“Mou Hanganaki ʻĀ Pē”
1 ʻI he hili ʻa hono fakamatalaʻi ʻa e ngaahi meʻa mahuʻinga te ne fakaʻilongaʻi ʻa e ngaahi ʻaho fakaʻosi ʻo e fokotuʻutuʻu ʻo e ngaahi meʻa ko ʻení, naʻe enginaki ʻa Sīsū ki heʻene kau ākongá ke nau “hanganaki ʻā pē.” (Mk. 13:33, NW) Ko e hā kuo pau ai ki he kau Kalisitiané ke nau hanganaki ʻaá? Koeʻuhí he ʻoku tau moʻui ʻi he taimi fakatuʻutāmaki taha ʻi he hisitōlia ʻo e faʻahinga ʻo e tangatá. ʻOku ʻikai malava ke tau hoko ʻo tulemohe fakalaumālie. ʻE iku ia ki heʻetau taʻemalava ke houngaʻia ʻi he ngāue ko ia kuo ʻosi ʻomai ʻe Sihova kiate kitautolú ke tau fai ʻi he taimi ko ʻeni ʻo e ngataʻangá. Ko e hā ʻa e ngāue ko iá?
2 ʻOku ʻai ʻe Sihova hono kakaí ke nau talaki ʻi he foʻi māmaní kotoa ʻa e ongoongo lelei fekauʻaki mo hono Puleʻangá—ko e ʻamanaki pē ia ʻe taha ki he faʻahinga ʻo e tangatá. Ko ʻetau ngāue vāofi mo e kautaha ʻa e ʻOtuá ʻokú ne fakaʻilongaʻi kitautolu ko e kau Kalisitiane moʻoni, ʻa ia ʻoku tau tokanga fekauʻaki mo e taimí pea mo e fiemaʻu ke tokoniʻi ʻa e niʻihi kehé ke nau fanongo ki he “ngaahi lea ʻo e moʻui taʻengata.” (Sione 6:68) ʻI he kau faivelenga ki he ngāue mahuʻinga ʻaupito ko ʻení, ʻoku tau ʻoatu ai ʻa e fakamoʻoni ʻo ʻetau ʻāʻā fakalaumālié.
3 Ueʻi ke Malanga: ʻI he tuʻunga ko e Kau Fakamoʻoni ʻa Sihová, ʻoku totonu ke tau fakakaukau pau fekauʻaki mo ʻetau ngāue fakafaifekaú. Ko e ʻofa ki he ʻOtuá mo e kaungāʻapí ʻoku ueʻi ai kitautolu fakafoʻituitui ke tau kau ki he ngāue fakamalangá. (1 Kol. 9:16, 17) ʻI he fai peheé, te tau fakamoʻui ai kitautolu pea pehē foki ki he faʻahinga ʻoku nau fanongo mai kiate kitautolú. (1 Tim. 4:16) ʻAi ko ʻetau fakapapaú ia ke tau kau maʻu pē ʻo fakatatau ki heʻetau malavá pea ʻi he fuoloa ʻoku fiemaʻú ʻi he malanga fekauʻaki mo e founga-pule lelei taha ʻa ia ʻe lava ke maʻu ʻe he faʻahinga ʻo e tangatá—ko e Puleʻanga ʻo e ʻOtuá!
4 Ko e fakavavevave ʻo ʻetau ngāue fakafaifekaú ʻoku ʻai ia ʻe ha moʻoniʻi meʻa mahuʻinga ke maongo kiate kitautolu—ko e hoko fakafokifā ʻo e mamahi lahí ʻe hoko mai ia lolotonga ʻetau kei kau ki he ngāue ko ʻení. Ko e ʻikai ke tau ʻilo ʻa e ʻahó mo e houá ʻoku fiemaʻu ai ke tau hanganaki ʻāʻā pea mateuteu ʻi he taimi kotoa pē, ʻo falala ʻi he faʻa lotu kia Sihova. (Ef. 6:18) Ko e lahi ʻo e ngāue fakamalangá ʻoku hokohoko atu pē ʻa ʻene tupulakí. Ka ʻi ha ʻaho ʻe taha vave mai, ʻe aʻu ai ʻa e ngāue fakaefakamoʻoni lahi taha ʻi he hisitōlia ʻo e faʻahinga ʻo e tangatá ki ha tumutumu.
5 Muimui anga-tonu ki he fekau ʻa Sīsū ke “hanganaki ʻā pē.” ʻOku mahuʻinga lahi ange ʻeni he taimí ni ʻi ha toe taimi pē ki muʻa. ʻOfa ke tau tali ʻaki ha ongoʻi ʻo e fakavavevave. ʻI he ʻahó ni pea mo e ʻaho kotoa pē, ʻai ke tau tuʻumaʻu ʻi he tokanga fakamātoato fakalaumālie, ʻāʻā, pea longomoʻui ʻi he ngāue ʻa Sihová. ʻIo, ʻofa ke tau “ʻā pe ʻo fakaʻehiʻehi mei he konā.”—1 Tes. 5:6.