Ngaahi Mātuʻa—Fakahūhū ʻa e Ngaahi ʻUlungaanga Leleí ki Hoʻomou Fānaú
1 ʻOku ʻikai ke fakaenatula pē hono maʻu ʻa e ngaahi ʻulungaanga leleí, pe ko hono maʻu fakafokifā pē kinautolu. ʻIkai ko ia pē, ko hono fakahūhū ʻa e ngaahi ʻulungaanga leleí ki he fānaú, ʻoku fiemaʻu ki ai ʻa e taimi. Ko e “fakahūhuú” ʻoku ʻuhingá “ke ʻoatu māmālie” pe “ʻai ke tō tahataha.” ʻOku fiemaʻu ʻa e huʻufatahá mei he ngaahi mātuʻá koeʻuhí ke nau “tauhi hake [ʻa ʻenau fānaú] ʻi he akonaki mo e fakatonutonu fakaʻatamai ʻa Sihová.”—Ef. 6:4, NW.
2 Kamata mei he Kei Valevalé: Ko e malava ʻa e fānau iiki ʻaupitó ke ako pea mo fai ha ngaahi meʻa foʻoú ʻoku fakaofo. Neongo ʻoku faʻa faingataʻa ki he kakai lalahí ke ako ha lea foʻou, ko e fānau ʻoku teʻeki ke nau akó ʻoku lava ke nau ako ʻa e lea ʻe ua pe tolu fakaʻangataha. ʻOua ʻaupito te ke ongoʻi ko hoʻo kiʻi tamá ʻoku fuʻu kei siʻi ke ne fakatupulekina ha ngaahi ʻulungaanga lelei. Kapau ʻe kamata tōmuʻa ʻa e fakahinohino ʻi he moʻoni faka-Tohitapú pea fai hokohoko, ʻi he taimi ʻoku kiʻi lahilahi hake ai ʻa e kiʻi tamá, ʻe fonu hono ʻatamaí ʻi he ʻilo ʻa ia te ne ʻai ai ia “ke maʻu ʻa e fakamoʻui.”—2 Tim. 3:15.
3 ʻAi ʻa e Ngāue Fakamalangá ko ha Tōʻonga: Ko ha ʻulungaanga lelei ke fakahūhū he lolotonga ʻo e ʻuluaki ngaahi taʻu ʻo e tupu hake ʻa e kiʻi tamá ko hono malangaʻi tuʻumaʻu ʻa e ongoongo lelei ʻo e Puleʻanga ʻo e ʻOtuá. ʻOku kamata ʻeni ʻe he ngaahi mātuʻa tokolahi ʻaki hono ʻave ʻenau fānaú ʻi he ngāue fakafaifekau fale-ki-he-falé he lolotonga ʻo e kei valevale ʻa e fānaú. Ko e kau maʻu pē ʻa e mātuʻá ʻi he ngāue fakaefakamoʻoní ʻoku tokoniʻi ai ʻenau fānaú ke nau fakatupulekina ʻa e houngaʻia mo e faivelenga ki he ngāue fakafaifekaú. ʻOku lava ke fakahaaʻi ʻe he ngaahi mātuʻá ki he fānaú ʻa e founga ke nau kau ai ʻi hono fai ha fakamoʻoni ʻi he tafaʻaki taki taha ʻo e ngāue fakamalangá.
4 Ko e hoko ʻo kau ʻi he Ako Fakafaifekau Fakateokalatí ʻoku toe tokoni ia ki he fānaú. ʻOku akoʻi ai kiate kinautolu ʻa e ngaahi ʻulungaanga ʻo e ako leleí pea mo e founga ke lautohi ai fakataha mo e mahinó. ʻOku nau ako ai ke fetalanoaʻaki fekauʻaki mo e Tohitapú, fai ʻo e ngaahi toe ʻaʻahí, pea mo hono fai ʻa e ngaahi ako Tohitapú. Ko e ako peheé ʻoku ueʻi nai ai kinautolu ke nau tāimuʻa pea kakapa atu ki he ngaahi monū makehe ʻo e ngāué. Ko e kau Pēteli mo e kau misinale tokolahi ʻoku nau manatu lelei ki honau ngaahi ʻaho ki muʻa ʻi he Ako Fakafaifekaú pea ʻoku nau fakakaukau ki ai ko ha tokonaki ia naʻá ne tokoniʻi kinautolu ke nau fakatupulekina ai ʻa e ngaahi ʻulungaanga leleí.
5 ʻOku tau hangē kotoa ko e ʻumea ʻi he ongo toʻukupu ʻo e Tufunga-ʻUmea Lahí, ʻa Sihova. (Ai. 64:8) Ko e foʻou ange ʻa e ʻumeá, ko e faingofua ange ia ʻo hono fakafuó. Ko e fuoloa ange ʻene mōmoá, ko ʻene hoko ia ʻo fefeka angé. ʻOku pehē pē mo e kakaí. ʻI he taimi ʻoku nau kei iiki aí, ʻoku ofeʻingofua ange ai kinautolu—pea ko e kei iiki angé, ko e lelei angé ia. Ko honau ngaahi taʻu ki muʻá ko e ngaahi taʻu ia ʻo e tupu haké, ʻa ia ʻe fai ai ʻa honau fakafuó ki he leleí pe ki he koví. ʻI he tuʻunga ko ha mātuʻa tokangá, kamata tōmuʻa ke fakahūhū ki hoʻo fānaú ʻa e ngaahi ʻulungaanga leleí ʻi he ngāue fakafaifekau faka-Kalisitiané.