Manavahē kia Sihova ʻi he ʻAhó Kotoa
1 “Ko e kamataʻanga ʻo e poto ko e ʻapasia kia Sihova.” (Sāme 111:10) ʻOku ueʻi ai kitautolu ke tau fai ʻa e ngaahi ngāue leleí pea tokoniʻi ai kitautolu ke tau tafoki mei he meʻa ʻoku koví. (Pal. 16:6) Ko e manavahē ko ʻení ko ha ʻapasia loloto ki hotau Tokotaha-Fakatupú, ʻo ueʻi ai kitautolu ke fakaʻehiʻehi mei he taʻefakahōifua mo e talangataʻa kiate iá. Ko e meʻa ia ʻoku fiemaʻu ke tau fakatupulekina pea fakahāhā ʻi he ʻahó kotoa.—Pal. 8:13.
2 ʻI he ʻaho kotoa pē, ko e laumālie ʻo e māmani ʻo Sētané ʻokú ne fakahūhū mai ʻa e tenge lahi fakaʻulia kiate kitautolu ke tau muimui ki heʻene ngaahi founga koví. (Ef. 6:11, 12) Ko hotau kakano taʻehaohaoá ʻoku angahalaʻia pea ʻoku fakaenatula pē ʻene hehema ki he meʻa ʻoku koví. (Kal. 5:17) Ko ia, ke talangofua ki he ngaahi fekau ʻa Sihová, hoko ʻo fiefia, pea maʻu ʻa e moʻuí, ʻoku fiemaʻu ke tau manavahē kiate ia ʻi he ʻahó kotoa.—Teu. 10:12, 13.
3 ʻI he Hepelu 10:24, 25, ʻoku enginaki mai ai kiate kitautolu ke tau fakatahataha fakataha koeʻuhí ke tau fefakaʻaiʻaiʻaki “pea ʻasili” he lolotonga ʻo e taimi ko ʻeni ʻoku tau moʻui aí. ʻOku mātuʻaki fiemaʻu ʻa e maʻu maʻu pē ʻa e fakatahá kapau ʻoku tau fie hao atu ʻi he ngaahi ʻaho fakaʻosi ko ʻení. Ko ʻetau manavahē ki hano taʻefakahōifuaʻi ʻa e ʻOtuá ʻoku ueʻi ai kitautolu ke maʻu ʻa e ngaahi fakatahá pea fakamahuʻingaʻi māʻolunga ʻa honau taumuʻá. Ko e faʻahinga ʻoku manavahē ki he ʻOtuá ʻoku nau vakai ki hono maʻu ʻa e ngaahi fakataha faka-Kalisitiané ko ha monū toputapu.
4 Ko e talangofua ki he fekau ke malangaʻi ʻa e ongoongo lelei ʻo e Puleʻangá ko e founga ia ʻe taha ʻoku tau fakahāhā ai ʻetau manavahē ki he ʻOtuá. (Mt. 28:19, 20; Ng. 10:42) Ko e taumuʻa tefito ʻo ʻetau ngāue fakamalangá ke tokoniʻi ʻa e niʻihi kehé ke nau fakatupulekina ʻa e manavahē kia Sihová pea anganofo ki hono finangaló. ʻOku tau fakahoko ʻeni ʻaki hono fai ʻa e ngaahi toe ʻaʻahí, feinga ke kamata ha ngaahi ako Tohitapu ʻi ʻapi, pea akoʻi foki ki he niʻihi kehé ʻa e kotoa ʻo e ngaahi fekau ʻa e ʻOtuá. ʻOku tau fakahāhā ai ʻetau manavahē kia Sihová pea mo ʻetau ʻofa ki he kaungāʻapí.—Mt. 22:37-39.
5 Ko e faʻahinga ʻoku ʻikai ke manavahē ki he ʻOtuá ʻoku ʻikai te nau fakatupulekina ha houngaʻia ki he ngaahi meʻa fakalaumālié, pea ʻoku nau tō ki he ʻea fakatupu mate ʻo e māmaní, pe ko e anga ʻene fakakaukaú. (Ef. 2:2) ʻOfa ko ʻetau fakapapaú ia ke tau “fai ai ki he ʻOtua ha ngaue te ne hohóʻia ai, fai mo e fakaʻapaʻapa mo e manavahe.” (Hep. 12:28) Te tau utu ai foki ʻa e ngaahi tāpuaki ʻo e faʻahinga ʻoku nau manavahē kia Sihova ʻi he ʻahó kotoa.