ʻApasiaʻi Lahi ʻa e Huafa Fakaʻofoʻofa ʻo Sihová
1 Naʻe fakaongoongokoviʻi ʻe Sētane ʻa e huafa ʻo e ʻOtuá ʻi he taimi naʻá ne fakalotoʻi ai ʻetau ongo mātuʻá ke na faiangahalá. Naʻe fakahuʻuhuʻu ʻe he Tēvoló naʻe loi ʻa Sihova kia ʻĀtama. (Sen. 3:1-5) Koeʻuhi ʻoku fehokotaki ʻa e huafa fakaʻotuá mo e malava ko ia ʻa e ʻOtuá ke fakahoko ʻene folofolá, ko e taukave ʻa Sētané ko e tumutumu ia ʻo e lauʻikovi loí. ʻI heʻene fakahoko fakalakalaka ʻene taumuʻa fakaʻotuá, kuo fakaʻataʻatā ai ʻe Sihova hono huafá mei hono tukuakiʻí pea ʻai ia ke fakaʻofoʻofa.—Ai. 63:12-14.
2 Ko kitautolu ʻa e kakai ko ia ʻoku ‘uiʻaki’ ʻa e huafa ʻo Sihová. (Ng. 15:14, 17) ʻOku ʻomai ai heni kiate kitautolu ʻa e faingamālie ke tau fakahā pe ʻoku tau ongoʻi fēfē fekauʻaki mo hono fakamāʻoniʻoniʻi iá. ʻOku tau ʻiloʻi ko e huafa ʻo Sihová ʻoku fakaʻofoʻofa moʻoni, he ʻokú ne fakafofongaʻi ʻa e meʻa kotoa pē ʻoku lelei, anga-lelei, ʻofa, meesi, mo māʻoniʻoni. ʻOku tau ofoofo ʻi he fuʻu ngeia ʻo e huafa lāngilangiʻia ʻo e ʻOtuá. (Sāme 8:1; 99:3; 148:13) ʻOku totonu ke ueʻi kitautolu ke tau fai ʻa e hā?
3 Fakamāʻoniʻoniʻi ʻa e Huafa ʻo e ʻOtuá: ʻOku ʻikai lava ke toe ʻai ke māʻoniʻoni ange ʻa e huafa ʻo e ʻOtuá ʻi he tuʻunga kuó ne ʻi aí. Ka ʻi heʻetau ʻulungaanga maʻá mo hono malangaʻi ko ia ʻo e Puleʻangá, ʻoku lava ai ke tau fakahāhā ʻoku tau tuku ʻa e ʻapasia taupotu tahá ki he huafa ʻo e ʻOtuá. Tau kalanga: “Mou fakafetaʻi kia Sihova, kailavaki hono huafa, fakaʻilo ʻene ngaahi ngaue ki he ngaahi faʻahinga: mou fakamanatua ko hono huafa ʻoku maʻolunga.” (Ai. 12:4) ʻE lava fēfē ke tau fai ʻeni?
4 ʻOku lava ke tau ngāueʻaongaʻaki ʻa e faingamālie kotoa pē ke talaki ʻa e huafa ʻo Sihová pea mo e meʻa kotoa ʻokú ne fakafofongaʻí. Pe ʻi he founga anga-mahení pe ʻi he founga ʻikai anga-mahení, mei he fale ki he fale pe mei he falekoloa ki he falekoloa, ʻi he halá pe ʻi he telefoní, ko ʻetau ngāue fakamalangá ʻokú ne fakalāngilangiʻi ai ʻa Sihova. ʻI he taimi ʻoku tau maʻu ai ha faʻahinga mahuʻingaʻia ʻoku fiefanongó, ʻoku totonu ke tau fai ha ngaahi fokotuʻutuʻu pau ke toe foki ki ai pea akoʻi kinautolu ki he meʻa lahi ange fekauʻaki mo Sihová. ʻOku ʻuhinga iá kuo pau ke tau tauhi maʻu ʻa e ngaahi alea ko iá ʻo ʻoua ʻe liʻaki pea kītaki ʻi heʻetau ngaahi feinga ko ia ke kamata ha ngaahi ako Tohitapu ʻi ʻapi. ʻOku fakafiefiá, ʻi he taʻu kotoa pē ko e laui kilu ʻoku nau hoko mai ke ʻilo, fakaʻapaʻapa, pea fakamāʻoniʻoniʻi ʻa e huafa fakaʻofoʻofa ʻo Sihová.
5 Ko ʻetau kau ʻaufuatō ki he ngāue ko hono fakamāʻoniʻoniʻi ʻa e huafa ʻo e ʻOtuá ʻokú ne fakahaaʻi mahino ʻa e tafaʻaki ʻoku tau tuʻu ki aí ʻi he fekauʻaki mo e ʻīsiu naʻe langaʻi hake ʻe Sētane ʻi ʻĪtení. Ko e ngāue tuʻu-ki-muʻa mo lāngilangiʻia taha ʻeni ʻoku lava ke tau fakahokó. Tau ʻapasiaʻi lahi muʻa mo fakahīkihikiʻi faivelenga ʻa e huafa fakaʻofoʻofa ʻo Sihová!—1 Kal. 29:13.