ʻOku Fakakoloaʻi Kitautolu ʻe he Tāpuaki ʻa Sihová
1 Ko ha lavameʻa ʻa ha tokotaha ʻoku faʻa fakafuofuaʻaki ia ʻa e lahi ʻo hono vāhengá. Ko e ʻuhinga ia ʻoku vakai ai ʻa e kakai tokolahi ki he faʻahinga ʻoku ʻi ai ʻenau paʻangá ko e kakai ia ʻoku fiefia tahá mo fiemālie tahá. Kae kehe, ko e kakai ʻoku nau ongoʻi ʻoku lava ʻe he paʻangá ʻo fakatau mai ʻa e fiefiá ʻoku fakamamahi ʻenau maʻuhalá. (Koh. 5:12) ʻOku ʻikai ha fiefia tuʻuloa ki he faʻahinga ʻoku nau “loto ke koloaʻia” ʻi ha founga fakamatelié. (1 Tim. 6:9) Ko hono kehé, ko e kau sevāniti ʻa Sihová ʻoku nau fiefia moʻoni pea ko e kakai koloaʻia taha ia ʻi he māmaní. (Pal. 10:22; Fkh. 2:9) ʻO anga-fēfē?
2 Fakamoʻoni ʻo ʻEtau Koloaʻiá: ʻOku tau maʻu ʻa e vavanga fakalaumālie lahi pea mo hono mahinoʻi ʻa e Folofola ʻa e ʻOtuá, ko e Tohitapú. Fakafou ʻi heʻene kautaha fakaemāmaní, ʻoku hokohoko atu ai hono akoʻi kitautolu ʻe Sihova ʻo fekauʻaki mo ia pea mo hono ʻAló, ki he ʻaonga tuʻuloa maʻatautolu. Ko e mahino totonú ʻokú ne ʻai ai ke tau malava ʻo ʻunuʻunu ofi kia Sihova pea fiefia ʻi ha vahaʻangatae fekoekoeʻi mo ia. (Sem. 4:8) Ko hono ʻiloʻi ʻa e leleí mei he koví pea muimui ki he ngaahi lao ʻa e ʻOtuá ʻokú ne maluʻi kitautolu mei he ngaahi mahaki pea mo e ngaahi fakatuʻutāmaki ʻe niʻihi. ʻOku tau maʻu ʻa e tuipau ʻe tokonaki ʻe Sihova maʻatautolu, ʻo iku atu ai ki he fiemālie fakaʻotua mo e nonga ʻo e ʻatamaí.—Mt. 6:33.
3 ʻOku tau fiefia ʻi he melino mo e fāʻūtaha ʻi heʻetau fetokouaʻaki fakalaumālié koeʻuhí he ʻoku tau fakatupulekina ʻa e fua ʻo e laumālie ʻo e ʻOtuá. ʻI hono fakafāʻūtahaʻi ʻaki ha haʻi mālohi ʻo e ʻofá, ʻoku ʻikai ʻaupito fiemaʻu ke tau ongoʻi ʻoku liʻekina kitautolu ʻe he ʻOtuá pe ko hotau fanga tokouá ʻi heʻetau fehangahangai mo e tuʻutāmakí.—Kal. 6:10.
4 ʻOku maʻu ʻe heʻetau moʻuí ʻa e ʻuhinga mo e taumuʻa moʻoni. ʻOku tau lau ia ko ha monū fakaofo ke kau ki hono malangaʻi ʻi māmani lahi ʻa e ongoongo leleí. ʻOku ʻomai ai heni ʻa e fiefia tuʻuloa ʻi heʻetau tokoni ki he niʻihi kehé ke nau hoko ʻo ʻi ha vahaʻangatae lelei mo e ʻOtuá pea ngāue fāʻūtaha mo kitautolu ʻi he lotu maʻá. Ko ʻetau koloa mahuʻinga ʻo e ngāue fakafaifekaú ʻokú ne ʻomai ʻa e lāngilangi kia Sihova pea ʻokú ne ʻomai kiate kitautolu ʻa e fiemālie ʻi he tokoni ki hono fakamāʻoniʻoniʻi ʻo hono huafá. ʻOku tau tauhi maʻu ha fakakaukau pau, ʻo ʻiloʻi ko ʻetau ʻamanaki ki he kahaʻú ʻe vavé ni ke aʻusia ia.
5 Ko Hono Fakahāhā ʻEtau Houngaʻiá: ʻOfa ke tau houngaʻia ai pē ʻi he ngaahi tāpuaki ʻa Sihová, ʻa ē ʻokú ne ʻai moʻoni kitautolu ko e kakai koloaʻia taha ʻi he foʻi māmaní. (Pal. 22:4) Ko hono vaheʻi ha taimi ʻi he ʻaho taki taha ke fakalaulauloto ai ki he meʻa ʻoku tau maʻú ʻokú ne ueʻi kitautolu ke tau fakamālō ai kia Sihova ki heʻene ʻofa loto-fiefoakí pea hokohoko ʻoatu ai kiate ia ʻa ʻetau anga-līʻoa maʻataʻataá.