitapú.” Huke ki he peesi 246, pea fakamatalaʻi ʻa e palakalafi 23. Lau ʻa e Sione 17:3, pea ʻoatu hoʻo tokoní ʻi hono tokoniʻi ʻa e fāmilí ke kamata hono ako ʻa e Tohitapú ʻi ʻapi.
5 ʻOku fiemaʻu ki he fānaú ʻa e taimi mo e ako lelei mei heʻenau ngaahi mātuʻá. ʻI hono tuʻuaki ʻa e tohi “Moʻui Taʻengata,” ʻe lava ke ke pehē:
◼ “Ko kitautolu kotoa ʻoku tau hohaʻa fekauʻaki mo e kahaʻu lelei ʻo ʻetau fānau-tupú. ʻI hoʻo fakakaukaú, ko e hā ʻa e founga lelei taha ʻe lava ke tokoni ai ʻa e ngaahi mātuʻá ki heʻenau fānaú ke nau maʻu ha kahaʻu malú? [Tuku ke ne tali.] Fanongo ki he faleʻi ko ʻeni mei ha palovēpi faka-Tohitapu naʻe hiki feʻunga mo e taʻu ʻe 3,000 kuohilí. [Lau ʻa e Palovepi 22:6.] Neongo ko ʻetau fānaú ʻe lava ke nau maʻu ha ʻaonga lahi mei he fakahinohino ʻoku nau maʻu ʻi he akoʻangá, ko honau akoʻi mahuʻinga lahi angé ʻoku tokonaki ia ʻi ʻapi ʻe heʻenau ngaahi mātuʻá. ʻOku fiemaʻu ʻa e taimi, tokanga, pea mo e ʻofa, ka ʻoku ʻaonga ʻa e feinga.” Huke ki he peesi 245, ʻo fakamatalaʻi ʻa e palakalafi 20 mo e 21, pea fakamatalaʻi foki mo e founga ʻe lava ke ngāueʻaki ai ʻa e tohí ko ha makatuʻunga ki he ako fakafāmili ʻo e Tohitapú.
6 Kapau naʻá ke lea ʻo kau ki he fānaú pea mo e fiemaʻu ke akoʻi kinautolú, te ke hoko atu nai ʻa e fetalanoaʻakí ʻi he foungá ni:
◼ “Ki muʻá naʻá ta talanoa ai fekauʻaki mo e ako fakalaumālie ʻoku fiemaʻu ki he fānaú pea mo e founga ʻe lava ke tokoniʻi ai kinautolu ʻe he ngaahi mātuʻá. ʻOku tokolahi ʻa e ngaahi mātuʻa kuó u lea ki ai ʻoku nau manavahē fekauʻaki mo e ʻulungaanga kovi ʻa e toʻutupu tokolahi ʻi he ʻahó ni. Ko e hā hoʻo fakakaukau fekauʻaki mo e . . . ? [Lave ki ha fakatātā ʻo e anga-kovi fakatalavou ʻoku faʻa fakatokangaʻi ʻi ho koló. Tuku ke ne tali.] Tuku ke u fakahā atu kiate koe ʻa e niʻihi ʻo e faleʻi ʻaonga ʻoku ʻomai ʻi he Tohitapú.” Huke ki he palakalafi 22 ʻi he peesi 246 ʻi he tohi Moʻui Taʻengata, ʻo fakamatalaʻi ʻa e poini tefitó, pea lau ʻa e Efeso 6:4. Fakahaaʻi ko e fānau tokolahi ʻoku nau fiemaʻu moʻoni ha akonaki mo ha tataki. ʻI he taimi ʻoku fakamātoato ai ʻa e ngaahi mātuʻá ʻi hono tokonaki iá, ʻoku fiefia ange ʻa e fānaú pea ʻulungaanga anga-fakaʻapaʻapa ange. Fakamatalaʻi ʻa e founga ʻoku tau ako ai ʻa e Tohitapú fakataha mo ʻetau fānaú.
7 Kapau ʻokú ke saiʻia ange ʻi ha lea faingofua, te ke ngāueʻaki nai ha lea kamata meimei tatau mo ia ʻoku maʻu ʻi he tafaʻaki ki ʻolunga ʻo e peesi 12 ʻi he tohi “Reasoning”:
◼ “ʻOku mau fakalototoʻaʻi homau ngaahi kaungāʻapí ke nau fakakaukau ki he kahaʻu maʻongoʻonga ʻoku tuku tauhi mai ʻe he Tohitapú maʻa kitautolú. [Lau ʻa e Fakahā 21:3, 4.] ʻOku ongo lelei ʻeni kiate koe? [Tuku ke ne tali.] Ko e vahe 19 ʻo e tohi ko ʻení ʻoku fakaeʻa mai ai ʻa e ngaahi tāpuaki kehe ʻe maʻu ʻe he faʻahinga talangofua ʻo e tangatá ʻi he malumalu ʻo e Puleʻanga ʻo e ʻOtuá.” Kapau ʻoku ʻi ai ha mahuʻingaʻia, tuʻuaki ʻa e tohi Moʻui Taʻengata.
8 ʻI he toe ʻaʻahí, te ke lava ʻo pehē:
◼ “ʻE ʻomai ʻe he Puleʻanga ʻo e ʻOtuá ha tāpuaki fakaofo ki he māmaní mo e faʻahinga ʻo e tangatá. Ko e ngaahi tāpuaki ko iá ʻoku fakatātaaʻi lelei ia ʻi heni ʻi he peesi 12 mo e 13. Ko e hā ʻokú ke vakai ki ai ʻoku fakamānako kiate koé? [Tuku ke ne tali.] Fakakaukau atu pe ʻe anga-fēfē ʻa e moʻui ʻi ha māmani hangē ko ʻení.” Lau ʻa e palakalafi 12. Kapau ʻoku ʻi ai ha mahuʻingaʻia, ʻeke ʻa e fehuʻi ʻi he palakalafi 13, pea fakamatalaʻi ʻa e talí. Fakahaaʻi ko e vahe ko ʻení ʻokú ne tali ʻa e ngaahi fehuʻi lahi ange fekauʻaki mo e ngaahi tāpuaki ʻo e Puleʻangá pea te ke saiʻia ke fakamatalaʻi kinautolu ʻi hoʻo toe ʻaʻahi hono hokó.
9 Lotu ke tāpuakiʻi ʻe Sihova ʻa e kotoa hoʻo ngaahi feinga ko ia ke fakahanga ʻa e tokangá ki he Tohitapú pea mo ʻene tataki ʻaongá.