Ko ʻEtau Ngāue Fakafaifekaú—Ko ha Fakahāhā Ia ʻo e ʻOfa Moʻoní
1 ʻI heʻetau ngāue fakafaifekaú ʻoku tau fakahāhā ai ʻetau talangofua ki he ongo fekau ʻe ua lahi tahá. (Mt. 22:37-39) Ko ʻetau ʻofa kia Sihová ʻokú ne ueʻi kitautolu ke pau ʻetau lea fekauʻaki mo iá. Ko ʻetau ʻofa ki hotau ngaahi kaungāʻapí ʻokú ne ueʻi kitautolu ke fakalototoʻaʻi kinautolu ke nau kumi ke ʻilo ʻa e finangalo mo e ngaahi taumuʻa ʻa e ʻOtuá, koeʻuhí hangē ko kitautolú, ke lava ke nau ʻofa kia Sihova pea ʻai ai kinautolu ke taau ke maʻu ʻa e pale ko e moʻui taʻengatá. Ko ia ai, ʻi heʻetau ngāue fakafaifekaú ʻoku tau fakalāngilangiʻi ai ʻa e huafa ʻo Sihová pea vahevahe atu ʻa e ʻamanaki mahuʻinga taha ʻo e Puleʻangá ki hotau ngaahi kaungāʻapí. ʻIo, ko ʻetau ngāue fakafaifekaú ko ha fakahāhā ia ʻo e ʻofa moʻoni ki he ʻOtuá pea ki he tangatá.
2 ʻOku ueʻi kitautolu ʻe heʻetau ʻofá ke lea ki he faʻahinga kakai kotoa pē ʻi he faʻahinga tuʻunga kotoa pē. (1 Kol. 9:21-23) Ke fakatātaaʻi: ʻI ha heka ha vakapuna, naʻe tangutu ai ha tokotaha mātuʻa Kalisitiane he tafaʻaki ʻo ha pātele Katolika Loma. Naʻe ʻai ʻe he tokotaha mātuʻá ʻa e pātelé ke ne lea tauʻatāina ange ʻaki ʻene ʻeke ha ngaahi fehuʻi fakapotopoto peá ne fakahanga leva ʻa e fetalanoaʻakí ki he Puleʻangá. ʻI he taimi naʻe hifo ai ʻa e pātelé mei he vakapuná, naʻá ne tali ha tohi ʻe ua ʻo ʻetau ngaahi tohí. Ko ha ola lelei ē ʻo e fakahāhā ʻe he tokotaha mātuʻá ʻa e ʻofa moʻoni ki hono kaungāʻapí!
3 ʻOku Ueʻi Kitautolu ʻe he ʻOfa Moʻoní ke Malanga: Ko kinautolu ko ia ʻoku nau kau ki he ngāue tāimuʻa tokoni mo taimi-kakató ko e moʻoni ʻoku nau fakahāhā ʻa e ʻofa moʻoni ki he ʻOtuá pea ki he kaungāʻapí. ʻOku feilaulauʻi maʻu pē ʻe he kau tāimuʻá honau taimí mo e iví ke tokoniʻi fakalaumālie ʻa e niʻihi kehé. Ko e hā ʻokú ne ueʻi kinautolu ke fai ʻení? Naʻe pehē ʻe he tāimuʻa ʻe taha: “ʻOku ou ʻilo ko e ʻofá ko ha fua ia ʻo e laumālie ʻo e ʻOtuá. Ko ia, kapau naʻe ʻikai ia, ʻe ʻikai te u ʻi he moʻoní au ia, ʻo ʻikai hoko ai ko ha tāimuʻa lavameʻa. ʻOku ʻai au ʻe he ʻofá ke u mahuʻingaʻia ʻi he kakaí, tokanga ki he ngaahi meʻa ʻoku fiemaʻu kiate kinautolú, pea ʻoku ou houngaʻia ʻi he tali ʻa e kakaí ki he ʻofá.” Naʻe fakahāhā ʻe Sīsū ʻa e ʻofa peheé ki he kakaí. He ʻi heʻene ʻalu mo ʻene kau ākongá ki ha feituʻu ke “mālōlō siʻi,” naʻe tomuʻa aʻu ʻa e fuʻu kakaí ia ki ai ʻiate kinautolu. Ko e hā ʻa e meʻa naʻe fai ʻe Sīsuú? ʻI he “langa hono fatu ʻi he ʻofa kiate kinautolu,” naʻá ne tuku ki tafaʻaki ʻa e meʻa naʻe fiemaʻu kiate iá ka ne “ako kiate kinautolu ha ngāhi meʻa lahi.”—Mk. 6:30-34.
4 Naʻa mo e taimi ʻoku talitekeʻi ai ʻe he kakaí ʻa e ongoongo lelei ʻoku tau ʻoatú, ʻoku tau fiefia loto pē, ʻo ʻilo ʻi hono ueʻi ʻe he ʻofá, kuo tau fai ai hotau lelei tahá ke tokoniʻi kinautolu ke nau maʻu ʻa e fakamoʻuí. ʻI he taimi ʻe toki fakamāuʻi kotoa ai kitautolu ʻe Kalaisí, te tau fiefia ʻaupito he naʻa tau fakahāhā ʻa e ʻofa moʻoní ʻaki ʻa e ‘fai hono kotoa ʻo hotau lakangá.’—2 Tim. 4:5.