Puha Fehuʻi

◼ Ko hai ʻoku totonu ke ne fai ʻa e lotu ʻi he ngaahi fakataha ʻa e fakatahaʻangá?

Ko e lotu fakaefakatahaʻangá ko ha konga mātuʻaki mahuʻinga ia ʻo ʻetau lotú. Ko hono fakafofongaʻi ʻa e niʻihi kehé ʻi he ʻao ʻo Sihová ko ha monū maʻongoʻonga ia pea mo ha fatongia mamafa. ʻI he vakai atu ki hono mahuʻingá, ʻoku fiemaʻu ki he kau mātuʻá ke nau ngāueʻaki ʻa e fakaʻutoʻuta leleí ʻi hono fili ʻa e fanga tokoua ko ia ʻoku taau ke nau fai ʻa e lotu ʻi he ngaahi fakatahá. Ko e fanga tokoua ʻosi papitaiso ʻoku nau fakafofongaʻi ʻa e fakatahaʻangá ʻoku totonu ke nau hoko ko e kau faifekau Kalisitiane matuʻotuʻa ʻoku ʻiloa kinautolu ko e kau faʻifaʻitakiʻanga lelei pea ʻoku nau maʻu ʻa e tokaʻi ʻa e fakatahaʻangá. Ko ʻenau ngaahi lotu anga-ʻapasia mo anga-fakaʻapaʻapá ʻoku totonu ke ne fakahaaʻi ha vahaʻangatae lelei mo Sihova ko e ʻOtuá. Ko e kupu “Lotu ʻi he ʻAo ʻo e Niʻihi Kehé ʻAki ha Loto Anga-Fakatōkilalo” ʻi he ʻīsiu ʻo e The Watchtower ʻo Mē 15, 1986, ʻoku fakahaaʻi mai ai ʻa e ngaahi tefitoʻi moʻoni mahuʻinga ʻa ia ʻoku tautautefito ʻene ʻaongá ki he faʻahinga ʻoku nau lotu fakahāhā maʻá e fakatahaʻangá.

ʻE ʻikai ke fili ʻe he kau mātuʻá ke fai ha lotu ʻe ha tokoua ʻa ia ʻoku ʻiloa ʻi ha ʻulungaanga fehuʻia pe launoa. ʻE ʻikai ke fili ha tokoua ʻoku angaanga ke loto-ʻiteʻita pe hehema ke ngāueʻaki ʻa e lotu fakahāhaá ko ha founga ia ke fakaeʻa ai ʻa e ngaahi faikehekehe fakafoʻituituí. (1 Tim. 2:8) Neongo kuo ʻosi papitaiso nai ha tokoua taʻu hongofulu tupu, ʻe pau ke fakapapauʻi ʻe he kau mātuʻá pe kuó ne maʻu ʻa e matuʻotuʻa fakalaumālié ke ne lotu maʻá e fakatahaʻangá.​—Ng. 16:​1, 2.

ʻI he taimi ki he taimi ʻi he ngaahi fakataha ki he ngāue fakamalangá, ʻe fiemaʻu nai ki ha tuofefine ʻosi papitaiso ke ne fai ha lotu kapau ʻoku ʻikai ke ʻi ai ha tokoua taau ke ne fakafofongaʻi ʻa e kulupú. ʻE fiemaʻu kiate ia ke ne tui ha pūlou taau. Kapau ʻoku ngalingali ʻe ʻikai ke ʻi ai ha tokoua taau ʻi he ngaahi fakataha pau ki he ngāué, ʻoku totonu ki he kau mātuʻá ke nau vaheʻi ha tuofefine taau ke ne tataki ia.

ʻOku angamaheniʻaki ki he tokotaha-sea ʻo e Fakataha Maʻá e Kakaí ke ne fai ʻa e lotu kamatá. Kae kehe, ʻi he ngaahi fakataha kehe ʻa e fakatahaʻangá, ʻi he taimi ʻoku ʻi ai ai ha fanga tokoua taau tokolahi angé, ko ha tokotaha kehe mei he tokoua ʻokú ne kamata ʻa e fakatahá pe ko e tokotaha kuo ʻosi vaheʻi ki he konga fakaʻosí ʻe fiemaʻu nai ke ne fai ʻa e lotu kamatá pe fakaʻosí. ʻI ha tuʻunga pē, ko e tokoua ko ia ʻoku fiemaʻu ke ne lotu ʻi ha fakataha ʻa e fakatahaʻangá ʻoku totonu ke fakahā ki muʻa kiate ia koeʻuhí ke ne lava ʻo fai ha fakakaukau ki he meʻa te ne leaʻakí. Pea te ne lava leva ke fai ha lotu fehōhoanakimālie, mo fakamātoato ʻa ia ʻoku taau mo e fakataha tefito ko iá.

Ko e ngaahi lotu peheé ʻoku fiemaʻu ke ʻoua ʻe lōloa. ʻI he taimi ʻoku fai ai ʻe ha tokoua ha lotu fakahāhā, ʻe faʻa mahinoʻi lelei ange kapau ʻokú ne tuʻu hake, ʻo fakahaaʻi ia ʻaki ʻa e leʻo-lahi feʻunga, pea lea mahino. ʻE fakaʻatā ai heni ʻa e kotoa ʻo e faʻahinga ʻoku fakatahatahá ke nau fanongo ki he lotú pea ʻi he fakaʻosí ke nau leaʻaki ha “Emeni” loto-moʻoni!​—1 Kal. 16:36; 1 Kol. 14:16.