“Siviʻi Pe ʻOku Taau”—Anga-Fēfē?
1 ʻI he tupu hokohoko ʻa e kautaha ʻa Sihová, ʻoku ʻi ai ha fiemaʻu hokohoko ki ha fanga tokoua taau ke nau ngāue ko ha kau sevāniti fakafaifekau. Kuo teʻeki ai ke fakanofo ʻa e tokolahi taha ʻo e fanga tokouá, ʻo kau ai ʻa e kau taʻu hongofulutupu, ʻoku nau maʻu ha holi ke ngāue ʻi he fakatahaʻangá. ʻI he taimi ʻoku vaheʻi ai kiate kinautolu ha ngāue lahi ange, ʻoku nau ongoʻi ʻaonga pea maʻu mo ha ongoʻi lavameʻa. Ko ʻenau laka ki muʻá ʻoku fakatuʻunga ia ʻi honau “siviʻi pe ʻoku taau.” (1 Tim. 3:10, NW) ʻOku anga-fēfē hono fakahoko ʻení?
2 Ko e Ngafa ʻo e Kau Mātuʻá: Ko ha konga ʻo hono fakafuofuaʻi ha tokoua ʻaki ʻa e ngaahi tuʻunga taau Fakatohitapu ke hoko ko ha sevāniti fakafaifekau ʻoku maʻu ʻi he 1 Timote 3:8-13, ʻe vakaiʻi ʻe he kau mātuʻá ʻa e taau ʻa ha tokoua ke ne fua ʻa e fatongiá. Te nau vaheʻi nai ia ke ne fakahoko ha ngaahi ngāue ʻaonga fekauʻaki mo hono tokangaʻi ʻo e ngaahi makasiní mo e ʻū tohí, feʻaveʻaki ʻo e ngaahi meʻa fakaleʻolahí, tauhi ʻo e Fale Fakatahaʻangá, pea mo e hā fua. ʻE vakaiʻi leva ʻe he kau mātuʻá pe ʻoku fēfē ʻene tali ki aí pea mo ʻene tokanga ki hono ngaahi fatongiá. Te nau siofi ʻa e ngaahi ʻulungaanga ʻo e alafalalaʻanga, tauhi-taimi, ngāue mālohi, anga-fakanānā, ko ha laumālie loto-lelei, pea mo ha malava ke feohi lelei mo e niʻihi kehé. (Fili. 2:20) ʻOkú ne faʻifaʻitakiʻanga ʻi hono valá mo e teuteú? ʻOkú ne maʻu ha ongoʻi fua fatongia? ʻOku nau fiemaʻu ke sio he “ʻene ngaahi ngaue ʻi he lelei ʻene toʻonga, ʻo fai ʻaki ʻa e angavaivai ʻa poto.” (Sem. 3:13) ʻOkú ne kakapa moʻoni atu ke hoko ko ha tokoni ʻi he fakatahaʻangá? ʻOkú ne fakahoko ʻa e fekau ʻa Sīsū ke “ngaohi ʻa e ngāhi kakai kotoa pe ko [ʻene] kau ako” ʻaki ʻa e kau faivelenga ʻi he ngāue fakamalangá?—Mt. 28:19; sio ki he Taua Leʻo ʻo ʻEpeleli 1, 1991, peesi 10-20.
3 Lolotonga ʻoku ʻikai ke fokotuʻu mai ʻe he Tohitapú ia ha taʻu fakangatangata ki ha taha ke hoko ʻo fakanofo ko ha sevāniti fakafaifekau, ʻoku lāulea ia ki he fanga tokoua peheé ʻi he tuʻunga ko e “kau tangata ko e kau faifekau.” ʻE ʻikai te tau fuʻu ʻamanekina kinautolu ke nau ʻi honau tuʻunga taʻu hongofulu tupu siʻí pe hongofulu tupu lahí, tautefito koeʻuhi he ʻoku fai ha lāulea ki he malava ke maʻu ha uaifi mo e fānaú. (1 Tim. 3:12, 13) Ko e kau tangata peheé ʻoku totonu ke ʻoua te nau ʻunua ki he “holi fakatalavou” ka ʻoku totonu ke nau tataki kinautolu ʻi ha anga-fakamātoato, ʻo maʻu ha tuʻunga lelei mo ha konisēnisi maʻa ʻi he ʻao ʻo e ʻOtuá mo e tangatá.—2 Tim. 2:22.
4 Lolotonga ʻoku ʻaonga ʻa e malava fakanatulá, ko e ʻulungaanga mo e tākiekina ʻa ha taha ʻoku lau moʻoní. ʻOku holi anga-fakatōkilalo ha tokoua ke fakahīkihikiʻi ʻa e ʻOtuá pea ke ne hoko ʻo ngāue ki hono fanga tokouá? Kapau ko ia, ʻe tāpuakiʻi ʻe Sihova ʻa ʻene ngaahi feinga ke fai ha fakalakalaka ʻi he fakatahaʻangá.