“Ki he ʻOtua ʻOku Malava ʻa e Meʻa Kotoa Pe”
1 Ko e ngāue tefito ʻa e fakatahaʻanga Kalisitiané ko hono malangaʻi ʻa e pōpoaki ʻo e Puleʻangá ʻi māmani lahi. (Mt. 24:14) Ko ha ngāue lahi ʻaupito ia. Ki he vakai ʻa e tokolahi, ʻoku hā ngali ʻoku fiemaʻu ha ngaahi koloa ʻoku mahulu atu ia mei he meʻa ʻoku tau maʻú. Ki ha niʻihi, ko hono fakahoko ʻo e ngāue ko ʻení heʻikai meimei malava ia koeʻuhí he ʻoku uesia kitautolu ʻe he manukí, fakafepakí, mo e fakatangá. (Mt. 24:9; 2 Tim. 3:12) ʻOku tuipau ʻa e kau fakataʻetaʻetuí ʻo pehē ko e ngāue ko ʻení ko ha meʻa heʻikai malava ke fakahoko. Kae kehe, naʻe pehē ʻe Sīsū: “Ki he ʻOtua ʻoku malava ʻa e meʻa kotoa pe.”—Mt. 19:26.
2 Ko e Ngaahi Faʻifaʻitakiʻanga Pau ke Faʻifaʻitaki Ki Ai: Naʻe kamata ʻe Sīsū ʻene ngāue fakafaifekaú ʻi he tuʻunga ko e tangata pē taha ke fehangahangai mo e māmaní. ʻI he feinga ke taʻofi ia mei haʻane lavameʻá, naʻe tukuakiʻi ia ʻe he kau fakafepakí ki he ngaahi meʻa fakamā kotoa pē ʻoku ala fakakaukau atu ki ai, pea faifai atu pē ʻo nau ʻai ia ke ne faingataʻaʻia ʻi he pekia fakamamahi. Ka, ʻi he ngataʻangá, naʻe fakahaaʻi loto-maʻu ʻe Sīsū: “Kuo u ikuna ʻa mamani ʻe au.” (Sione 16:33) Ko ha lavameʻa fakaofo moʻoni ia!
3 Naʻe fakahāhā ʻe he kau ākonga ʻa Sīsuú ʻa e laumālie loto-toʻa mo faivelenga tatau ʻi he ngāue fakafaifekau faka-Kalisitiané. Ko e tokolahi naʻe haha, tā, lī ki he pilīsoné pea naʻa mo hono tāmateʻi. Ka, naʻa nau “fiefia koeʻuhi kuo lau kinautolu ʻoku nau tāu ke ngaohikoviʻi koeʻuhi ko e huafa.” (Ng. 5:41) ʻI he taʻeʻamanekina kiate kinautolú, naʻa nau fakahoko ai ʻa e ngāue hā ngali taʻemalava ko hono malangaʻi ʻa e ongoongo leleí “ki he ngataʻanga ʻo māmani.”—Ng. 1:8; Kol. 1:23.
4 Founga ke Lavameʻa Ai ʻi Hotau Taimí: Ko kitautolu foki ʻoku tau fakahoko faivelenga ʻa e ngāue ko hono malangaʻi ʻo e Puleʻangá ʻi he fehangahangai mo e ngaahi tuʻunga ʻoku hā ngalikehé. Neongo ʻa e ngaahi fakataputapuí, fakatangá, tuku pōpulá, pea mo e ngaahi feinga fakamālohi kehe ke taʻofi kitautolú, ʻoku tau lavameʻa pē. ʻOku malava fēfē ʻeni? “ʻOku ʻikai tuʻu ʻi he ivi pea ʻoku ʻikai tuʻu ʻi he ngu, ka ko hoku Laumalie pe—ko e folofola ia ʻa Sihova Sapaoti.” (Sak. 4:6) ʻI hono poupouʻi kitautolu ʻe Sihová, heʻikai malava ʻe ha meʻa ke ne taʻofi ʻetau ngāué!—Loma 8:31.
5 ʻI he taimi ʻoku tau malanga aí, ʻoku ʻikai ha ʻuhinga ke tau hoko ʻo loto-siʻi pe manavahē pe ongoʻi taʻefeʻunga. (2 Kol. 2:16, 17) ʻOku tau maʻu ʻa e ngaahi ʻuhinga māʻolunga tahá ke tau hokohoko atu ai ʻi hono fakamafola ʻa e ongoongo lelei ʻo e Puleʻangá. ʻI he tokoni ʻa Sihová, te tau fakahoko ai ʻa e “meʻa ʻoku ʻikai faʻa lava”!—Luke 18:27.