Ongo Fefine “ʻOku Na Fakafitefitaʻa ʻi he Ngaue ʻa e ʻEiki”
1 ʻI he ngaahi lea ʻi ʻolungá, naʻe fakamatalaʻi ai ʻe Paula ʻa Talaifina mo Talaifosa, ko e ongo tuofāfine ngāue mālohi ʻi he fakatahaʻanga Lomá. Ko e tokotaha ʻe taha, ko Pēsisi, naʻá ne pehē: “Ko e toko taha ia kuo lahi ʻene fakafitefitaʻa ʻi he ngaue ʻa e ʻEiki.” Naʻe toe pehē foki ʻene lave lelei fekauʻaki mo Fīpē ko e “toko taha ia kuo ne taukapoʻi ʻa e meʻa ʻa e tokolahi.” (Loma 16:2, 12) ʻI he ngaahi Konga Tohitapú, naʻe fakaʻilongaʻi ai ʻa Toakase ko ha tokotaha ʻa ia “naʻe mohu ʻi he ngaahi ngaue lelei, mo e fai ʻofa.” (Ng. 9:36) Ko ha tāpuaki moʻoni ē ʻa e kau fefine fakalaumālié ki he fakatahaʻangá!
2 ʻOku tau houngaʻia ʻi he fanga tuofāfine ko ia ʻoku nau ngāue mālohi ʻi heʻetau fakatahaʻangá? ʻOku nau fai ʻa e konga lahi ʻo e ngāue fakamalangá, fai ʻa e lahi taha ʻo e ngaahi ako Tohitapú, pea tokoniʻi ʻa e tokolahi ʻo e faʻahinga foʻoú. ʻOku nau toe fakamoleki ʻa e taimi lahi ʻi hono tokoniʻi ʻa e fānaú ke nau fai ha fakalakalaka fakalaumālie. ʻOku fai ʻe he kau fefine Kalisitiané ʻenau tafaʻakí ʻi hono langa hake ʻa e laumālie ʻo e ʻofá, fiefiá, melinó, mo e faivelenga ʻi he fakatahaʻangá. ʻOku nau poupou ʻi he ngaahi founga lahi koeʻuhi ke malava ʻa honau ngaahi husepānití pea mo e ngaahi mēmipa kehe ʻo e fāmilí ke fai ʻa e meʻa lahi ange ʻi he ngāue ʻa Sihová.
3 Fanga Tuofāfine ʻi he Ngāue Taimi-Kakató: ʻOku ʻi he lotolotonga ʻo e faʻahinga ko ia ʻoku nau ngāue mālohi ʻaupito ʻi he ʻEikí ʻa e fanga tuofāfine misinalé, ko e tokolahi ʻoku nau kau ʻi hono langa hake ʻo e ngāué ʻi he ngaahi fonua mulí. ʻI he ngaahi fakatahaʻanga ʻoku ngāue ai ʻa honau ngaahi husepānití, ʻoku femoʻuekina ai ʻa e ngaahi uaifi ʻo e kau ʻovasia fefonongaʻakí ʻi he ngāue fakamalangá, ʻi hono fakalototoʻaʻi ʻa e fanga tuofāfine tokolahi. Ke ʻoua naʻa ngalo ʻa e fanga tuofāfine ʻi he Pētelí, ʻa ia ʻoku nau fakahoko faivelenga ʻa e ngāue toputapú ʻi he poupou ki he kautaha ʻa Sihová. Pea ko hotau fanga tuofāfine tāimuʻa tuʻumaʻú, ʻi heʻenau ngaahi ngāue anga-tonu ʻi hono fakahīkihikiʻi ʻa e ʻOtuá, ʻoku nau tokoniʻi ai ʻa e laui afe ke ako ʻa e moʻoní.
4 ʻOku maʻu ʻe he kau fefine anga-tonu ko ʻení ʻa e fiemālie lahi ʻi heʻenau founga moʻui feilaulauʻi-kitá. (1 Tim. 6:6, 8) ʻOku taau mo kinautolu ʻa e fakaongoongoleleiʻi pea mo e hā pē ha fakalototoʻa mo e poupou ʻoku lava ke tau ʻoange kiate kinautolú.
5 Ko e kau fefine Kalisitiané ko ha koloa mahuʻinga kinautolu ki he kautaha ʻa Sihová, ʻi hono fakahoko ʻa e ngāue anga-tonú ʻa ia ko ha tāpuaki ia ki he tokotaha kotoa. ʻOfa ke tau hokohoko atu ʻetau houngaʻia ʻi he kau fefine peheé pea lotu ke ʻiate kinautolu ʻa e tāpuaki ʻa Sihová ʻi heʻenau hanganaki “fakafitefitaʻa ʻi he ngaue ʻa e ʻEiki.”